წავა თუ დარჩება მბაპე ? - 'ვფიქრობ, მოვიდა იმის დრო, რომ უფრო მეტი ავიღო საკუთარ თავზე'

...პარიზში ხალხმრავლობა იყო. აჯილდოებდნენ საფრანგეთის ჩემპიონატში გამორჩეულებს. ცერემონიალი დააფასეს არსენ ვენგერმა, დიდიე დროგბამ, ტიერი ანრიმ და სხვა ვარსკვლავებმა. საღამოს მთავარი გმირი კი კილიამ მბაპე გახდა...

...მან ორი პრიზი მოიგო - გახდა სეზონის საუკეთესო ფეხბურთელი და “იმედისთვის” განკუთვნილი ჯილდოს ლაურეატი, რომელიც საფრანგეთის ჩემპიონატის საუკეთესო ახალგაზრდა ფეხბურთელის დაფასებას გულისხმობს.

რატომ უნდა დაჯილდოვდეს ორი ჯილდოთი ერთი, თუნდაც შესანიშნავი ფეხბურთელი, ეს უკვე რიტორიკული კითხვაა. სამაგიეროდ, შეგვიძლია შემოგთავაზოთ კილიან მბაპეს მიერ წარმოთქმული სიტყვა, რომელიც ძალიან ბევრს დეტალს ჰფენს ნათელს:

“მადლობელი ვარ ბედის, რომ ასეთი პრესტიჟული ჯილდო მერგო და საუკეთესო ფეხბურთელი გავხდი. მინდა დიდი მადლობა გადავუხადო კლუბის პრეზიდენტ ნასერ ალ ხელაიფის. ის მუდამ ჩვენთან იყო. ასევე მადლობა კლუბის ხელმძღვანელებს, სამწვრთნელო შტაბს, მთავარ მწვრთნელს, ჩემს პარტნიორებს...

მინდა შევაფასო სეზონი. რა თქმა უნდა, იყო მომენტები, როცა ჩვენ იმედგაცრუებულები ვიყავით, მაგრამ ჩემპიონები გავხდით და ამან ძალიან ბევრი რამის კომპენსირება მოახდინა.

რაც შემეხება მე, ვფიქრობ მოვიდა იმის დრო, რომ უფრო მეტი ავიღო საკუთარ თავზე. მიმაჩნია, რომ ეს შემიძლია. ასევე, შემიძლია იმის თქმაც, რომ ჩემს კარიერაში საკვანძო მომენტი ახლოვდება”, - თქვა მბაპემ და სცენა დატოვა.

ჟურნალისტებმა მისი სიტყვები არაერთმნიშვნელოვნად გაიგეს. ხომ არ იყო ეს გუნდიდან წასვლაზე მინიშნება. როცა ჟურნალისტებმა კილიანი კიდევ ერთხელ შეაწუხეს, მან სთქვა: “მე მესიჯი გავგზავნე. ვფიქრობ, ეს იყო საყურადღებო მესიჯი. დანარჩენი მომავლის საქმეა და ახლა მეტს ვერაფერს ვიტყვი”, - თქვა მბაპემ.

ამაზე სასწრაფო რეაგირება მოახდინა “პარი სენ ჟერმენმა”. კლუბმა გაავრცელა ოფიციალური განცხადება, რომელშიც ეწერა: “ჩვენ ორი წლის განმავლობაში ძალიან ახლო და მეგობრული ურთიერთობა ჩამოგვიყალიბდა კილიან მბაპესთან. მომავალ სეზონში ეს ურთიერთობა გაგრძელდება. ჩვენ გვაქვს ერთი სანუკვარი მიზანი - 2020 წელს “პარი სენ-ჟერმენის” დაარსებიდან 50 წლის იუბილეა და ყველა მაქსიმალურად ვეცდებით, ეს იუბილე ევროპულ არენაზე წარმატებით აღინიშნოს”.

