ძიუდო. ჭრიკიშვილისა და თუშიშვილის ოქროები ხორვატიიდან

საქართველოს ვაჟ ძიუდოისტთა ნაკრებმა მაჟორულ ნოტაზე დაასრულა უღიმღამოდ დაწყებული ზაგრების `დიდი პრიზი~ და კრახით ჩატარებული ორი დღის შემდეგ დღეს, ტურნირის დასკვნით მონაკვეთში სამივე წონაში თითო მედალი მოიპოვა. მათ შორის - ორი ოქროსი და ერთიც - ბრინჯაოსი. ჩემპიონები ავთანდილ ჭრიკიშვილი (90) და გურამ თუშიშვილი (+100) გახდნენ, მესამეზე კი ლაშა ტაველური (100) გავიდა.

მსოფლიოს ჩემპიონმა, ევროპის სამგზის ტრიუმფატორმა ჭრიკიშვილმა ფინალურ შერკინებაში საწყის ნახევარ წუთში ჯერ ორჯერ გააფრთხიოპებინა კუბელთა მსოფლიოს ექს-ჩემპიონი ეშლი გონსალესი, მალევე კი ვაზარზეც ჩინებულად დააგდო და უპირატესობა ბოლომდე წარმატებით შეინარჩუნა. თუშიშვილმა წუთნახევრში იზეიმა გამარჯვება ძლიერ ებრაელთან, ევროპული თამაშების ფინალისტ ორ სასონთან, როცა მშვენივრად შეირგო მისი საჩუქარი: ებრაელმა კისრულზე დაუპირა წამოკიდება, მაგრამ ესეც მომზადებული დაუხვდა, წელში შესვლა დროულად მოასწრო, მერე კი მარცხენა ფეხიც ეფექტურად გამოჰკრა გარედან და სასონი ტომარასავით დააგდო ტატამზე.

ჭრიკიშვილმა გონსალესს რევანშიც აუღო გიორგი პაპუნაშვილთან მოგებისთვის, ქვეჯგუფში კი ჯერ ვაზარით დაამარცხა შვეიცარიელი კირილ გროსკლაუსი, მერე წმინდად მოუგო არაბული საემიროების ოლიმპიურ და მსოფლიოს მესამე პრიზიორს, ევროპის ფინალისტ (ის წარმოშობით მოლდოველია) სერგიუ ტომას და ჩეხ დავიდ კლამერტს, მეოთხედფინალში ვაზარით ჩამოიშორა ბრიტანელი მაქს სტიუარტი, ნახევარფინალში კი იმავე სხვაობით ფრანგ ევროპის ვიცე-ჩემპიონ აქსელ კლერჟეს აჯობა.

თუშიშვილმა ფინალი ხომ საკმაოდ იოლად მოიგო, არც იქამდე მისასვლელად დადგომია დიდი ჯაფა და სამივე პაექრობა წმინდად მოიგო: ჩილელ ფრანსისკო სოლისთან, უზბეკ ბეკმუროდ ოლტიბოევთან და აზერბაიჯანის სახელით მოჭიდავე უშანგი კოკაურთან. თან სამივეს გდებით მოუგო და არა გაფრთხილებით. ამასთან, ჩილელს იპონამდე კიდევ ერთი ქულა აართვა, თუმცა უზბეკთან თვითონაც გაუშვა ილეთი. ნახევარფინალში ჩვენებურმა ვაზარით დაამარცხა უკრაინელი იაკივ ხამო და მერე სასონიც ზედ დააყოლა ჩაროზად.

ლაშა ტაველურმა დამამშვიდებლის ფინალში გვარიანად იბრძოლა აზერბაიჯანელთა მსოფლიოს ექს-ჩემპიონ ელხან მამადოვთან - თვითონაც შეუქმნა ხიფათი, მაგრამ თავადაც გადაურჩა გდებას, ბოლოს კი შებოჭა და წმინდა გამარჯვებით დაასრულა ტურნირი.

ის მეოთხედფინალში ჩვენი ძიუდოისტებისთვის უკვე გადაულახავ ბარიერად ქცეულ ახალგაზრდა რუსთან, ნიიაზ ილიასოვთან დამარცხდა, მანამდე კი სლოვაკი მატეი ჰაიასი და ჰოლანდიელი სიმეონ კატარინა დააიპონა. დამამშვიდებელშიც ასევე წინდად მოუგო ბელარუს დანიელ მუკეტეს.

პაპუნაშვილის გარდა, უმედლოდ გიორგი ქავთარაძეც (+100) დაგვირჩა - მოლოდინისამებრ, ამერიკელ აიაქს ტადეჰარას კი აჯობა, მაგრამ ჰოლანდიელ ხურ სპიიკერსთან წააგო.

2671
მკითხველის კომენტარები / 0 /
მსგავსი ამბები
რუბრიკის სხვა სიახლეები