ძიუდო. საქართველოს ნაკრების ერთი ოქრო და ერთი ბრინჯაო დიუსელდორფის გრანდ სლემზე

საქართველოს ნაკრებმა ორი მედლით - ოქროთი და ბრინჯაოთი დაასრულა გამოსვლა დიუსელდორფის გრანდ სლემზე.

ჩემპიონი ვალერი ლიპარტელიანი (100) გახდა, ბრინჯაო კი ლუხუმ ჩხვიმიანმა (60) მოიპოვა. ცუდია, რომ გერმანიაში სხვები უმედლოდ დარჩნენ, თუმცა ეს შედეგიც სავსებით მისაღებია იმ ფონზე, რომ ჩვენი ლიდერების უმეტესობა არ გამოდიოდა, ტურნირზე კი სულ შვიდი კაცი გვყავდა.

უბრალოდ, ცუდია, რომ მძიმე წონაში ასე უშედეგოდ გამოვედით; რომ ახალგაზრდებმა ბევრი ვერაფრით გამოიჩინეს თავი (ეს განსაკუთრებით თამაზ კირაკოზაშვილს (81) ეხება, თორემ ამავე წონაში კობა მჭედლიშვილმა ორი წრე მაინც გაიარა და საბოლოოდ მომავალ ჩემპიონთან, ირანელ მსოფლიოს მესამეპრიზიორ საეიდ მოლაესთან 3 წააგო); რომ მეორე ნომრები ვერ აჩვენებენ სათანადო დონეს.

ლიპარტელიანმა გერმანიაში მეოთხედ გაიმარჯვა, თუმცა ეს ტურნირი ხან მაპინძელ ქალაქებს იცვლის, ხანაც - სტატუსს, ახლანდელი რანგით კი პირველად გაიმართა.

ვინც ჯგუფურ ეტაპზე შეხვდა, იმათგან სხვებზე მეტად მონღოლი ოტგონბაატარ ლხაგვარსურენი თუ გამოირჩეოდა, თუმცა "პროფესორი", ტრადიციულად, მშვიდად აკეთებდა თავის საქმეს და მშვიდად მიაღებინა სამი გაფრთხილება.

ეს ჩვენებურის მესამე მოგება იყო, თუმცა მას არც მანამდე გასჭირვებია. მით უფრო, მეტოქეებად ყირგიზი ფარუჰ ბულეკულოვი და ავსტრიელი ლაურინ ბოლერი ჰყავდა. აკი მათთან იპონები არც გასჭირვებია.

უდავოდ, ლიპარტელიანს ყველაზე სერიოზული კონკურენტი ნახევარფინალში ჰყავდა - მსოფლიოსა და ევროპის ფინალისტი, ბელგიელი ტომა ნიკიფოროვი. თუმცა "პროფესორთან" ისიც უძლური გამოდგა - ლიპარტელიანმა მორიგი იპონი მიითვალა. აღსანიშნავია, რომ ქართველმა უკვე მეორედ მოუგო ძლიერ ბელგიელს.

ფინალში ლიპარტელიანს ირლანდიელი ბენჟამინ ფლეტჩერი შეხვდა, ვისი იქამდე მისვლაც უკვე ერთი სიურპრიზი იყო, თუმცა საკმაოდ სუსტი ბადეც შეხვდა. ჩვენებურმა მასაც ძიუდოს მასტერკლასი ჩაუტარა და მოგვერდით დააბერტყა ტატამს.

ეს ამბები დიუსელდორფში გუშინ მოხდა, პირველი მედალი კი ჩვენმა გუნდმა პირველ დღეს - პარასკევს მოიპოვა, როცა ჩხვიმიანი ავიდა კვარცხლბეკზე.

