[ძიუდო] ქართველთა 14 მედალი თურქეთიდან

ამ უქმეებზე ანტალიაში ჩატარებულ ჭაბუკ ძიუდოისტთა ევროპის თასზე დიდი წარმატებით გამოვიდნენ ჩვენი გუნდები - ბიჭებიც და გოგონებიც, თუმცა, რაღა თქმა უნდა, უფრო შთამბეჭდავად ბიჭებმა იასპარეზეს. მარტო იმის თქმა რად ღირს, რომ მათ ათი წონიდან ხუთის ფინალში იჭიდავეს, ხოლო ოთხ წონაში სულაც ქართული ფინალი გაიმართა - 55, 66, 73 და 90 კილოგრამებში. მთლიანობაში, ბიჭებმა ათივე წონაში მედალი მოიპოვეს.

ანტალიაში საქართველოს დელეგაციამ 14 მედალი მოიპოვა (65 მონაწილიდან) - 5-5 ოქრო-ვერცხლი და 4 - ბრინჯაო. აქედან ერთი ოქრო გოგონების ნაკრებზე მოდის, დანარჩენი კი ბიჭების მონაგარია. ჩვენზე მეტი მედალი მხოლოდ მასპინძელმა თურქეთმა მოიპოვა - 22.

გიორგი ყიზილაშვილის გუნდი ბიჭების საერთო გუნდური ჩათვლის უპირობო ლიდერია.

ბიჭებში ჩემპიონები გიორგი სარდალაშვილი (55), კოტე კაპანაძე (66), ჯუმბერ მელაძე (73) და მიხეილ ჯაფარიძე (90) გახდნენ. მეორეზე კაკო ჩაფურიშვილი (55), ნოდარ ძამაშვილი (66), გიორგი ტერაშვილი (73), გიორგი მარმალიძე (81) და არჩილ მამულაშვილი (90) გავიდნენ, ხოლო ბრინჯაოს მედლებს მალხაზ ბანძელაძე (50), თენგიზ ზირაქაშვილი (60), ალექსანდრე ლოლაძე (73) და უჩა ტაბატაძე (+90) დაეუფლნენ. ბრინჯაოს მოპოვება კიდევ ხუთ ფალავანს შეეძლო - ალექსანდრე პაპავა (55), დავით გირგვლიანი, გიორგი გუგავა (ორივე - 81) და შალვა გურეშიძე (+90) დამამშვიდებლის ფინალში გავიდნენ, მაგრამ საბოლოოდ მეხუთე ადგილზე დარჩნენ.

გოგონები ამჯერად მხოლოდ ერთ მედალს დასჯერდნენ, თუმცა ოქრო კი მოიპოვეს - 63 კილოგრამში ჩემპიონი ეთერ ასკილაშვილი გახდა. ბრინჯაოს მედლისთვის იჭიდავეს ამ გუნდის ლიდერებმა - ნინო გულბანმა (70) და გვანცა სომხიშვილმა (+70), თუმცა დასკვნით პაექრობებში დამარცხდნენ და უმედლოდ დარჩნენ, მეხუთე ადგილს დასჯერდნენ.

ანტალიაში 50 კილოგრამში 5 მონაწილე გვყავდა, თუმცა მათ შორის არ იყო საქართველოს ჩემპიონი ალეკო ჯანეზაშვილი - ამჯერად ზედა წონაში გამოვიდა. მის არყოფნაში ბანძელაძემ იმარჯვა - ქვეყნის ბრინჯაოს პრიზიორმა, ვინც ტურნირზე 6 პაექრობა გამართა და აქედან 5 წმინდად მოიგო, ერთში კი დამარცხდა - ნახევარფინალში მასპინძელთა მომავალ ჩემპიონ იბრაჰიმ დემირელთან. იქამდე ქვეჯგუფში 4 შეხვედრაში იპონით იმარჯვა - ყაზახ მადიარ მაკაშთან, თურქ აზმი კოჯაბეისთან (ამას ვაზარი გაუქვითა ორი გდებით), აზერბაიჯანელ ჰუსეინ ალაჰიაროვთან და ლუკა მოდებაძის მომგებ რუს რამილ ალეკბეროვთან, ხოლო დამამშვიდებლის ფინალში გაფრთხილებებით მოახსნევინა კიდევ ერთი ყაზახი ადილეტ ალმატი.

