ძიუდო. საქართველოსთვის ტატიანა ლევიცკა იჭიდავებს... რძალიცაა და ლეგიონერიც

საქართველოს ქალთა ნაკრებში მატებაა. თანაც, ისეთი სპორტსმენისა, რომელსაც ნატურალიზებულიც შეიძლება ვუწოდოთ და - რძალიც. საქმე ისაა, რომ ნაკრების წევრი ხდება თურქეთში გადასული ბეთქილ შუკვანის - ბეკირ ოზლუს (60) მეუღლე ტატიანა შუკვანი (52). თავად ბეთქილი რომ ეროვნებით ქართველია, ამაზე არავინ კამათობს, მაგრამ უკვე კარგა ხანია, თურქეთის მოქალაქეა. მის მეუღლეს სწორედ ამიტომ უფრო მიესადაგება ნატურალიზებულის სტატუსი, მაგრამ, სამაგიეროდ, ტატიანას უკვე აქვს საქართველოს მოქალაქეობა.

თუმცა დავანებოთ თავი მის სტატუსს, რადგან ახლა ამაზე მეტად მნიშვნელოვანია, იმედები გაამართლოს და ეროვნულ ნაკრებს გამოადგეს. მაშინ ის მარიამ ჯანაშვილსაც (52) ღირსეულ სპარინგ-პარტნიორობას გაუწევს, რომელიც ჯერჯერობით ეულადაა დარჩენილი ქვეყნის მთავარ გუნდში.

გუნდის ახალი წევრი ეროვნებით უკრაინელია, ქალიშვილობის გვარით ლევიცკა და 2014 წელს, როცა თბილისის ტურნირს პირველად მიენიჭა "დიდი პრიზის" სტატუსი, ჩვენს შეჯიბრებაზე ბრინჯაოს მედალიც მოიპოვა. მაშინ ის ჯერ კიდევ არ იყო შუკვანის მეუღლე, ამის შემდეგ გათხოვდა და წყვილს უკვე შვილიც ჰყავს. მის ანგარიშზეა აგრეთვე ევროპის გუნდურ და საკლუბო ჩემპიონატები მოპოვებული ბრინჯაოს მედლები.

მას უახლოეს მომავალში - 18-19 აგვისტოს მინსკში გამოცდიან ევროპის ღია თასზე და თუ იმედებს გაამართლებს, ვინძლო, მსოფლიოს ჩემპიონატზეც წაიყვანონ.
აქვე გეტყვით, რომ მინსკში მასთან ერთად მარიამ ჯანაშვილიც იასპარეზებს.

1240
მკითხველის კომენტარები / 0 /
მსგავსი ამბები
რუბრიკის სხვა სიახლეები