[ძიუდო] წაგება მოგებულ შეხვედრაში. აბუ დაბის უმედლო დასაწყისი

უცნაურად და გულდასაწყვეტად დაიწყო ჩვენთვის აბუ დაბის „გრანდ სლემი“ - შეხვედრის მოგების შემდეგ მოხსნილი ვაჟა მარგველაშვილი (66), ქალებში კვლავაც წაგებული რეპეშაჟის ფინალი, უმედლოდ დარჩენა, მეხუთეზე გასული ტატიანა ლევიცკა-შუკვანი (52) და ლიცენზიის მოპოვების გაზრდილი შანსი - ეს ყველაფერი აბუ დაბის პირველმა დღემ ჩაიტია. ვნახოთ, რას მოგვიტანს დღევანდელი დღე, როცა სტარტზე ოთხი ქართველი დადგება...

მარგველაშვილის მარცხი მოგებულ შეხვედრაში

ჯგუფში ვაჟა მარგველაშვილის ყველაზე საშიშ მეტოქედ კორეელთა მსოფლიოს ვიცე-ჩემპიონი ლიმვან კიმი მივიჩნიეთ, თუმცა ან კიმს ვინ აცალა გახარება, ან - მარგველაშვილს: კუბელთა აქამდე უცნობი ათლეტი ორლანდო პოლანკო არა მარტო ამ ჯგუფის, არამედ წონის ფავორიტებსაც მიდგა და ზედიზედ დაყარა კიმიც, მარგველაშვილიც, სხვებიც და საბოლოოდ ტურნირის მესამე პრიზიორიც გახდა.

კიმთან შეხვედრა უკვე დასრულებული იყო და ის-ის იყო, მარგველაშვილი მოპოვებული ვაზარის გამო მოგებულად უნდა გამოეცხადებინათ, როცა მაგიდის მსაჯმა არასწორი ჩავლებისთვის ქართველს მესამე შიდო მისცა და გამარჯვება კუბელს დარჩა. არადა, მარგველაშვილმა არცთუ ურიგოდ ჩაატარა ეს პაექრობა - ვაზარიც აუღო პოლანკოს და ბოლო 25 წამი ქვეჭიდში ჭიდაობაშიც გაატარა, რითაც წარმატებით მოიგო დრო. ოღონდ ეგ კია, როცა ორი გაფრთხილება გაქვს, ასმაგად ფრთხილად უნდა იყო, რომ იოტისოდენა საბაბიც არ მისცე მსაჯებს.

მანამდე მარგველაშვილმა წარმატებით ჩაატარა პაექრობა ირლანდიელ ნათან ბურნსთან და მოგვერდით ისე წამოიკიდა, ააბზრიალა საიპონედ, თუმცა საბოლოოდ მაინც უმედლოდ დარჩა. არადა, რეიტინგში უკვე სჭირდება ქულები სათავეში დასარჩენად, თორემ წლის ბოლოს გვარიანად დააკლდება.

 ტატიანას მორიგი ხუთეული  

ლევიცკა-შუკვანმა უკვე მეორე ტურნირზე დათმო ბრინჯაოსთვის შეხვედრა - ხორვატიაშიც მეხუთეზე გავიდა, მანამდე კი წლეულს კიდევ ორჯერ იყო მეშვიდე. თუმცა, უმედლოდ დარჩენის მიუხედავად, ის მაინც აგროვებს სარეიტინგო ქულებს და თანდათან უახლოვდება სალიცენზიო ზონას. წინა ტურნირის მსგავსად, მან ამჯერადაც 360 ქულით გაიმდიდრა მარაგი, შედეგად კი მის ანგარიშზე უკვე 1046 ქულაა და ცხრილში 44-ე ადგილზეა. თუმცა ეს საერთაშორისო რეიტინგის მონაცემებია, იქ კი მის წინ მასპინძელი იაპონიის რამდენიმე წარმომადგენელი (მოგეხსენებათ, ოლიმპიადის მასპინძლებს ლიცენზიები არ სჭირდებათ) და ეგრეთ წოდებული გაორებული ქვეყნების ბლომად წარმომადგენლები დგანან, მათგან კი სარეიტინგო ჩათვლაში მხოლოდ თითო სპორტსმენი შედის. სალიცენზიო რეიტინგში ის 33-ე ადგილზეა, თუმცა ამ სიასაც თუ გამოვაკლებთ იმავე იაპონელებს და ასევე იმ ქვეყნებსაც, რომლებიც ამ წუთისთვის შედიან სალიცენზიო 18-კაციან ზონაში, ის მე-20 ადგილზეა (ფაქტობრივად, ესაა სალიცენზიო ქვეყნები და არა კონკრეტული მონაწილეები), მას კი აზერბაიჯანი უსწრებს, რომელიც სადღეისოდ რეგიონული კვოტით ხვდება სალიცენზიო რეიტინგში. ცხადია, ლევიცკა-შუკვანსაც ასევე შეუძლია ბრძოლა რეგიონული კვოტისთვის, მით უფრო, რომ აზერბაიჯანელი გულთაი მამადალიევა 1 000 ქულითაც არ უსწრებს. ოღონდ, ცხადია, რეგიონული კვოტისთვის ბრძოლაში სხვა ქვეყნებიც არ უნდა გავუშვათ წინ.

