[ძიუდო] შავდათუაშვილი, მარგველაშვილი, ღვინიაშვილი... ვისგან რას უნდა ველოდოთ დიუსელდორფში?

21 თებერვალს დიუსელდორფში "დიდი მუზარადის" ტურნირი იწყება ძიუდოში, რომელშიც 117 ქვეყნის 676 ათლეტი გამოვა. ჩვენგან გერმანიაში მხოლოდ ვაჟთა ნაკრები იასპარეზებს. თანაც - სრულად დაკომპლექტებული გუნდით ანუ 14 მონაწილე გვეყოლება, ყველა წონაში 2-2.
დღეს 60 და 66 კილოგრამების წარმომადგენლები იჭიდავებენ. 60-ში ახალგაზრდების დუეტი გვეყოლება - ჯაბა პაპინაშვილი და თემურ ნოზაძე, რომლებიც პირველივე წრიდან ჩაებმებიან შეჯიბრებაში.

პაპინაშვილი ავსტრალიელ ჯოშუა კატზს ეჭიდავება, ნოზაძე - გერმანელ მორიც პლაფკის. გამარჯვების შემთხვევაში პაპინაშვილი მერე უზბეკთა მსოფლიოს შარშანდელ მსოფლიოს ფინალისტ შარაფუტდინ ლუტფილაევს გაეჯიბრება, ნოზაძე - ადონის დიასს. ბუნებრივია, პაპინაშვილი შეუდარებლად ძლიერ ბადეშია, თუმცა ნოზაძესაც ფინალში იაპონელთა მსოფლიოს სამგზის ჩემპიონი და ოლიმპიური პრიზიორი ნაოჰისა ტაკატო ჰყავს. ერთი ეგაა, რომ მას მეოთხედფინალამდე არ ხვდება ანუ წაგების შემთხვევაშიც კი რჩება მედლის მოპოვების შანსი.

ისე კი ტაკატოს იქამდე მისაღწევად ბრაზილიელთა ოლიმპიურ პრიზიორ ფელიპე კიტადაისა და მონღოლთა მსოფლიოს ჩემპიონ ბოლდბაატარ განბატს შორის მოგებული ეყოლება დასამარცხებელი. მერვედფინალის სავარაუდო მეტოქეთა შორის ნოზაძესაც ჰყავს ერთი საკმაოდ ძლიერი კონკურენტი - ბრიტანელთა ევროპის მესამე პრიზიორი ეშლი მაკენზი. აი, პაპინაშვილის ჯგუფში კი ლუტფილაევის გარდა გამოსარჩევი მხოლოდ ჰოლანდიელთა ქართველი თორნიკე ჭკადუაა.

66 კილოგრამში ევროპის ჩემპიონი, მსოფლიოს მესამე პრიზიორი ვაჟა მარგველაშვილი ჯგუფში მოლდოველთა მსოფლიოს შარშანდელ მესამე პრიზიორ დენის ვიერუსთან მოხვდა, ვისთანაც 4 პაექრობიდან მხოლოდ ერთი წააგო, თუმცა ისიც - ბოლო პერიოდში. თანაც, ამჯერად მოლდოველს მეოთხედფინალამდე არ ხვდება, ჩვენებური კი შეჯიბრებაში მეორე წრიდან ჩაებმება, სადაც ალჟირელ ვაილ ეზინეს დაეჭიდება, მასთან მოგების შემთხვევაში კი წინა ტურნირზე, პარიზის `დიდ მუზარადზე~ თორნიკე ნაგლიაშვილის მიერ ქრესტომათიული იპონით დამარცხებულ ჰაიტელ ხერარდ კადეტსა და ჩეხ პაველ პეტრიკოვს შორის უძლიერესს შეხვდება. მარგველაშვილს მაინც გაუმართლა, რადგან ჯგუფის მეორე მხარეს, ვიერუსკენ აზერბაიჯანელთა მსოფლიოს პრიზიორი ორხან საფაროვი, სლოვენიელთა ევროპის ჩემპიონი ადრიან გომბოცი და საკმაოდ ძლიერი გერმანელი სებასტიან სეიდლიც არიან.

