წერო

ავსტრალიის ღია პირველობა 102-ე წელია იმართება. მას უამრავი ლამაზი გამარჯვება და წარმატებული ჩემპიონი ახსოვს. უკრაინულმა გამოცემა "იქსსპორტმა" კი ყველაზე დასამახსოვრებელი არასპორტული ამბები ამოკრიბა და ერთ პუბლიკაციად გააერთიანა.

ყველაფერი ბალახით დაიწყო
პირველ შეჯიბრებას "ავსტრალაზიის ჩემპიონატი" ერქვა. იგი 1905 წელს გაიმართა. ეს იყო პირველი შემთხვევა, როცა ჩოგბურთელებმა ბალახზე ითამაშეს. სხვათა შორის, 1988 წლამდე მელბურნში სწორედ ბალახის საფარი იყო, ვიდრე იგი ჰარდით არ შეცვალეს.
ერთადერთი ჩოგბურთელი, რომელსაც მელბურნში ბალახზეც მოუგია და ჰარდზეც შვედი მატს ვილანდერია, რომელიც, ახლა "ევროსპორტის" ექსპერტად მუშაობს.



ბელგიელი ვიქტორია აზარენკა
2013 წელი ვიქტორია აზარენკასთვის იდეალურად დაიწყო - ავსტრალიის ღია პირველობის ფინალში ნა ლი დაამარცხა.
თუმცა საჩემპიონო თასზე ბელარუსის ნაცვლად ბელგია ეწერა. ლათინურად აბრევიატურა BEL ბელგიას ნიშნავს, უნდა ყოფილიყო - BLR.

კორდას დოპინგი
1998 წელს ჩეხმა პეტრ კორდამ მელბურნში კი გაიმარჯვა, მაგრამ სამიოდე თვეში მას ტიტული ჩამოართვეს, რადგან სისხლში დოპინგი აღმოუჩინეს.
თუმცა ეს ჯილდო ფინალისტ მარსელო რიოსს არ გადასცეს.

ბუნტი კორტებზე
2013 წელს ინდოელ სომდე ვარმანთან მატჩისას პოლონელი ჩოგბურთელი ეჟი იანოვიჩი აგრესიულად იქცეოდა, იფურთხებოდა და მსაჯებს უყვიროდა - უსამართლობა რამდენ ხანს უნდა გაგრძელდესო.
გადარეული იანოვიჩის ვიდეო "იუთუბზე" ძალიან პოპულარული სანახავი იყო - 2 მილიონზე მეტი მნახველი ჰყავდა.
მან ინდოელთან მაინც მოიგო, თუმცა 2.5 ათას დოლარის ჯარიმასაც გამოჰკრა ხელი.

სკანდალი დაწყებამდე
2016 წელს გამოცემა BBC-მ სკანდალური ინფორმაცია გაავრცელა. ითქვა, რომ მათ ჰქონდათ დოკუმენტები, რომლებიც ტოპ-50-ეულის ჩოგბურთელებს გარიგებულ მატჩებში ამხელენ. ამ ამბავს კონკრეტული გვარების გამოცხადება არ მოჰყოლია და აჟიოტაჟიც მალევე ჩაცხრა.

გულწასული
როდესაც ჩრდილოეთ ნახევარსფეროში ზაფხულია, სამხრეთში - ზამთარია და პირიქით... ჰოდა, ავსტრალიის ღია პირველობა ყოველთვის დიდ სიცხეში იმართება და ბევრი გულწასულიც გვინახავს. მათ შორის კანადელი ფრანკ დანჩევიჩი, რომელიც 2014 წელს ცუდად გახდა და მოგვიანებით ავსტრალიურ პირობებს "არაადამიანური" უწოდა.
1997 წლის 21 იანვარს ტემპერატურა 60 გრადუსამდე ავიდა, რის გამოც, მთავარმა არბიტრმა პიტერ ბელენჯერმა ნება დართო ტურნირის ისტორიაში პირველად კორტი მოძრავი სახურავით გადაეხურათ.

დაუპატიჟებელი სტუმარი
ავსტრალიის 2016 წლის ღია პირველობის ერთ-ერთ მთავარ გმირად წერო იქცა. იგი დანიელ მუნიოსისა და ვიქტორ ტროიცკის შორის მატჩისას დაეშვა კორტზე.
ფრინველი ერთ გეიმს თავიდან ბოლომდე დაესწრო, შემდეგ კი გაურკვეველი მიმართულებით გაფრინდა და თან აუდიტორიის აპლოდისმენტები გაიყოლა.

ავსტრალიური დრესკოდი
2009 წელს ავსტრალიური შეჯიბრების ორგანიზატორებმა დააწესეს ჯარიმა: ზედმეტად მოკლე კაბის ჩაცმის შემთხვევაში 2 000 დოლარი.
ასეთი გადაწყვეტილება იმიტომ მიიღეს, რომ ჰოფმანის თასზე ფრანგი ალიზ კორნე ძალიან მოკლე კაბით გამოცხადდა.



ჩხუბი
სერბი ნოვაკ ჯოკოვიჩისა და ბოსნიელი ამერ დელიჩის მატჩის შემდეგ, კორტების მიღმა გულშემატკივრები ჯერ შელაპარაკდნენ, შემდეგ ჩხუბზე გადავიდნენ...
ისინიც დააჯარიმეს.

დაველოდოთ წლევანდელი Australian Open-ის ჰაილაითებს...

721
მკითხველის კომენტარები / 0 /
მსგავსი ამბები
რუბრიკის სხვა სიახლეები