[ძიუდო] ტატიანას ორმაგი ეფექტი. ლევიცკა-შუკვანმა პირადშიც იხეირა და გუნდურშიც წაგვადგა

მართალია, ავსტრალიურ პერტში ტატიანა ლევიცკა-შუკვანი (52) უმედლოდ კი დარჩა, მაგრამ რეიტინგში მაინც იხეირა და უკვე შედის 18-კაციან სალიცენზიო ზონაში. ავსტრალიური ტურნირი კონტინენტური თასი კი იყო, მაგრამ ქულებით „დიდ პრიზთან“ იყო გათანაბრებული, ლევიცკა-შუკვანმა კი იქ გამოსვლისთვის 112 ქულა მიიღო - ამდენი იყო გათვალისწინებული XI-XVI ადგილებზე გასულებისთვის. ეს ჩვენი უკრაინელი რძლის (მოგეხსენებათ, ის თურქეთის სახელით მოჭიდავე ბეთქილ შუკვანის მეუღლეა, ვინც საქართველოს სახელით გახდა ევროპის ვიცე-ჩემპიონი) სალიცენზიო რეიტინგის წლევანდელ ანუ გაუნახევრებელ შედეგებში მეხუთე შედეგი აღმოჩნდა. აქამდე მეხუთე რუმინულ კლუჟ-ნაპოკაში „ევროპის ღია კონტინენტურ თასზე“ მოპოვებული 50 ქულა იყო, ახლა კი მის ნაცვლად 112 ქულა შევიდა, ლევიცკას შედეგი კი 1276 ქულიდან 1338-მდე გაიზარდა. ის სალიცენზიო რეიტინგშიც ორი ადგილით დაწინაურდა და ახლა უკვე 26-ეა, მაგრამ ამ სიას თუ გამოვაკლებთ მის წინ მყოფ სამ იაპონელს (მათ, როგორც მასპინძლებს, ოლიმპიადაში მონაწილეობისთვის ლიცენზიები არ სჭირდებათ), ხოლო იმ ქვეყნებს, რომლებსაც ამავე სიაში ორი ან მეტი წარმომადგენელი ჰყავთ, თითო-თითო ფალავანს დავუტოვებთ (მოგეხსენებათ, ოლიმპიადაზე წონაში ქვეყნიდან მხოლოდ ერთი მონაწილე გამოდის), მაშინ ლევიცკა-შუკვანი რეიტინგში ზუსტად მე-18 ადგილზე გამოდის, ლიცენზიას კი ვაჟებშიც და ქალებშიც სწორედ 18-18 საუკეთესო სპორტსმენი იღებს.

მკითხველი რომ არ დაიბნეს, მცირე განმარტება იმის შესახებ, რა განსხვავებაა მსოფლიოსა და ოლიმპიურ რეიტინგებს შორის. მსოფლიოს რეიტინგში შედის კონკრეტული სპორტსმენის მიერ ბოლო ორი წლის განმავლობაში მოპოვებული უკლებლივ ყველა შედეგი, ოღონდ ერთი წლის შემდეგ პირველი წლის ქულები ნახევრდება, მეორისა კი სრულად ირიცხება. ორი წლის გასვლის შემდეგ ის განახევრებული ქულები საერთოდ უქმდება, ხოლო 100-პროცენტიანები ნახევრდება, გაუქმებულთა ნაცვლად კი სიაში ახლები შემოდიან.

