ძიუდო: ცვლილება წესებში - ამიერიდან ორი ვაზარი ისევ იპონს გაუთანაბრდება

ძიუდო ახალ სეზონს ახალი წესებით ხვდება, თუმცა მათი უმეტესობა, სინამდვილეში, არცთუ ისე ძველის დაბრუნებაა. მაგალითად, ამიერიდან ორი ვაზარი ისევ იპონს გაუთანაბრდება და ორთაბრძოლა შეწყდება - ეს სიახლე სულ რაღაც ერთი წლის წინაც მოქმედებდა, მაგრამ მერე საექპერიმენტოდ შეცვალეს. 

არის სხვა სიახლეებიც: დამატებით დროში შიდო აღარ იქნება მომგებიანი შეფასება, არამედ შეხვედრა პირველ ილეთამდე გაგრძელდება. შიდოს მიღებისას ორთაბრძოლა მხოლოდ იმ შემთხვევაში შეწყდება, თუ ის რომელიმესთვის მესამეა - ასეთი სპორტსმენი მოიხსნება იმ კონკრეტული შეხვედრიდან, ხოლო თუ რეგლამენტით ეკუთვნის დამამშვიდებელ წრეში გადასვლა (ანუ არ წააგებს მეოთხედფინალამდე), იქ ჩვეულებრივად გააგრძელებს ბრინჯაოსთვის ბრძოლას.

იკრძალება დგომიდან მახრჩობელა ან მტკივნეული ილეთების გაკეთება. მეტიც - წამოწყებაც კი. ასეთ შემთხვევაში შემტევი დაისჯება გაფრთხილებით. იკრძალება ხელის გადატრიალებით, მკლავის ჩაკეტვით და ძალის გამოყენებით დგომიდან მეტოქის იძულებით გადაყვანა ქვეჭიდში. იკრძალება და ისჯება შეხტომით მტკივნეულის გაკეთება.

ასევე იკრძალება ქვეჭიდში მახრჩობელა ან მტკივნეული ილეთისას წამოდგომა და შეხვედრის დგომში გაგრძელება იმ მოტივით, რომ დგომში, პირვანდელი მდგომარეობისგან განსხვავებით, ტავის დაცვის საშუალება ნაკლებად აქვს, შესაბამისად კი იზრდება ტრავმის მიღების ალბათობა.

სამაგიეროდ, დასაშვებია ქვეჭიდიდან წამოდგომა და დგომში დინამიკაში ილეთის გაკეთება - ამიერიდან წამოდგომისას მსაჯი შეხვედრას მატეთი აღარ გააჩერებს.

ქვეჭიდში მტკივნეულის გაკეთებისას იკრძალება მეტოქის ფეხის გაჭიმვაც - ასეთ შემთხვევაში შეხვედრა გაჩერდება, შემტევი ძიუდოისტი კი მიიღებს გაფრთხილებას. ამ ვითარებაში დასაშვებია ხელის მოკიდება ფეხზე, ოღონდ მხოლოდ - მუხლის სახსარში, მუხლიდან კოჭამდე ხელის მოვლება კი ასევე დაისჯება. ფეხზე ნებისმიერი სახის მტკივნეული ზემოქმედებაც აკრძალულია.

ცვილებებია რამდენიმე ილეთის შეფასებაშიც. მაგალითად, კონტრილეთისას აქტიური ძიუდოისტი პირველად თვითონ თუ დაეცემა ზურგზე და შემდეგ გადააგდებს, ილეთი არ შეფასდება. შეუფასდება მხოლოდ იმ შემთხვევაში, თუ ვარდნისას ზურგზე არ დაეცემა. თუმცა განვმარტავთ, რომ ეს რეგულაციები ეხება მხოლოდ კონტრილეთს, ზურგის გამოყენებით შესრულებულ სხვა გდებებში კი არაფერი შეცვლილა.

დასჯადი ხდება ეგრეთ წოდებული "დათვის ჩავლებაც" ანუ მეტოქეზე მივარდნა და ხელების შემოხვევა, თუ ჩავლება არ აქვს აღებული - ამ შემთხვევაში შემტევი გაფრთხილებით დაისჯება, ამისგან თავის ასაცილებლად კი ჩავლება უნდა ჰქონდეს აღებული. ოღონდ საამისოდ ხელის მიდება საკმარისი არ იქნება, რეალური ჩავლება უნდა ჰქონდეს.

სამაგიეროდ, მისი აღებისთანავე ხელების შემოხვევა და გდების შესრულება დასაშვებია. სანაცვლოდ, მკაცრდება სასჯელი არატრადიციულ ჩავლებებზე (ცალმხრივი, ჯვარედინი, ქამრის, თითების სახელოში შეყოფა და ასე შემდეგ). ასევე მკაცრდება ამუნიციის კონტროლი - ამიერიდან სახელოებთან ერთად, კიმონოს სიგრძესაც გაზომავენ.

ხიდის შემთხვევაში, რაც ერთ-ერთი მთავარი საკამათო თემა იყო და ჩვენთვისაც ფრიად აქტუალური გახლდათ, თუ სპორტსმენი იპონის ასაცილებლად თავზე დგება და ერთი ან ორივე ფეხით ეყრდნობა სტატამს, მიიღებს გაფრთხილებას, შეხვედრა კი გაჩერდება.

გაცილებით მკაცრია სასჯელი, თავზეც თუ დატრიალდა და შეცვალა დაცემის კუთხე, რის გამოც ზურგის ნაცვლად დაეცა გვერდზე ან მუცელზე - შეხვედრა მაშინაც გაჩერდება და მეტოქეს იპონს მისცემენ, ოღონდ ეს სპორტსმენი საერთოდ მოიხსნება შეჯიბრებიდან.

ასევე განიხილეს წესები, რა შემთხვევაში დაისაჯოს მეტოქეზე მიწოლა და წრიდან გაყვანა, ფეხის არალეგალურად ჩახვევა და სხვა.

1258
მკითხველის კომენტარები / 1 /
ალმასხანი
0
რა ამბავია ამდენი ცვლილება და თან მერამდენედ?ძიუდოა თუ საქართველოს კონსტიტუცია?
მსგავსი ამბები
რუბრიკის სხვა სიახლეები
;