გასაგებია, რა უნდა “პარი სენ ჟერმენს”, უფრო სწორად - რა არ უნდა. დიახ, ფრანგულ გრანდს არ უნდა მბაპეს გაშვება. მაგრამ რა უნდა თავად მბაპეს? მან კომენტარში და სხვა ინტერვიუებშიც ორაზროვნად მიანიშნა, რომ კარიერაში ცვლილებები სურს. როგორც ექსპერტები ვარაუდობენ, ამის მიზეზი მხოლოდ ერთია - კილიანს სურს, მეტი გავლენა ჰქონდეს თამაშის დროს მიმდინარე პროცესებზე.

ანუ, მას პირველკაცობა სურს. არადა, “პარი სენ-ჟერმენის” გერმანელი მწვრთნელი თომას ტუხელი თავისი გაწვრთნილი გუნდის მთავარ ვარსკვლავად არა მბაპეს, არამედ ნეიმარს მიიჩნევს და ეს ფრანგი ვარსკვლავის გულისწყრომას იწვევს.

როცა “პარი სენ-ჟერმენმა” მბაპე “მონაკოდან” გადაიბირა, მისი შეძენა მაშინ “რეალს” სურდა. მაგრამ უნიჭიერესი თინეიჯერი პარიზში გადავიდა და ორი აზრი არ არის - ყველაფერი დიდმა ფულმა გადაწყვიტა. რა იქნება ახლა? ცნობილია, რომ მბაპე ბავშვობიდან “რეალის” გულმხურვალე გულშემატკივარია.
მისი საქციელით გაოცებულები არიან თანაგუნდელები. ისინი ხშირად განიხილავენ კილიანის საქციელის მოტივაციას და მიდიან იმ დასკვნამდე, რომ მას რაღაც მეტი უნდა. რა არის ეს “მეტი”, ამაზე მხოლოდ ვარაუდია შესაძლებელი. გუნდის კაპიტნობა ხომ არა?

მბაპე მკაცრად გააკრიტიკა საფრანგეთის ეროვნული ნაკრების ყოფილმა შემტევმა, მსოფლიოს 1998 წლის ჩემპიონატის მომგებმა კრისტოფ დუგარიმ:
“არ მესმის, როცა მბაპე ამბობს, რომ მეტი პასუხისმგებლობა უნდა, რას ნიშნავს ეს? ყველას კარგად გვახსოვს საბედისწერო მატჩი “მანჩესტერ იუნაიტედთან”. სად იყო მაშინ მბაპე? მგონი, ის მინდორზე იყო და არავინ უშლიდა ხელს, მეტი აეღო საკუთარ თავზე. კი, მას ინდივიდუალური ხაზით დიდებული სეზონი ჰქონდა, მაგრამ - მხოლოდ ინდივიდუალური თვალსაზრისით”, - ამბობს დუგარი.

მბაპეს გამოსვლას მკაცრი შეფასება მისცა “პარი სენ-ჟერმენის” ყოფილმა ფეხბურთელმა ვიკაშ დორასომაც: “ეს იყო დიდებული, საზეიმო მომენტი და არა მგონია, ეს მომენტი მბაპეს ასე უნდა გამოეყენებინა. მან ირიბად დაწოლა მოახდინა კლუბის ხელმძღვანელობაზე. ეს ძალიან ცუდია. ცუდია, როცა ზეიმს ასეთი რამეები აფუჭებს”, - თქვა დორასომ.

ამასობაში მადრიდის “რეალი” კბილებს ილესავს. ზინედინ ზიდანს საფრანგეთში უდიდესი ავტორიტეტი აქვს და ის დიდი ავტორიტეტია მბაპესთვისაც. კილიანის ბავშვობის სიყვარულზე უკვე ვილაპარაკეთ...

ასე რომ, მბაპეს ტრანსფერი “რეალში” უფრო და უფრო რეალური ხდება. ფაქტია ისიც, რომ “სამეფო კლუბი” ფულს არ დაიშურებს იმისთვის, რომ რაც შეიძლება მალე დაივიწყოს ახლახან დასრულებული კოშმარული სეზონი. ეს კი მხოლოდ კარგი ტრანსფერების განხორციელების შემთხვევაში იქნება შესაძლებელი.

ყოველდღიური სპორტული გაზეთი "ლელო"
747
მკითხველის კომენტარები / 0 /
მსგავსი ამბები
რუბრიკის სხვა სიახლეები
;