ლაშა შავდათუაშვილი, ოლიმპიური ჩემპიონი პირველად საქართველოს ჩემპიონი გახდა

ქვეყნის ეროვნული პირველობა ძიუდოისტებმაც საახალწლოდ მოიტოვეს და ის გუშინ დაიწყო ძიუდოს აკადემიაში. მას საპატიო სტუმარიც ჰყავს - საერთაშორისო ფედერაციის კომისარი, ქართველთა ძველთაძველი მეგობარი რუმინელი დანიელ ლასკაუ, ვინც, მგონი, აქ უფრო დიდი სიამოვნებით ჩამოდის, ვიდრე - მშობლიურ რუმინეთში.

ეს ჩემპიონატი ერთ-ერთი საკვანძო შეჯიბრებაა საგაისო ნაკრების დასაკომპლექტებლად, თუმცა მწვრთნელებმა ლიდერთა დიდი ნაწილი მაინც დაასვენეს. ასევე გათავისუფლებულნი არიან ახალშექმნილი ასაკობრივი ნაკრების წევრებიც, რომლებიც შეკრებაზე იმყოფებიან.

ამ გუნდში შედიან ჭაბუკებისა და ახალგაზრდების წლევანდელი მედალოსნები ევროპა-მსოფლიოზე, თუმცა მათ რამდენიმე უმედლოდ დარჩენილი, მაგრამ ძალიან პერსპექტიული მოზარდიც დაუმატეს.

ისინი ცალკე გრაფიკით ემზადებიან, რომელიც ახალგაზრდებიდან უფროსებში ეტაპობრივად გადასვლას ითვალისწინებს. ამიტომ წლეულსვე ჩართავენ ევროპის თასზე უფროსებში.

გუშინ ჩემპიონატში მედალოსნები სამ წონით კატეგორიაში - 60, 66 და 73-ში გამოვლინდნენ. ამ წონებში ნაკრების წევრებიდან მხოლოდ ორნი ჭიდაობდნენ - ლუხუმ ჩხვიმიანი (60) და ოლიმპიური და ევროპის ჩემპიონი ლაშა შავდათუაშვილი (73). ორივე მათგანი ჩემპიონი გახდა.

შავდათუაშვილი ძალიან დამაჯერებლად გაისარჯა და ფინალიც მაღალ დონეზე ჩაატარა - ჩანს, ფეხის ტრავმა საბოლოოდ მოირჩინა და ჩვეულ ფორმას იბრუნებს. ფინალამდე მან დამაჯერბლად დაამარცხა ლაზარე თამლიანი, ვალერი ცერცვაძე, თორნიკე თათარაშვილი და შოთა ბესიაშვილი.

ამ წონის ფინალი გორელთა საშინაო დავად იქცა, რადგან შავდათუაშვილის მეტოქე მისი თანაქალაქელი ზვიად კაპანაძე იყო. საინტერესოა, რომ მან წინასწარ შეხვედრებში ოლიმპიური ჩემპიონის უმცროსი ძმა - ბექა შავდათუაშვილი დაამარცხა.

მის გარდა კი გიორგი პაპოშვილს, საბა ნემსიწვერიძეს და ტატო ტატულაშვილსაც აჯობა. სწორედ ზემოხსენებული გაერთიანებული ასაკობრივი ნაკრების გამო ჩემპიონატში არ მონაწილეობდა ხაშურელი ტატო გრიგალაშვილი, თორემ ძალიან საინტერესო კონკურენცია შეიქმნებოდა.

საინტერესოა, რომ ლაშა შავდათუაშვილი - ეს ოლიმპიური ჩემპიონი - პირველად გახდა საქართველოს ჩემპიონი!

60-ში ჩხვიმიანმა ფინალამდე 4 შეხვედრა მოიგო, 66-ის ფინალი კი ევროპის ჩემპიონისა და მსოფლიოს პრიზიორ ვაჟა მარგველაშვილის არყოფნაში ახალგაზრდული გამოდგა.

თანაც - ძალიან დაძაბული: თორნიკე ნაგლიაშვილმა და ზვიად ხუბულურმა 2-2 გდება აუღეს ერთმანეთს, ყველაფერი კი დამატებით დროში დასრულდა ნაგლიაშვილის ლამაზი გდებით.

საქართველოს ჩემპიონატი დღეს დასრულდება დარჩენილი ოთხი წონის - 81, 90, 100 და +100-ის ფალავანთა შერკინებებით, ტატამზე კი გავლენ ევროპის ფინალისტი ნუგზარ ტატალაშვილი, კონტინენტის ნოპირველობის მესამე პრიზიორი ზებედა რეხვიაშვილი (ორივე - 81), ევროპის სამგზის და მსოფლიოს ჩემპიონი ავთანდილ ჭრიკიშვილი, ევროპის მედალოსანი ბექა ღვინიაშვილი (90) და სხვები.

60 კგ.

1. ლუხუმ ჩხვიმიანი (თბილისი); 2. ლაშა ჩადუნელი; 3. თემურ ნოზაძე (ორივე - ხაშური), ამირან დარბაისელი (საგარეჯო).

66 კგ.

1. თორნიკე ნაგლიაშვილი (თბილისი); 2. ზვიად ხუბულური (გორი); 3. ნიკოლოზ ჭიკაიძე (ახმეტა), ლაშა გიუნაშვილი (ქარელი).

73 კგ.

1. ლაშა შავდათუაშვილი; 2. ზვიად კაპანაძე (ორივე - გორი); 3. ომარ ნიაზაშვილი, ფრიდონ გიგანი (თბილისი).

ყოველდღიური სპორტული გაზეთი "ლელო"
1708
მკითხველის კომენტარები / 0 /
მსგავსი ამბები
რუბრიკის სხვა სიახლეები