ამ წონაში ევროპული თამაშების მედალოსანი ბაგრატ ნინიაშვილიც მეორე წრიდან ჩაებმება, სადაც ძლიერ ებრაელ ტალ ფლიკერს შეხვდება. ამ დუეტიდან უძლიერესი 1/16-ფინალში ფილიპინელ შუგენ ნაკანოსა და გერმანელ დან მატუშოვიჩს შორის მოგებულს დაეჭიდება.

22 თებერვალს 73 და 81 კილოგრამების ძიუდოისტები იასპარეზებენ და ჩვენებიდან ყველაზე მეტად ხვალ მოჭიდავეებს - ლაშა შავდათუაშვილსა (73) და ტატო გრიგალაშვილს (81) არ გაუმართლათ, რადგან ჯგუფში ორივე ძლიერ იაპონელთან მოხვდა: ოლიმპიური ჩემპიონი - ოლიმპიურ და მსოფლიოს სამგზის ჩემპიონ შოჰეი ონოსთან, ხოლო გრიგალაშვილი - მსოფლიოს ჩემპიონ ტაკანორი ნაგასესთან. თუმცა შავდათუაშვილი ონოს მეოთხედფინალამდე არ ხვდება, გრიგალაშვილს იაპონელი მეორე წრეში ელოდება.

ყველაზე მეტი მონაწილე სწორედ 78 კილოგრამში გამოდის - 78 ძიუდოისტი! შავდათუაშვილი მეორე წრიდან დაიწყებს ჭიდაობას, იქ კი უსუსტესი მეტოქე ჰყავს - ბოტსვანელი ტირელო ლეკოკო. მაინცდამაინც ძლიერი არც მომდევნო ეტაპზე ეყოლება - უზბეკი შაკრამ ახმადოვის, ბურკინა ფასოელი ლუკას დიალოსა და მექსიკელი ედუარდო არაუხოს ტრიოდან უძლიერესი. მერვედფინალის სავარაუდო მეტოქეთა შორის მონღოლი ოდბაიარ განბაატარიცაა.

ფრიდონ გიგანი (73) პირველიწრეში ძიუდოს საერთაშორისო ფედერაციის დროშით მოჭიდავე (ამ უფლებას საკუთარი ქვეყნიდან დევნილებს აძლევენ) ფარეს ბადავის ხვდება, ვისაც კი უნდა მოუგოს, მერე კი მაროკოელი აჰმედ ელ მეზიატი ეყოლება - ის "ბედუინი", ვისაც პარიზში დებიუტანტმა ალეკო მამიაშვილმაც კი მოუგო (თუმცა მამიაშვილმა იქ საკმაოდ კარგად იასპარეზა).

გრიგალაშვილი პირველ წრეში ყატარელ მორად ზემოურის ხვდება და მასთან მოგების შემთხვევაში ელოდება ნაგასე. ამავე წონაში ევროპის ორგზის ფინალისტი ნუგზარ ტატალაშვილი პირველ წრეში ისვენებს, მეორეში კი რუს ასლან ლაპინაგოვს გაეჯიბრება. ამათში გამარჯვებული მერე იტალიელ კრისტიან პარლატისა და მოლდოველ დორინ კოტონოაგას დუეტიდან გასულს შეხვდება.

დანარჩენი სამი წონის - 90, 100 და მძიმე წონების წარმომადგენლები ზეგ გაითამაშებენ მედლებს.
სამწუხაროდ, 90 კილოგრამში ჩვენები ერთ ჯგუფში მოხვდნენ, თუმცა ერთმამნეთს მეოთხედფინალამდე არ ხვდებიან. თანაც ორივე მეორე წრიდან ჩაებმება შეჯიბრებაში.

