ძიუდო. წილისყრამ იაპონელები შეგვახვედრა... რამდენი მედალი გვერგება რუსეთში?

გაიმართა ეკიტერინბურგში გასამართავი "დიდი მუზარადის" წილისყრა, რომელიც ხვალ აიღებს სტარტს. ხვალ ვაჟებში 60 და 66 კილოგრამების ფალავნები იჭიდავებენ, ზეგ - 73-81-სა, 90, 100 და მძიმე წონების წარმომადგენლებს კი კვირას კვირას დაეთმობათ რუსული ტატამი.

60 კგ.
ლუხუმ ჩხვიმიანი პირველივე წრეში ტაჯიკ დალერ ქურბონჯონოვს ხვდება, მოგების შემთხვევაში კი ჰონგკონგელ ჰიუ ფუნ ლეუნგსა და ბრაზილიელ პელიპე პელიმს შორის გამარჯვებულს დაეჭიდება. ამავე ჯგუფშია რუსთა მოქმედი ევროპის ჩემპიონი ისლამ იაშუევი, თუმცა მას ჩვენებური მეოთხედფინალამდე არ ხვდება.

საქართველოს ჩემპიონ თემურ ნოზაძეს მეორე წრეში საკმაოდ ძლიერი რუსი ალბერტ ოგუზოვი ელოდება, თუმცა იქამდე ყირგიზი დოოლოტბეკ ტაალაიბეკ უულუ უნდა დაამარცხოს.

66 კგ.
ბაგრატ ნინიაშვილიც პირველივე წრეში ჩაერთვება შეჯიბრებაში, სადაც ტაჯიკ დავლატალი ნაზარალიევს ხვდება, ამ წყვილის უძლიერესს კი მომდევნო მეტოქედ ბოსნიელი პეტარ ზადროსა და რუსი არამ გრიგორიანის დუეტის მოგებული ეყოლება.

73 კგ.
ოლიმპიური და ევროპის ჩემპიონი ლაშა შავდათუაშვილიც პირველივე წრიდან ჩაებმება შეჯიბრებაში - რუს ევგენი პროკოპჩუკს დაეჭიდება, ხოლო თუ მოუგებს, მერე მოლდოველ იონ ნაკუსთან ან ყაზახ მადიარ სემბაევთან მოუწევს პაექრობა. შავდათუაშვილი საკმაოდ ხელსაყრელ ჯგუფშია და, წესით, ნახევარფინალში გასვლა არ უნდა გაიჭირდეს, იქ კი სავარაუდო მეტოქეთა შორის რეიტინგში ყველაზე დაწინაურებული ებრაელი ტოჰარ ბუტბულია, თუმცა იმავე ჯგუფში ბერძენი გეორგიოს აზოიდისი და იტალიელთა ოლიმპიური ჩემპიონი ფაბიო ბასილეც არიან.

საქართველოს ვიცე-ჩემპიონი ვალერი იაშვილი პირველივე წრეში რუს გიორგი ელბაქიევს ხვდება, ამათში მოგებული კი მეორე ეტაპზე რუმინელ ალექსანდრუ რაიკუსა და მონღოლ ოტბაიარ განბაატარს გაეჯიბრება.

81 კგ.
წილისყრამ არ გაუმართლა ტატო გრიგალაშვილს - პირველ წრეში თავისუფალი კი გახლავთ, მაგრამ მეორეში იაპონელი ტაკანორი ნაგასე ხვდება. სასწაულს თუ ჩაიდენს და ამას გასცდება, მეორე შეხვედრაში სავარაუდო მეტოქეთა შორის ბელგიელი სამი ჩოუჩი ჰყავს, მეოთხედფინალში კი - რუსთა ოლიმპიური ჩემპიონი და მსოფლიოს მესამე პრიზიორი ხასან ხალმურზაევი.

შედარებით უკეთეს ბადეშია ლუკა მაისურაძე. ისიც მეორე წრიდან ჩაებმება შეჯიბრებაში, სადაც მოლდოველი კატალინ მარიანი ჰყავს დასამარცხებელი, რაც არ უნდა გაუჭირდეს, აი, მერე კი, დიდი ალათობით, ანგარიშგასაწევი მონღოლი უუგანბაატარ ოდგონბაატარი შეხვდება, ვინც მანამდე არცთუ ძლიერ მაროკოელ აშრაფ მოუტიის ხვდება. ამავე ჯგუფში შედიან ბელგიელი მატიას გასე და რუსი აბას აზიზოვიც, თუმცა ისინი მონღოლზე ნაკლებად საშიშები გვგონია.

90 კგ.
მსოფლიოს მესამე პრიზიორი უშანგი მარგიანი პირველ წრეში თავისუფალია, მისი მეტოქე რუსი ისმაილ ხამხოევისა და უზბეკი შახზოდბეკ საბიროვის პაექრობაში გამოვლინდება. ამ ბარიერის დაძლევით მარგიანი მეოთხედფინალში გავა, ასეთივე უფლებას კი ბადის ზედა მხარიდან ჰოლანდიელი ნოელ ვან ტ ენდის, ყირგიზი ერლან შეროვისა და გერმანელი დარიო გარსია კურბივაიტის სამეულიდან უძლიერესიც მიიღებს.

წილისყრამ არც ხანგრძლივი პაუზის შემდეგ ტატამზე დაბრუნებულ ევროპის პრიზიორს ბექა ღვინიაშვილს გაუმართლა - პირველივე წრეში იაპონელი გოკი ტაჯიმა არგუნა, ამათში მოგებულს კი მეორე ეტაპზე სერბთა მსოფლიოს ჩემპიონი ნემანია მაიდოვი ელოდება.

100 კგ.
ონისე სანებლიძეს არ აქვს ურიგო წილისყრა - პირველ შეხვედრას ბულგარელ დანიელ დიჩევთან ჩაატარებს, მოგების შემთხვევაში კი რუს მერაბ მარგიევსა და ლ.ატვიელ ევგენიუს ბოროდავკოს შორის უძლიერესს გაეპაექრება.

გიორგი ბერიაშვილიც პირველივე წრეში იჭიდავებს - ლიეტუველ კაროლის ბაუზასთან. ამ წყვილის გამარჯვებულს მეორე წრეში მონღოლთა მსოფლიოს მესამე პრიზიორ ოტგონბაატარ ლხაგვასურენსა და ყირგიზ კერიმ კაზატოვს შორის მოგებული შეხვედება.

+100 კგ.
წილისყრამ მაინცდამაინც არც ამ წონაში ჩვენი ერთადერთი მონაწილე, ახალგაზრდა გელა ზაალიშვილი დაინდო, რადგან პირველივე მეტოქედ იაპონელი ჰიოგა ოტა არგუნა, ხოლო მას თუ გასცდება, მერე ძლიერი ებრაელი, ევროპის ორგზის ფინალისტი და ოლიმპიადის მესამე პრიზიორი ორ სასონი ელოდება.

1630
მკითხველის კომენტარები / 0 /
მსგავსი ამბები
რუბრიკის სხვა სიახლეები
;