ძიუდო: სოფიო სომხიშვილის საუკეთესო მეშვიდე

საქართველოს ქალთა ნაკრებმა უმედლოდ დაასრულა გამოსვლა პოლონეთში ჩატარებულ "ევროპის ღია თასზე", რომელიც ქალთა შორის გაიმართა. ჩვენგან მედლისთვის მხოლოდ მძიმეწონოსანმა სოფიო სომხიშვილმა იჭიდავა, თუმცა დამარცხდა და მეხუთე ადგილზე დარჩა.

მან პირველ წრეში უნგრელი კიტი ნადი დააიპონა, მაგრამ მეორე შეხვედრაში თვითონ დატოვა ტატამი უკრაინელი ანასტასია საპსაისგან წმინდად დამარცხებულმა.

დამამშვიდებელში პოლონელებს ანა ზალეჟნა დაუგდო ბეჭებზე, მაგრამ ბრინჯაოსთვის შეხვედრა იტალიელ ელისა მარკიოსთან დათმო - გაფრთხილებებით მოხსნეს.

მეშვიდეზე გავიდა მარიამ ჭანტურია (70), თუმცა ის ახალი გადასულია ამ წონაში და ჯერ, თითქოს, წონა, ძალა აკლია. თუმცა ამის მიზეზი ავადმყოფობაც იქნებოდა - ბოლო შეკრებაზე ვირუსი ჰქონდა და ვარშავაშიც, ფაქტობრივად, სიცხიანმა იჭიდავა. მან პოლონეთში ერთი შეხვედრა მოიგო - ყაზახ დილბარ უმირალიევასთან იპონით, მაგრამ მეოთხედფინალში ბელგიელ გაბრიელა ვილმსთან წააგო, სანუგეშოში კი პოლონელ სანდრა ლიცკუნთანაც დამარცხდა.

ვარშავაში კიდევ ორმა ჩვენებურმა იჭიდავა, მაგრამ ვერც მათ იხეირეს. ტატა ყიფშიძე (48) პირველივე შეხვედრაში ყაზახ აბიბა აბულჟაკინოვასთან დამარცხდა, მარიამ ჯანაშვილი კი დროებით ისევ 57 კილოგრამში გამოვიდა და ასევე პირველივე პაექრობა დათმო ებრაელ მააიან გრეენბერგთან.

ჩვენი ისედაც ახალგაზრდებით დაკომპლექტებული ნაკრები უფროსთა ამ შეჯიბრებაზე ტრავმებით დახუნძლული წავიდა: ჭანტურიას მსგავსად, მაღალი სიცხე ჰქონდა ეთერ ლიპარტელიანს (57), ჯანაშვილმა ბოლო დღეებში ვარჯიშზე ცხვირი გაიტეხა, უფრო ადრე კი ჯანმრთელობის პრობლემა შეექმნა მზია ბებოშვილსაც, ვისაც ახლა დროებით 63 კილოგრამში უნდა ეჭიდავა.

თუმცა სწორედ ავადმყოფობის გამო ის და ლიპარტელიანი ტურნირში საერთოდ ვერ გამოვიდნენ. ოღონდ გუნდს მაინც გაჰყვნენ და მასთან ერთად დღეს პრაღაში გადავლენ, სადაც ერთობლივ ვარჯიშებში ჩაებმებიან.

ქალთა ნაკრების მთავარი მწვრთნელი გია თენაძე ადრევე აცხადებდა, რომ ვარშავაში მისი მიზანი არა შედეგი, არამედ შეგირდებისთვის საშეჯიბრო პრაქტიკის მიცემა იქნებოდა, ხოლო ამ "ლაზარეთის" შემხედვარეს იმედი სულ მთლად გადაეწურა.

თუმცა ერთ-ერთი სერიოზული მიზანი ზემოაღნიშნული ჩეხური ერთობლივი შეკრებაცაა. ვარშავაში ასეთი ვარჯიშები არ ტარდება და ამიტომ პრაღაში გადავლენ, რადგან ხეირიანი სპარინგები ჰაერივით სჭირდებათ. ეგაა, ჯანმრთელობამ თუ შეუწყოთ ხელი.

1289
მკითხველის კომენტარები / 0 /
მსგავსი ამბები
რუბრიკის სხვა სიახლეები
;