ბექა ღვინიაშვილის (90) პირველი მეტოქე ყირგიზი ერლან შეროვისა და ეგვიპტელი ალი ჰაზემის დაპირისპირებაში გამოვლინდება. წესით, ღვინიაშვილის დონის ფალავანისთვის არც ერთი უნდა იყოს დიდი სირთულე, მერე კი ვისთან შეიძლება, მოუწიოს შეხვედრა? გერმანელ ედუარდ ტრიპელის, შვეიცარიელი კირილ გროსკლაუსისა და კენიელი ჯონ კირიმის სამეულიდან უძლიერესთან. ამათგან გერმანელთან რევანში აქვს ასაღები ორი წლის წინ მსოფლიოს ჩემპიონატზე მარცხისთვის, თუმცა მანამდე მას სამჯერ მოუგო.

კობა ბექაურის პირველი კონკურენტი ლატვიელ ალექსეის ზარუდნევსსა და მავრიტანიის კუნძულელ რემი ფუილეტს შორის გამარჯვებული იქნება. მსოფლიოს მასტერსის მომგებ ბექაურს მერვედფინალის სავარაუდო მეტოქეთა შორის ყაზახი ისლამ ბოზბაევი და უზბეკი დავლატ ბობონოვიც ჰყავს, თუმცა მასთან შეხვედრამდე იმათ ჯერ თითო პაექრობა უნდა მოიგონ, ხოლო თუ ამას შეძლებენ, მერე ერთმანეთში უნდა იჭიდაონ.
100 კილოგრამში დებიუტანტები გვეყოლებიან. ნიაზ დიასამიძე თავიდან კენიელ გეორგე კიმანის დაეჭიდება, ამათში მოგებულს კი აზერბაიჯანელთა მსოფლიოს მედალოსანი და ოლიმპიადის ფინალისტი ელმარ გასიმოვი ელოდება. ჯგუფის ამავე მხარესაა უხერხული რუსი ნიიაზ ბილალოვიც.

გიორგი ჩიქოვანიც პირველ წრეში იჭიდავებს - ყაზახ აიბეკ სერიკბაევთან, ამ წყვილის მოგებულს კი მერე შვედ იოახიმ დვარბისა და სერბ ბოიან დოსენს შორის უძლიერესი ხვდება.

დაბლოს, მძიმე წონა, სადაც საკმაო პაუზის შემდეგ ისევ იჭოდავებს მსოფლიოს, ევროპისა და მეორე ევროპული თამაშების გამარჯვებული გურამ თუშიშვილი. ის შეჯიბრებაში მეორე წრიდან ჩაებმება, სადაც უზბეკ ალიშერ იუსუპოვს შეხვდება, მომდევნო წრეში გასვლის შემთხვევაში კი ახალ მეტოქედ ტაჯიკი შაკარმამად მირმამადოვი, კარიბის ზღვის ეგზოტიკური კუნძულოვანი ქვეყნის - კურაკაოს წარმომადგენელი ივანლეა მარია ან აზერბაიჯანელთა მსოფლიოს ვიცე-ჩემპიონი უშანგი კოკაური ეყოლება. თუშიშვილის ჯგუფშია კორეელთა მსოფლიოს ბრინჯაოს პრიზიორი მინჯიონგ კიმი და კუბელი ანდი გრანდა. ასევე - ახალგაზრდა მონღოლი ცეცენცენგელ ოდხუუ.

ონისე ბუღაძე პირველ წრეში გერმანელ იონას შრაიბერს შეხვდება, ამათში მოგებულს კი კი მერე უზბეკი ბეკმუროდ ოლტიბოევი ელოდება.

5271
მკითხველის კომენტარები / 1 /
შეასწორეთ!!!
0
1. მავრიტანია აფრიკის კონტინენტზეა და არაა კუნძულოვანი სახელმწიფო
2. "დიდი სლემია" და არა "შლემი", ანუ მუზარადი
მსგავსი ამბები
რუბრიკის სხვა სიახლეები
;