ძიუდო. სამი გაფრთხილება რუს აბდულზჰალილოვს და ბაგრატის ბრინჯაო

თურქეთში, ანთალიის გრანპრის პირველი დღე ორ წონით კატეგორიას დაეთმო - 60 და 66 კგ-ს. ქართველებმა ერთი მედლის მოპოვება მოვახერხეთ. ბრინჯაოს ბაგრატ ნინიაშვილი დაეუფლა, რომელმაც პირველ ეტაპზე თურქი ოზქანი დაამარცხა, მეორეზე ბრაზილიელი ჩიბანა.

1/4 ფინალში მისი მოწინააღმდეგე პორტუგალიელი კრისოსტომო იყო, რომელიც ქართველს ღირსეულ წინააღმდეგობას უწევდა, ილეთს არ აკეთებინებდა, თუმცა ბოლო წუთზე მაინც ვერ გაძლო და იპონზე აღმოჩნდა.

1/2 ფინალში ნინიაშვილს რუსი მიხაილ პულიაევი დაუპირისპირდა. ჩვენიანმა თავიდან ქულა აუღო, თუმცა რუსმა გათანაბრება მოახერხა და შეხვედრა დამატებითში გადავიდა. იქ კი ნინიაშვილს შანსი არ ჰქონდა. არა იმიტომ, რომ ემტოქემ კარგად იჭიდავა, უბრალოდ იმიტომ, რომ ბაგრატი დაიღალა და ვეღარ გაძლო. ეს კი სერიოზული საფიქრალია ქართველი მწვრთნელებისთვის. მაშინ, როცა მაღალ მიზნებს ისახავ, სპორტსმენები ისე უნდა იყვნენ მომზადებულები, რომ დამატებითში უშანსოდ არ მარცხდებოდნენ...

ზუსტად იგივე განმეორდა მესამე ადგილისთვის მატჩში, რომელშივ ნინიაშვილირუსეთის წარმომადგენელ აბდულა აბდულზჰალილოვს ხვდებოდა. ნინიაშვილმა მეტოქეს დამატებით დროში სძლია - აბდულზჰალილოვმა პასიურობისთვის სამი გაფრთხილება მიიღო.

ამავე წონაში, ამავე ეტაპზე (1/4 ფინალში) ბრძოლას გამოეთიშა ვანო მახათაძე, რომელმაც მოლდოველ დენის ვიეირუსთან ვერაფერი გააწყო.

60 კგ წონაში მედლებისთვის ბრძოლა ნაადრევად დავასრულეთ: ჯაბა პაპინაშვილი პირველივე ბრძოლაში დამარცხდა ტაივანელ იანგთან, ხოლო ირაკლი კუპატაძემ ჩეხ პულკრაბეკთს ვერაფერი დაუპირისპირა.

2080
მკითხველის კომენტარები / 0 /
მსგავსი ამბები
რუბრიკის სხვა სიახლეები
;