55-ში ქართული ფინალი ხომ გაიმართა, ნახევარფინალში ოთხიდან სამი ქართველი იყო - სარდალაშვილმა აზერბაიჯანელ ნიკატ შირიონოვს მოუგო, ჩაფურიშვილმა - თანაგუნდელ რაფავას.

საქართველოს ჩემპიონატის ფინალისტები - სარდალაშვილი და სერაფიმე თოფურია ერთ ჯგუფში მოხვდნენ, თუმცა ამჯერად მათი გზები არ გადაიკვეთა - თოფურია აზერბაიჯანელ აიაზ აგაევთან და რუს მიხაილ ნელიუბინთან მოგების შემდეგ სომეხ აშიკ ანდრეიანთან დამარცხდა, ვისაც მეოთხედფინალში სარდალაშვილმა წმინდად მოუგო - ჯერ ვაზარზეც დააგდო, მერე კი მესამე გაფრთხილებაც მიაღებინა.

ჩაფურიშვილი საქართველოს ჩემპიონატში 60 კილოგრამში გამოვიდა, ისე კი შარშან 50-ში ჭიდაობდა. ანტალიაში ჩაფურიშვილიც ქართველთან მოხვდა ჯგუფში - ზემოხსენებულ ჯანეზაშვილთან, თუმცა არც ესენი შეხვედრიან ერთმანეთს, რადგან ჯანეზაშვილი ადრევე გავარდა. ჩაფურიშვილმა დამაჯერებლად იასპარეზა და ზედიზედ დაამარცხა ყაზახები -  სუკრობ პულატოვი და იერასილ ანესოვი (ორივე - იპონით), რუსი ასლან მალკასოვი კი 3 გაფრთხილებით მოახსნევინა, როგორც - რაფავა. ამასობაში სარდალაშვილმა ანდრეიანის გარდა აზერბაიჯანელი ზაჰირ აგაზადა ვაზარით, ხოლო ყაზახი ჩინგისხან ტილეპბერგენი და ასევე აზერბაიჯანელი ნიკატ შირინოვი წმინდა გდებებით დაამარცხა, ბოლოს კი ჩაფურიშვილსაც ასევე აჯობა.

ზირაქაშვილი და საქართველოს მესამე პრიზიორი ლუკა კუხალეიშვილიც ერთად მოხვდნენ ჯგუფში, თუმცა ერთმანეთს არც ესენი არ შეხვედრიან - ორივე რუს იუნუს დადაბოევთან დამარცხდა, ვინც საბოლოოდ საერთოდ უმედლოდ დარჩა. მას ბრინჯაოსთვის შეხვედრაში აზერბაიჯანელმა სეიმურ მაჯიდლიმ აჯობა, ვინც ჩვენც რისხვად გვექცა - სანუგეშო წრეში ერეკლე ფალიანი, გიგა მრელაშვილი და თემურ ელიზბარაშვილი დაგვიმარცხა.

ზირაქაშვილმა პირველ პაექრობაში გაფრთხილებებით მოახსნევინა ყაზახი სერიკხან ორაზაევი, მერე ვაზარ-იპონით დაამარცხა რუსი საიდ-მაგომედ ტალკიგოვი, ვაზარით - ყირგიზი იმტიიაზულო ალიევი, რასაც დადაბოევთან წაგება მოჰყვა, სანუგეშოში კი ჯერ თანაგუნდელებს - კუხალეიშვილსა და ალეკო გიგოლაშვილს მოუგო, ხოლო ბრინჯაოსთვის პაექრობაში თურქი ენეს ატა მოახსნევინა 3 გაფრთხილებით.