აბუ დაბიში ლევიცკა-შუკვანი მეორე წრიდან ჩაერთო შეჯიბრებაში, სადაც მეტოქედ ვიეტნამელი თუი ნგუენი ჰყავდა, მისი დამარცხება კი არ გასჭირვებია. შემდეგ პოლონელ აგატა პერენჩსაც იპონით გაუსწორდა, ვისაც ორი ვაზარი აართვა. ამას მომავალ ფინალისტთან და წონის ერთ-ერთ ლიდერთან, იტალიელ ოდეტა გიფრიდასთან წმინდად წაგება მოჰყვა, დამამშვიდებელში კი ლევიცკა-შუკვანმა ჯერ რუსი ანასტასია პოლიკარპოვა ვაზარით დაამარცხა, მაგრამ ბრინჯაოსთვის პაექრობა დათმო ბრიტანელ ჩელსი გილესთან.

სამწუხაროდ, ამავე წონაში პირველივე წრეში წააგო მარიამ ჯანაშვილმა - უზბეკ დიორა კელდიოროვასთან. 

მომდევნო დღეებში იჭიდავებენ

დღესაც და ხვალაც აბუ დაბიში მონაწილენი მხოლოდ ვაჟებში გვეყოლებიან.

დღეს ვაჟებში 73 და 81 კილოგრამების ფალავნები იასპარეზებენ. წილისყრამ არ გაუმართლა დებიუტანტ გიორგი ჩიხელიძეს (73), ვისაც პირველივე წრეში მაინცდამაინც წონის ერთ-ერთი სოლიდური წარმომადგენელი, რუსთა მსოფლიოს წლევანდელი ბრინჯაოს მედალოსანი დენის იარცევი ერგო. ამავე წონაში ჩვენი მეორე მონაწილე ფრიდონ გიგანი პირველ წრეში სამოელ ვილიამ ტაი ტინს დაეჭიდება.

81 კილოგრამშიც ორი მონაწილე გვყავს და ორივე პირველივე წრიდან ჩაებმება ასპარეზობაში. ლუკა მაისურაძე ბელარუს იუსუპ ბეკმურზაევს დაეჭიდება. ზებედა რეხვიაშვილი თავიდან ავსტრალიელ ოუენ ქაგლანს ხვდება, ხოლო თუ მოუგებს, მერე პარიზის ტურნირის წლევანდელ გერმანელ ჩემპიონ დომინიკ რესელთან მოუწევს დაჭიდება.

ჩვენები ხვალ იასპარეზებენ - 90 და მძიმე, 100-ში კი მონაწილე არ გვეყოლება. 90-ში ჩვენებს დაახლოებით ერთნაირი ხვედრი არგუნა ფორტუნამ: გიორგი პაპუნაშვილიც და ავთანდილ ჭრიკიშვილიც მეორე წრიდან ჩაებმებიან შეჯიბრებაში, თუმცა ორივე ძალიან ძლიერ ჯგუფში მოხვდა და ორივეს უკვე მესამე წრეში ელოდებიან ფავორიტები.

ჭრიკიშვილის პირველ მეტოქეს ბრიტანელი ჯამალ პეტგრავესა და ჯონ იანეს პაექრობა გამოავლენს, პაპუნაშვილისას - ტუნისელი უსამა მაჰმუდ სნუსისა და ყირგიზი ფარუხ ბულეკულოვისა. ჭრიკიშვილი ჯგუფში კუბელთა მსოფლიოს ვიცე-ჩემპიონ ივან ფელიპე სილვა მორალესსა და კორეელთა მსოფლიოს ჩემპიონ დონჰან გვაკთან მოხვდა, პაპუნაშვილი - ესპანელთა ქართველ მსოფლიოს ჩემპიონ ნიკოლოზ შერაზადიშვილსა და რუსთა ევროპის ორგზის მესამე პრიზიორ ხუსეინ ხალმურზაევთან.

მძიმე წონაში ლევან მატიაშვილი ჭიდაობს და დიდად არც მას გაუმართლა, რადგან მეორე წრეში ჰოლანდიელთა მსოფლიოს წლევანდელი მესამე პრიზიორი როი მეიერი ელოდება, მანამდე კი თურქ ქემალ ერდოღანს უნდა შეხვდეს.

627
მკითხველის კომენტარები / 0 /
მსგავსი ამბები
რუბრიკის სხვა სიახლეები
;