თავიდან საქმეს ისეთი პირი უჩანდა, თითქოს ის უილეთოდ დაამთავრებდა ტურნირს, რადგან ქვეჯგუფში სამივე შეხვედრა გაფრთხილებებით მოიგო. თუმცა ამათგან ერთი ისეთი მეტოქე იყო, მასთან მოგება გინდ ილეთით, გინდ - გაფრთხილებით და გინდაც - ფრენით, ნებისმიერ ვარიანტში გამოსარჩევია:

მონღოლი მსოფლიოს ჩემპიონი ბოლდბაატარ განბატი. ჩხვიმიანმა მას მასტერკლასი ჩაუტარა. მანამდე ჩვენებურს ანალოგიური მეთოდით დამარცხებული ჰყავდა ფრანგი ჟოლან ფლორიმონი, მოგვიანებით კი ამათ გზას ბრაზილიელი ერიკ ტაკაბატაკეც გაუყოლა.

თუმცა საქმე მთლად უილეთოდაც არ ჩამთავრდა და ბრინჯაოსთვის შეხვედრაში ჩხვიმიანმა ორი ვაზარი გაუკეთა ბრიტანელ ევროპის მედალოსან ეშლი მაკენზის.

არადა, პირველი ვაზარი თვითონ დაკარგა მეტოქის კისრულზე, მაგრამ არ გატყდა, მწვრთნელის დავალებებიც ზუსტად შეასრულა და საქმე მოგებამდეც მიიყვანა.

ორივე შემთხვევაში ზედა ჩავლებიდან გაუკეთა ილეთი ფეხით ბრიტანელს - ჯერ გარედან გამოჰკრა, მერე კი კარგად ჩაუხვია და გადააბრუნა.

აქ აუცილებლად უნდა აღინიშნოს, რომ ის ზუსტად ასრულებდა მწვრთნელ ირაკლი ცირეკიძის მითითებებს - ეჭიდავა ახლოდან, დაესწრო ჩავლება, გაეთიშა მარჯვენა ხელი, რამაც შედეგიც მოიტანა...

60 კგ. 1. რიუჯუ ნაგაიამა (იაპონია); 2. რობერტ მშვიდობაძე (რუსეთი); 3. ლუხუმ ჩხვიმიანი (საქართველო), ერიკ ტაკაბატაკე (ბრაზილია).
66 კგ. 1. კენზო ტაგავა (იაპონია); 2. გიორგი ზანთარაია (უკრაინა); 3. ერკემბაიარ ბატოგტოხი (მონღოლეთი), ბარუხ შმაილოვი (ისრაელი).

73 კგ. 1. შოჰეი ონო (იაპონია); 2. რუსტამ ორუჯოვი (აზერბაიჯანი); 3. ტოჰარ ბუტბული (ისრაელი), ფერდინანდ კარაპეტიანი (სომხეთი).
81 კგ. 1. საეიდ მოლაე (ირანი); 2. ალფა ოუმარ დიალო (საფრანგეთი); 3. ასლან ლაპინაგოვი (რუსეთი), დომინიკ რესელი (გერმანია).

90 კგ. 1. მიხაილ იგოლნიკოვი (რუსეთი); 2. მაშუ ბაკერი (იაპონია); 3. ალტანბაგანა განტულგა (მონღოლეთი), ნიკოლოზ შერაზადაშვილი (ესპანეთი).
100 კგ. 1. ვალერი ლიპარტელიანი (საქართველო): 2. ბენჟამინ ფლეტჩერი (ირლანდია); 3. ჟორჟე ფონსეკა (პორტუგალია), ნიიაზ ბილალოვი (რუსეთი).

+100 კგ. 1. ჰისაიოში ჰარასავა; 2. ტაკეში ოჯიტანი (ორივე - იაპონია); 3. ბეკბოლოტ ტოკტოგონოვი (ყირგიზეთი), ანდრეი ვოლკოვი (რუსეთი).

ყოველდღიური სპორტული გაზეთი "ლელო"
378
მკითხველის კომენტარები / 0 /
მსგავსი ამბები
რუბრიკის სხვა სიახლეები