კოტე კაპანაძე ტურნირზე რუსებს დაერია - სულ 6 პაექრობა გამართა და აქედან 4-ში რუსები დაამარცხა: ისმაილ ალბოგაჩიევი, რომან ბლიევი და რაფიკ ნერსისიანი ჯგუფში, ხოლო ნახევარფინალში ტარას ნოვოლოცკი მოახსნევინა. ამათ გარდა, ავსტრალიელი რაიან კონიგიც დააიპონა, ხოლო ფინალში ძამაშვილიც გაფრთხილებებით მოახსნევინა. წაგების მიუხედავად, აღსანიშნავია ძამაშვილის გამოსვლაც - საქართველოს პირველობაზე ის პირველივე პაექრობაში დამარცხდა გიგა მაისურაძესთან, თუმცა ანტალიაში წავიდა და საკმაოდ კარგი შედეგიც მოიპოვა. მან ყაზახი იერსულთან დუისენკანი იპონით, რუსი ასლან კამურზოევი და თურქი ემრე კარადუმანი ვაზარით დაამარცხა. ამის შემდეგ ყაზახებს მოუგო - ორაზგელდი ურალოვი 3 გაფრთხილებით ჩამოიშორა, ნურსულთან ზაიზაგალიევი კი დააიპონა.

ჯუმბერ მელაძე საქართველოს ჩემპიონატზე ალექსანდრე ლოლაძესთან დამარცხდა ნახევარფინალში, ახლა კი ჩემპიონი გახდა, ტერაშვილი კი ორგანვე მეორეზე გავიდა.  მელაძემ ნახევარფინალში ყაზახ ადილ ადუახატოვსაც მოუგო, ვინც ჯგუფში ლოლაძეს აჯობა. ერთი სიტყვით, კონკურენცია აქაც ფრიად ჩაიხლართა და მწვრთნელებს კიდევ დასჭირდებათ შეჯიბრებები ამ დავის გადასაჭრელად.

მელაძემ თავიდან რუსი ერიკ აგაბეკიანი დააიპონა, მერე კი ყაზახებს მისდგა - საფარმურად აბლაისანოვს გასაქანი არ მისცა და მოახსნევინა, ნურდაულეტ ბაკტიბაილუს და ნახევარფინალში ზემოხსენებულ ადუახატოვს კი ვაზარ-იპონით აჯობა.

ამასობაში ტერაშვილმა რუსების გაცამტვერებით დაიწყო ასპარეზობა - დიმიტრი ჯალბასაც და მაქსიმ კრინიცინსაც წმინდად მოუგო, უზბეკ სამანდარ ტოშბოევთან კი მორიგი იპონი ვაზარის გაქვითვით მიითვალა, ნახევარფინალში კი კიდევ ერთ რუსს - მაგომედ ატაევს ვაზარით მოუგო. ის ფინალსაც იგებდა ვაზარით, მაგრამ მელაძემ მოახერხა წმინდად გამარჯვება.

81 კილოგრამში 6 მონაწილე გვყავდა, თუმცა ოქრო ვერ მოვიპოვეთ. სამაგიეროდ, ყველაზე უკეთ ისევ ქვეყნის ჩემპიონი მარმალიძე გამოვიდა. მან რუსებთან - ივან კუდრიაშოვთან და ანდრეი კოლონცოვთან, აგრეთვე ყაზახ ნურდაულეტ აბდიბაისთან წმინდა მოგებების შემდეგ მეოთხედფინალში ვაზარით რევანში აუღო დავით არუთინიანის მომგებ რუს ბულატ საიდულინს, ხოლო ნახევარფინალში დავით გირგვლიანის დამმარცხებელი ასევე რუსი ეგორ მალკინი დაჯაბნა იმავე ანგარიშით. ფინალი ჩვენმა ფალავანმა რუს ყურბან ყურბანოვთან დათმო ასევე ვაზარით. ამ წონაში ჯგუფურ ეტაპზე ორ-ორი პაექრობა მოიგეს თომა მოხევიშვილმა და ნიკოლოზ მარმალიძემ, სამი - გირგვლიანმა, თითო - გიორგი გუგავამ და არუთინიანმა. დამამშვიდებელში გუგავამ 3 პაექრობა მოიგო, აქედან 2 - მოხევიშვილთან და ნიკოლოზ მარმალიძესთან, გირგვლიანმა კი ორ პაექრობაში იმარჯვა. ბრინჯაოსთვის შეხვედრაში გუგავა მალკინთან დამარცხდა, გირგვლიანი კი - ჯგუფში გუგავასა და ნიკოლოზ მარმალიძის მომგებ რუს ერიკ ტემირხანოვთან.

