ძიუდო. საქართველოს 23-წლიანთა ჩემპიონატი: ახალგაზრდული, ძლიერი...

დღეს დიღომში, ძიუდოს აკადემიაში 23-წლამდელ ძიუდოისტთა შორის საქართველოს ჩემპიონატი დაიწყება, რომელიც ამავე ასაკში მსოფლიოს პირველობისთვის შესარჩევი შეჯიბრებაა. აქედან გამომდინარე, ტურნირი საკმაოდ ძლიერი უნდა გამოდგეს, რადგან მასში არა მარტო ახალგაზრდული ნაკრების წევრები, არამედ ეროვნული გუნდის კანდიდატებიც ბლომად გამოვლენ.

წინასწარი მონაცემებითაც ჩანს, რომ ძლიერმა შემადგენლობამ უნდა მოიყაროს თავი. მაგალითად, 60 კილოგრამში იჭიდავებენ ჯაბა პაპინაშვილი, ვინც ზუსტად ერთი კვირის წინათ, ზაგრებში ახალგაზრდებში მსოფლიოს ჩემპიონი გახდა;აგრეთვე - თემურ ნოზაძე, ირაკლი კუპატაძე, ივანე ჯავახიშვილი, ჭაბუკ სამბისტთა შორის მსოფლიოს წლევანდელი მესამე პრიზიორი ამირან დარბაისელი...

ამჯერად 66-ში გამოვა რობინზონ ბეგლარაშვილი, ვისაც მსოფლიოს ზემოაღნიშნული ახალგაზრდული პირველობა სწორედ ზედმეტი წონის გამო გამოატოვებინეს. ახალ წონაში მისი მთავარი კონკურენტები იმავე ზაგრებულ ტურნირზე ბრინჯაოსთვის ბრძოლაში დამარცხებული (ოღონდ იქ 55-ში ჭიდაობდა) ვანო ნინიაშვილი, ახლო წარსულის სახელოვანი ვეტერანის - ნესტორ ხერგიანის ვაჟი ირაკლი ხერგიანი, თორნიკე ნაგლიაშვილი, შალვა გაზაშვილი (ჩანს, ამჯერად შეძლო წონის დაკლება, თორემ ზაგრებში ზედმეტი წონის გამო არც ეს წაიყვანეს), ბექა უდესიანი და სხვები იქნებიან.

73-ში იჭიდავებს ევროპისა და ოლიმპიურ ჩემპიონ ლაშა შავდათუაშვილის ძმა ბექა შავდათუაშვილი და ერთ-ერთი მთავარი ფავორიტიც იქნება. მით უფრო, რომ ახალგაზრდა ძიუდოისტთა შორის ევროპისა და მსოფლიოს ბრინჯაოს მედალოსანი ტატო გრიგალაშვილი ტურნირში არ იჭიდავებს, თუმცა არ გამოვრიცხავთ, მწვრთნელებმა ის შეკრებაზე მაინც ჩართონ ანუ ახლა შეგნებულად გაათავისუფლეს ტურნირისგან. თუმცა ამ წონის ფავორიტებზე საუბრისას გასათვალისწინებელია ბაჩანა ბოლქვაძის და განსაკუთრებით - ლევან გუგავას ფაქტორიც, ვინც ერთი კვირის წინ სამბოში ჭაბუკებში გახდა მსოფლიოს ჩემპიონი.

81 კილოგრამში ახალგაზრდა ძიუდოისტთა შორის ევროპის წლევანდელი ფინალისტი ლუკა მაისურაძე ამჯერად 90-შია დარეგისტრირებული. ამის მიუხედავად, 81-ში მაინც იმდენად ძლიერი შემადგენლობაა შეკრებილი, წინასწარ პროგნოზების გაკეთება ძნელია: უფროსი ლევან გუგავა (ძიუდოში ახალგაზრდებში ევროპისა და მსოფლიოს მესამე პრიზიორი), თამაზ კირაკოზაშვილი, კობა მჭედლიშვილი, გიგა გიგაური, ბექა დონღვანი... თუმცა წილისყრამ დონღვანს ყველაზე მეტად გაუმართლა, რადგან პირველი ოთხეული ბადის ერთ მხარესაა და მათ ფინალამდე არ ხვდება.

მაისურაძეს ახალ წონაში სერიოზულ კონკურენტებთან მოუწევს პაექრობა: საბერძნეთიდან დაბრუნებული ვასილ ბალამპანაშვილი, გიორგი გველესიანი, ნოდარ ბერიანი, ნიკა სიდამონიძე...

დონღვანისა არ იყოს, 100-ში დავით ოზბეთელაშვილსაც გაუმართლა წილისყრამ: წონის მთავარი ფავორიტები, ონისე სანებლიძე, ზაურ კენჭაძე და ახალგაზრდა სამბისტთა შორის მსოფლიოს ჩემპიონი დავით რამაზაშვილი ბადის მეორე მხარეს მოხვდნენ.

მძიმე წონაში არ ჭიდაობს ახალგაზრდებში ევროპის მესამე პრიზიორი ამირან წიქორიძე - ჩანს, ვერ მოირჩინა ბოლო შეკრებაზე მიღებული ტრავმა. მის არყოფნაში ევროპის ახალგაზრდული პირველობის კიდევ ერთი ბრინჯაოს მედალოსანი გელა ზაალიშვილი გამოკვეთილი ფავორიტი ჩანს. მით უფრო, მეორე ფავორიტი - გიორგი ლაზუაშვილი ბადის მეორე მხარესაა და ისინი ერთმანეთს ფინალამდე არ ხვდებიან.

საქართველოს ჩემპიონატი ერთდღიანი ტურნირია, რომელიც აკადემიაში 10 საათზე დაიწყება. თავად 23-წლიანთა მსოფლიოს ჩემპიონატი 10-12 ნოემბერს ჩერნოგორიის დედაქალაქ პოდგორიცაში ჩატარდება.

(იბეჭდება მცირე ცვლილებით)
ყოველდღიური სპორტული გაზეთი "ლელო"

979
მკითხველის კომენტარები / 0 /
მსგავსი ამბები
რუბრიკის სხვა სიახლეები