სალიცენზიო რეიტინგში ამ განახევრებულებიდანაც ანუ 50-პროცენტიანებიდანაც (ორი წლის მოპოვებული შედეგები) და გაუნახევრებლებიდანაც ანუ 100-პროცენტიანებიდანაც (ბოლო ერთი წლის განმავლობაში მოპოვებული ქულები) შედის მხოლოდ ხუთ-ხუთი საუკეთესო შედეგი, რასაც მეექვსე შედეგად ემატება ექსტრა-ქულა. ესაა მხოლოდ ორ შეჯიბრებაზე - კონტინენტურ პირველობაზე ან მასტერსზე მოპოვებული ქულები, რომელიც უფრო უკეთესი იქნება. ფაქტობრივად, ოლიმპიურ რეიტინგში შედის ექვს-ექვსი შედეგი და მათი შეჯამებით დგება საერთო სია, ოლიმპიადის ლიცენზიას კი, როგორც გითხარით, რეიტინგის 18-18 საუკეთესო სპორტსმენი იღებს. აქამდე ქალებსა და ვაჟებს შორის დიდი დიფერენცირება იყო - ვაჟებს ლამის ორჯერ მეტი კვოტა ჰქონდათ, თუმცა ფემინიზაციის ეპოქამ ყველა გაათანაბრა და უკვე ორივე სქესს თანაბარი ოდენობის საგზურები ერგება. ოღონდ სამართლიანობისთვის უნდა ითქვას, რომ ძიუდოისტი ქალები ნამდვილად იმსახურებენ ამ გათანაბრებას - ქალთა ძიუდო სანახაობრივად არათუ ჩამოუვარდება ვაჟებისას, იქნებ, კიდეც აღემატება მას.

ტატიანა ლევიცკა-შუკვანი

ლევიცკა-შუკვანს სალიცენზიო რეიტინგში განახევრებული ქულებიდან მხოლოდ ოთხი შედეგი ეთვლება, რადგან უკრაინის მხარემ გადმოსვლის ნება არ დართო და მოუწია ორწლიანი ვადის გასვლამდე ლოდინი. ამიტომ შედარებით გვიან ჩაერთო შეჯიბრებებში და იმ ოთხი შედეგიდანაც ორში სამ-სამი ქულა აქვს დარიცხული. ფაქტობრივად, მას არასრული რეიტინგით უწევს კონკურენციაში ჩაბმა, მაგრამ მაინც წარმატებით იბრძვის. მისი ქულების ძირითადი მარაგი ბოლო ერთწლიან მონაკვეთზე მოდის, მთავარი შევსება კი ახლახან მიიღო, როცა 24 ოქტომბერს აბუ დაბის „დიდ მუზარადზე“ მეხუთე ადგილზე გავიდა და 360 ქულა მოინადავლა. ის ივლისში ზაგრებშიც მეხუთეზე გავიდა, მაგრამ ის შეჯიბრება უფრო დაბალი რანგისა იყო - „დიდი პრიზი“ და ამიტომ მაშინ 252 ქულა დაერიცხა. რაოდენობრივად ამას მოსდევს მსოფლიოს წლევანდელ ჩემპიონატზე მოპოვებული 240 ქულა (მე-17 - 32-ე ადგილი), ივლისშივე ბუდაპეშტის „დიდ პრიზზე“ მე-7 ადგილისთვის მიღებული 182 და ზემოხსენებული ავსტრალიური 112 ქულები.

აქვე ისიც ვთქვათ, რომ ეს რეიტინგი ცვალებადია - რაც დრო გადის, გარკვეული ქულები ან ნახევრდება ან საერთოდ უქმდება, მათ ნაცვლად კი ახლები შემოდის. სალიცენზიო ქულების გაცემა გაისად 30 მაისს შეწყდება და სწორედ იმ დროს არსებული სიის მიხედვით დასახელდება 18 ლიცენზირებული სპორტსმენი, თუმცა ეს საგზურები მათ ქვეყნებს ეკუთვნით და მწვრთნელს შეუძლია მონაწილის შეცვლა, ოღონდ ის შემცვლელიც უნდა შედიოდეს სალიცენზიო ზონაში.

ლევიცკა-შუკვანს 30 მაისამდე 100-პროცენტიანი ქულებიდან არაფერი დააკლდება, 50-იანებიდან კი ჩამოაკლდება რამდენიმე.

