[ძიუდო] რუსეთში წილი ნაყარია

გაიმართა 23-წლამდელ ძიუდოისტთა ევროპის ჩემპიონატის წილისყრა, რომელიც დღეს აიღებს სტარტს რუსეთში, უდმურტეთის ავტონომიური რესპუბლიკის დედაქალაქ იჟევსკში. იქ მხოლოდ პირადი პირველობა ტარდება, იქაურ ყინულის სასახლე „ოლიმპიურში“ კი მედლებისთვის დღეს 60-66 კილოგრამის ბიჭები და 48, 52, 57 კილოგრამების გოგონები იასპარეზებენ.

ევროპის ჩემპიონატში 12 მონაწილე გვეყოლება - 9 ბიჭი და 3 გოგონა. „სუსტი სქესის“ ტურნირში მხოლოდ სამ წონაში გამოვალთ, ვაჟებში ორს გამოვტოვებთ - 73-სა და მძიმეს, რადგან ნაკრების მთავარმა მწვრთნელმა ლაშა გუჯეჯიანმა შემადგენლობა გადაახალისა და რამდენიმე ძიუდოისტი დაასვენა.

60 კილოგრამში ორი მონაწილით გამოვალთ და ორივე პირველივე წრიდან ჩაებმება ასპარეზობაში, სადაც ორივეს მეტოქედ აზერბაიჯანელი ათლეტი ეყოლება! იმათგან შედარებით უფრო ძლიერი თემურ ნოზაძეს ერგო - ახალგაზრდებში შარშანდელი მსოფლიოს ვიცე-ჩემპიონი და ევროპის მესამე პრიზიორი ბალაბაი აგაევი.

ახალგაზრდებში ევროპისა და მსოფლიოს მესამე პრიზიორი ჯაბა პაპინაშვილი რაშად იელკიევს შეხვდება, ვისაც შარშან ამავე ტურნირზე მოუგო. ახლაც თუ დაამარცხებს,  მერვედფინალში უნგრელი დანიერ მონორისა და სომეხი გორ ჰოვსეპიანის წყვილის გამარჯვებულთან გაარკვევს უძლიერესის ვინაობას. 

ორი მონაწილე გვეყოლება 66 კილოგრამშიც და ისინიც ასევე პირველივე წრიდან ჩაებმებიან შეჯიბრებაში. 20-წლამდელებში ევროპის წლევანდელი ჩემპიონი გიორგი თუთაშვილი ახალგაზრდებში გერმანელთა ევროპის მესამე პრიზიორ მიშელ ადამთან იჭიდავებს, ამათში მოგებულს კი მეორე წრეში ესპანელი დავიდ გარსია ტორნე ელოდება. ამათ გარდა, ამ ჯგუფში იტალიელი მატია მიკელი, ფინელი ლუუკას სანა და მოლდოველი ადილ ოსმანოვსიც გამოდიან. ამავე წონაში ლუკა კაპანაძე თავიდან ესპანელ ადრიან ნეტო ჩინაროს ხვდება, ამათში მოგებულს კი მეორე წრეში ბულგარელი ბოჟიდარ ტემელკოვი ელოდება.

81 კილოგრამში ამჯერად ერთი მონაწილე გვყავს - ახალგაზრდებში მსოფლიოს ჩემპიონი და ევროპის ფინალისტი ვლადიმერ ახალკაცი, ვინც პირველ წრეში თავისუფალია, მეორეში კი აზერბაიჯანელ ჰასილ ჯაფაროვსა და ხორვატ დამიან სოკოლოვიჩს შორის მოგებულს გაეპაექრება.

90 კილოგრამშიც ორი მონაწილე გვყავს. იმედა გოგოლაძე მერვედფინალიდან ჩაებმება შეჯიბრებაში, სადაც ბელარუს ივან დუბინას შეხვდება. ამ ჯგუფში ახალგაზრდებში ევროპის შარშანდელი გერმანელი ჩემპიონი ფალკ პეტერსილკა, უნგრელი აპორ ტოტი და იტალიელი ჯანლუკა იუდიკელიც გამოდიან. 20-წლიანებში ევროპის ბრინჯაოს მედალოსანი მიხეილ ბექაური პირველ წრეში საკმაოდ ძლიერ აზერბაიჯანელ ალიუმარ ტუმაევს ხვდება, ამათში გამარჯვებულს კი შემდეგ ეტაპზე რუსთა ქართული წარმომავლობის რომან დონცოვი (დედის გვარით გამოდის) ელოდება.

ორი ფალავანი გვყავს 100 კილოგრამშიც და ორივე მეორე წრიდან ჩაებმება ტურნირში. ახალგაზრდებში ევროპის მოქმედი გამარჯვებული და მსოფლიოს პირველობის ფინალისტი ილია სულამანიძე იქ ჭაბუკებში თურქთა ევროპის ვიცე-ჩემპიონსა და მსოფლიოს მესამე პრიზიორ ომერ აიდინს შეხვდება. ახალგაზრდებში ევროპის შარშანდელი გამარჯვებული და მსოფლიოს მესამე პრიზიორი ონისე სანებლიძე სომეხ კარაპეტ ისოიანთან იჭიდავებს.

გოგონების ნაკრების უდავო ლიდერი, ახალგაზრდებში ევროპისა და მსოფლიოს ჩემპიონი ეთერ ლიპარტელიანი (57), ვინც უკვე შედის სალიცენზიო ზონაში - რეგიონალურ კვოტაში ხვდება, ჩემპიონატში მეორე ეტაპიდან ჩაებმება, სადაც უნგრელ ბრიგიტა ვარგასა და ესპანელ კაროლინა რივერო სუარესს შორის გამარჯვებულს შეხვდება.

ახალგაზრდებში ევროპის ორგზის ბრინჯაოს მედალოსანი მარიამ ჭანტურია (70) პირველივე წრეში ებრაელ მაია გოშენს ხვდება.

პირველივე წრიდან ჩაებმება ასპარეზობაში ახალგაზრდებში ევროპის კიდევ ერთი ბრინჯაოს მედალოსანი სოფიო სომხიშვილიც (+78) - ხორვატ ზრინკა მიოჩიჩს დაეჭიდება.

471
მკითხველის კომენტარები / 0 /
მსგავსი ამბები
რუბრიკის სხვა სიახლეები
;