[ძიუდო] ჭაბუკები ევროპის თასზე... ვარშავა ჩაიშალა, სანაცვლოდ მარტში, რაბათში

29 თებერვალს ანტალიაში ჭაბუკ ძიუდოისტთა ევროპის თასი იწყება, რომელიც მეორე დღეს, 1 მარტს დამთავრდება. ტურნირში საქართველოს დელეგაცია ფრიად სოლიდური გუნდით იქნება წარმოდგენილი - ბიჭების ნაკრებიც გამოვა და - გოგოებისაც, მთლიანობაში კი, არც მეტი, არც ნაკლები, 65-მდე მონაწილე გვეყოლება. ამათგან 50 მონაწილე ბიჭებზე მოდის, გოგონები კი 15 სპორტსმენით იქნებიან წარმოდგენილნი.

ჩვენი დელეგაცია გუშინწინ ავტობუსით გაემგზავრა ანტალიაში, სადაც დღეს ჩავლენ და სასტუმროში დაბინავდებიან, ხვალ კი აწონვაა.

ბიჭების ნაკრების მთავარმა მწვრთნელმა გიორგი ყიზილაშვილმა ანტალიაში საქართველოს ჩემპიონატის ყველა მედალოსანი წაიყვანა, თუმცა სპორტსმენთა საკმაოდ დიდი ნაწილი თავისი ხარჯითაც გაემგზავრა. რაც შეეხება გოგონებს, მათ ასე დიდი არჩევანი არა აქვთ, თუმცა მწვრთნელებმა ყველა პერსპექტიული სპორტსმენი იახლეს.

ვარშავა ჩაიშალა

თებერვალ-მარტის მიჯნაზე ვარშავაში „ევროპის ღია კონტინენტური თასი“ იმართება როგორც ვაჟებში, ასევე - ქალებში. თავდაპირველად ჩვენი ფედერაცია იქ მეორე შეადგენლობის გაგზავნას გეგმავდა, თუმცა მოგვიანებით გადაწყვეტილება შეცვალა და პოლონური შეჯიბრება საერთოდ ამოიღო კალენდრიდან. მთავარი მიზეზი ისაა, რომ 4 მარტს თბილისში „მეორე დონის“ ჩემპიონატი იმართება ანუ ეგრეთ წოდებული წაგებულთა პირველობა. შეგახსენებთ, რომ მასში მხოლოდ ისინი მონაწილეობენ, რომლებიც საქართველოს ჩემპიონატზე უმედლოდ დარჩნენ. იქ გამარჯვებულებისთვის ეს მორიგი შანსია, მოხვდნენ ეროვნულ ნაკრებში და ამიტომ ჩემპიონებს ზაფხულში რომელიმე დიდ ტურნირზე გაუშვებენ. მოგეხსენებათ, 30 მაისს მთავრდება სალიცენზიო ტურნირები ანუ შეჯიბრებები კი გაიმართება, მაგრამ იქ სალიცენზიო ქულები აღარ გაიცემა. „მეორე დონის“ ჩემპიოინებსაც ნაკრების წევრობის სხვა კანდიდატებთან ერთად რომელიმე ასეთ შეჯიბრებაზე გაუშვებენ. მაგალითად, 12-14 ივნისს ბუდაპეშტში „დიდი პრიზი“ იმართება და, შეიძლება, იქ გაუშვან.

რაც შეეხებათ იმ სათადარიგოებს, რომლებსაც ხვალიდან ვარშავაში უნდა ეჭიდავათ, სანაცვლოდ ისინი 6-8 მარტს მაროკოულ რაბათში გამოვლენ „დიდ პრიზზე“. ჩვენი ნაკრები იქ სრულად დაკომპლექტებული შემადგენლობით კი გამოვა ანუ 14 მონაწილე გვეყოლება - ყველა წონაში ორ-ორი ფალავანი, თუმცა გადახალისებული გუნდი გვეყოლება - ლიდერთა ნაწილი არ იჭიდავებს. მაროკოში უკვე ცნობილ ძიუდოისტებთან ერთად ახალგაზრდებიც გამოვლენ - საქართველოს შარშანდელი პირველობის მედალოსნები. გთავაზობთ მათ შემადგენლობას:

60 კგ: ჯაბა პაპინაშვილი, შაქრო შათირიშვილი

66 კგ: გიორგი თუთაშვილი, გიორგი ბაზანდარაშვილი

73 კგ: ლაშა შავდათუაშვილი, ფრიდონ გიგანი

81 კგ: გიორგი კაციაშვილი, გიგა გიგაური

90 კგ: ლაშა ბექაური, უშანგი მარგიანი

100 კგ: ილია სულამანიძე, ონისე სანებლიძე

+100 კგ: გელა ზაალიშვილი, საბა ინანეიშვილი

ჭრიკიშვილი ეკატერინბურგში

მაროკოს ტურნირიდან ერთი კვირის თავზე - 13-15 მარტს რუსული ეკატერინბურგი „დიდ მუზარადს“ უმასპინძლებს. იქ საქართველოს ნაკრები არ გამოვა, თუმცა ერთი მონაწილე მაინც გვეყოლება - ევროპის სამგზისა და მსოფლიოს ჩემპიონი ავთანდილ ჭრიკიშვილი იჭიდავებს (90). ამასთან, ერთობლივ შეკრებაზე გაემგზავრება მსოფლიოს, ევროპისა და ევროპული თამაშების ჩემპიონი გურამ თუშიშვილი (+100).

909
მკითხველის კომენტარები / 0 /
მსგავსი ამბები
რუბრიკის სხვა სიახლეები
;