90-შიც ქართული ფინალი გაიმართა, რომელშიც ქვეყნის ჩემპიონმა ჯაფარიძემ გაიმარჯვა. ფინალში მან არჩილ მამულაშვილს მოუგო, ვისაც საქართველოს პირველობაზე ნახევარფინალშიც აჯობა, მანამდე კი - მეოთხედფინალში ქვეყნის ვიცე-ჩემპიონ ერეკლე ბაზიერაშვილსაც სძლია. ჯაფარიძემ ანტალიაში 5 მეტოქე დაამარცხა. ამათგან სამს წმინდად აჯობა - თურქ ალი კუჩუკჩაკირი, ბაზიერაშვილს და ნახევარფინალში ასევე თურქ ისმაილ უნალს, ხოლო ყაზახი მუკაჟან იერმეკი და მამულაშვილი ვაზარით დაჯაბნა. თავის მხრივ, მამულაშვილმა ფინალამდე 4 პაექრობა გამართა და ყველა იპონით მოიგო: მასპინძელ ლატიფ ჯანარსლანთან, რუს მატვეი მელნიკთან, ფრანგ დავიდ ალისთან და ასევვე რუს ზახარ ფუხაევთან. ორ-ორი მოგებით მეოთხედფინალში გიგა ქოპილაშვილი და გიორგი მაისურაძეც გავიდნენ და მერე დამამშვიდებელში გადავიდნენ, სადაც ქოპილაშვილი დავიდ ალისთან დამარცხდა, მაისურაძემ კი კვლავ ორჯერ იმარჯვა; მათ შორის - ბაზიერაშვილთანაც (ამით რევაშიც აუღო ქვეყნის პირველობაზე მარცხისთვის) და ბრინჯაოსთვის ბრძოლის უფლება მპიპოვა, თუმცა იქ ფუხაევთან წააგო. 

მძიმე წონაში ქვეყნის ჩემპიონი გურეშიძეც გავიდა ნახევარფინალში და - ვიცე-ჩემპიონი ტაბატაძეც. იქ გურეშიძე უზბეკთა მომავალ ჩემპიონ აბდულა ტუხტამიშოვთან დამარცხდა, ტაბატაძემ კი რუს დენის ბაჩაევთან წააგო. სამაგიეროდ, ტაბატაძემ ბრინჯაოსთვის პაექრობაში იმარჯვა აზერბაიჯანელ ათაბაბა ნიფტალიევთან და კონკურენტსაც გაუსწრო, რადგან გურეშიძემ დამამშვიდებლის ფინალი თურქ მუნირ ერტუგთან დათმო.

დაბოლოს, ეთერ ასკილაშვილი, ვინც ქალთა ძიუდოს ახალი იმედია. ის პირველ წრეში ისვენებდა, მერე კი ოთხი პაექრობა მოიგო და - ყველა იპონით. მან თურქი სიმგე პინარი, ყაზახი ასლაი ტაშმეტოვა, რუსი სარა გლუკოვა და ფინალში ისევ მასპინძელი ხატიჯე ვანდემირი დაამარცხა. თანაც, ოთხივე პაექრობა ილეთით მოიგო და არა გაფრთხილებით.

1162
მკითხველის კომენტარები / 0 /
მსგავსი ამბები
რუბრიკის სხვა სიახლეები
;