ძიუდო. სამი იმედგაცრუება ევროსტარტზე

წარუმატებლად დაიწყო ჩვენმა ძიუდოისტ ვაჟთა ნაკრებმა გამოსვლა თელ-ავივში, ძიუდოისტთა ევროპის ჩემპიონატზე.

გუშინ სასტარტო დღეს ჩვენგან სამი ფალავანი ჭიდაობდა, სამივე - ანგარიშგასაწევი, ორი - სულაც ტიტულოვანი, შედეგი კი მხოლოდ ერთი მეხუთე ადგილია. ტრადიციულად, ამ საფეხურზე ევროპის ჩემპიონი, მსოფლიოს პრიზიორი ამირან პაპინაშვილი (60) ავიდა...

60 კილოგრამში ჩვენთვის დრამატულად განვითარდა მოვლენები: ორივე ფალავანი რუსებმა დაგვიმარცხეს, მათი ყაბარდოელი ოლიმპიური და ევროპის სამგზის ჩემპიონი ბესლან მუდრანოვი კი ბედისწერად გვექცა: ქვეჯგუფში ლუხუმ ჩხვიმიანს მოუგო, დამამშვიდებლის ფინალში კი ბოლო წამებზე პაპინაშვილს აართვა ბრინჯაო.

ჩხვიმიანს ცდა არ დაუკლია

ჩხვიმიანი პირველ წრეში ისვენებდა, მერე კი იქნებ, ცდა არ დაუკლია მუდრანოვთან, უფრო აქტიურადაც ჭიდაობდა, თუმცა საბოლოო შედეგი მაინც უარყოფითი და სავალალო მივიღეთ: ვაზარი გაუშვა და დამარცხდა. გასაგებია მეტოქის ტიტული, მაგრამ ჭიდაობისას ეს ბევრს რომ არ ნიშნავს, უკვე მომდევნო წრეში დაამტკიცა ლამის უცნობმა უკრაინელმა, ახალგაზრდებიდან გადმოსულმა არტემ ლესიუკმა, ვინც მუდრანოვს ვაზარიც აუღო და წმინდადაც მოუგო. მანამდე კი თურქთა სახელით მოჭიდავე ჩვენი თანამემამულე, ევროპის ფინალისტი ბეკირ ოზლუც დაამარცხა.

პაპინაშვილმა ამ ტურნირზეც მისთვის ჩვეული სქემით იჭიდავა: ნახევარფინალამდე დამაჯერებლად მივიდა, მერე კი ზედიზედ ორჯერ დამარცხდა და მედლის ნაცვლად მეხუთეზე დარჩა.

ხელიდან გაშვებული
შესანიშნავი შანსი

კაცმა რომ თქვას, მას დიდი ჯაფა არც ნახევარფინალში გასასვლელად დასდგომია, რადგან მეტოქეებად ბულგარელი ვალენტინ ალიპიევი და უნგრელი ჩაბა საბო ჰყავდა. მათ იოლადაც გაუმკლავდა - პირველს იპონით მოუგო, მეორეს - ვაზარით და მისთვის საბედისწერო ზღურბლს - ნახევარფინალს მიადგა.

ბედის ჩარხიც იქიდან დაუტრიალდა ცუდად: ჯერ რუსთა მომავალ ჩემპიონ ისლამ იაშუევთან დაკარგა ვაზარი, მერე - მუდრანოვთანაც.

არადა, ვერ ვიტყვით, რომ მუდრანოვთან პასიური იყო, ნაადრევად ჩამოყარა ხელები და მარცხს შეეგუა. პირიქით, მომენტებიც ჰქონდა, მაგრამ ვაზარი საბოლოოდ მაინც მეტოქემ მიითვალა... ნამდვილად დასანანია უმედლოდ დარჩენა. განსაკუთრებით, იმ ფონზე, რომ ფინალში იაშუევი და ბულგარელი იანისლავ გერჩევი გავიდნენ...

მარგველაშვილის ფიასკო

ძალიან მოულოდნელი იყო ევროპის ჩემპიონის, მსოფლიოს პრიზიორ ვაჟა მარგველაშვილის მარცხიც პირველივე წრეში გერმანელ მიხელ ადამთან - ვაზარიც დაუკვირვებლად გაატარა და მერე ვერაფრით გარდატეხა შეხვედრა იმის მიუხედავად, რომ საკმაო დრო ჰქონდა.

არადა, ადამი რა შვილიცაა, მყისვე გამოჩნდა, როცა ბელარუსმა დზმიტრი შერშანმა დაიფრინა. მარგველაშვილი ასეთ ქვეჯგუფს ვერ ინატრებდა - ადამი, შერშანი, ჩერნოგორიელი მარკო გუსიჩი და ამ კალიბრის ფალავნები ჰყავდა დასამარცხებელი. საბოლოოდ ამ წონაშიც მეტად "უცნობი" კვარცხლბეკი მივიღეთ.

დღეს იჭიდავებენ

დღეს თელ-ავივის ტატამზე კიდევ ორი ჩვენებური იჭიდავებს: ოლიმპიური და ევროპის ჩემპიონი ლაშა შავდათუაშვილი (73) და ევროპის ორგზის ფინალისტი ნუგზარ ტატალაშვილი (81).

ამათგან შავდათუაშვილი პირველ წრეში თავისუფალია, მისი მეტოქე კი გერმანელი იგორ ვანდტკესა და მასპინძელი ონორ გინერის პაექრობაში გამოვლინდება.

ქვეჯგუფში ჩვენებურს არავინ ჰყავს გამორჩეულად ძლიერი, ვისთანაც შეიძლება, გაუჭირდეს, თუმცა საბრძოლველი რომ ყველასთანაა, ეს გუშინდელმა დღემაც დაგვიდასტურა. ზოგადად, ოლიმპიურ ჩემპიონს კარგი წილისყრა აქვს, რადგან ფინალამდე ასცდნენ მისთვის უხერხული მეტოქე, აზერბაიჯანელი ოლიმპიადის ფინალისტი და ევროპის ჩემპიონი რუსტამ ორუჯოვი, ძლიერი მასპინძელი ტოჰარ ბუტბული და თუნდაც, შვედი ტომი მაკიასი.

ტატალაშვილს პირველივე წრეში მეტოქედ სერბთა მსოფლიოს ფინალისტი სრდან მრვალჯევიჩი ერგო, ამათში მოგებულს კი შემდეგ ეტაპზე ბულგარელი ივაილო ივანოვი ელოდება. ამავე ჯგუფში არიან ბერძენთა დედით ქართველი ალექსიოს დანაციდისი და რუსი ასლან ლაპინაგოვი.

კვარცხლბეკი

60 კგ.

1. ისლამ იაშუევი (რუსეთი); 2. იანისლავ გერჩევი (ბულგარეთი); 3. ბესლან მუდრანოვი (რუსეთი), ეშლი მაკენზი (ბრიტანეთი); 5. ამირან პაპინაშვილი (საქართველო).

66 კგ.

1. ადრიან გომბოცი (სლოვენია); 2. მატეო მედვესი (იტალია); 3. ტალ ფლიკერი (ისრაელი), დზმიტრი შერშანი (ბელარუსი).

ყოველდღიური სპორტული გაზეთი "ლელო"
474
მკითხველის კომენტარები / 0 /
მსგავსი ამბები
რუბრიკის სხვა სიახლეები