აქამდე სალიცენზიო რეიტინგში ჩვენი ფენომენალური გოგო და ამ სეზონში უკლებლივ ყველაფრის მომგები (20-წლამდელებში ევროპისა და მსოფლიოს ჩემპიონი, 23-წლიანებში - ევროპის ჩემპიონი) - ეთერ ლიპარტელიანიც (57) შედიოდა, ვინც რეგიონული კვოტით ხვდებოდა ლიცენზირებულებში. თუმცა ესეც მყიფე რეალობაა, რომელიც ყოველი ტურნირის შემდეგ შეიძლება შეიცვალოს, მაგრამ არავის ეეჭვება, რომ ლიპარტელიანი ამის იმედად არ დარჩება და თავისითაც მოიპოვებს ქულებს. ამჟამად მას სალიცენზიო 18-კაციან ზონასთან სულ რაღაც 200-ოდე ქულა აშორებს, ამ სხვაობის აღმოფხვრა კი ნამდვილად არ გაუჭირდება.

სამაგიეროდ, ლევიცკა-შუკვანის შესვლამ ლიცენზირებულთა შორის გუნდურში მოგვცა დიდი შედეგი - უკვე ქალებშიც ორი საგზური გვაქვს და საქართველო დღეის მონაცემებით იმ 10 ქვეყანას შორის შედის, რომლებსაც 6-დან 5 საგზური აქვთ. მოგეხსენებათ, გუნდურში 6 წონა შედის - 3 ვაჟებისა (73, 90, +90) და ამდენივე - ქალებისა (57, 70, +78). ვაჟებში სამივე წონაში აქედანვე გვაქვს გარანტირებული ლიცენზიები (თუმცა ჩვენების უჭიდავებლობით ბევრ მათგანს რეიტინგის სათავეებიდან დაქვეითება, ზოგს კი განთესილთა 8-კაციანი ზონიდან გავარდნა ემუქრება). ქალებში საგზურები 57-სა და 70-ში გვაქვს უსაგზუროდ კი მძიმე წონაში ვრჩებით. მართალია, 70 კილოგრამში პირად რეიტინგში ჩვენი ძიუდოისტი მარიამ ჭანტურია არ შედის სალიცენზიო 18 კაცში, მაგრამ რაკი 52-ში გვაქვს ლიცენზია, შეგვიძლია, გუნდურზე მისი წარმომადგენელი დავაყენოთ 57-ში, ლიპარტელიანი 70-ში ავანაცვლოთ და ასე შემდეგ - ამის უფლებას საერთაშორისო ფედერაცია გვაძლევს. მაგალითად, სადღეისოდ უკრაინასაც ჩვენსავით 5 საგზური აქვს - 3 ბიჭებში და 2 - ქალებში: 57-სა და მძიმეში. არა აქვთ 70-ში, მაგრამ ვინაიდან არც 52-ში აქვთ და არც - 63-ში, 70-ში არ აძლევენ 57-ის მონაწილის დაყენების უფლებას. თუმცა, ვიმეორებთ: ეს სადღეისო მოცემულობაა, თორემ ის შეიძლება ნებისმიერი ტურნირის შემდეგ შეიცვალოს ჩვენ საწინააღმდეგოდ, წარმატებით თუ არ ვიასპარეზებთ.

დასასრულს, ბარემ გუნდური ტურნირის ლიცენზიებზე ერთსაც გეტყვით; სადღეისო მონაცემებით, მსოფლიოში სულ 9 ქვეყანას აქვს 6-ვე ლიცენზია, საქართველო კი მეორე ჯგუფში შედის ანუ 5-საგზურიანთა შორისაა, ასეთი კი 10 ქვეყანაა: საქართველო, ავსტრია, აზერბაიჯანი, კუბა, დიდი ბრიტანეთი, მონღოლეთი, პორტუგალია, სლოვენია, ესპანეთი და უკრაინა.

736
მკითხველის კომენტარები / 0 /
მსგავსი ამბები
რუბრიკის სხვა სიახლეები
;