დღეს დუბლინში! ვისი ან რისი იმედი უნდა გვქონდეს?

ირლანდია-საქართველო. 26 მარტი. დუბლინი. ავივა. 23:45 (LIVE I არხზე)


საქართველოს ნაკრები ევროპის ჩემპიონატის შესარჩევი ციკლის მეორე ტურში ირლანდიასთან სტუმრად ითამაშებს. ჩვენი გუნდისთვის ამ მატჩს უდიდესი პრაქტიკული მნიშვნელობა აქვს: თუ გვინდა, რომ ამ შესარჩევ ციკლში რაიმეზე პრეტენზია გვქონდეს, მინიმუმ არ უნდა წავაგოთ, თუმცა მოგებაზე ფიქრიც სავსებით შესაძლებელია...

ჯანოს და ჯიმის გარეშე

თავიდანვე შევთანხმდეთ: რაც შეიძლება, მალე უნდა დავივიწყოთ შვეიცარიასთან თბილისური მატჩი - თამაში, რომელშიც საქართველოს ნაკრების გარჯა ყველაფერს ჰგავდა, ფეხბურთის გარდა.

ახლა არც იმ შეცდომებზე გავამახვილებთ ყურადღებას, ვლადიმირ ვაისმა და ფეხბურთელებმა რომ დაუშვეს - ეს სულ სხვა წერილის თემაა და ეს წერილი უსათუოდ დაიწერება მას შემდეგ, რაც ირლანდიასთან მატჩი ჩათავდება.

საქართველოს ნაკრებს, თითქოს გიორგი ჩაკვეტაძისა და კიდევ რამდენიმე ფეხბურთელის ტრავმა არ ეყოფოდა, ქვა აღმართში დაეწია - დუბლინში ჯიმი ტაბიძე და ჯანო ანანიძე დაგვაკლდებიან.

უნდა ვივარაუდოთ, რომ ჯანოს ოთარ კიტეიშვილი შეცვლის. მას სისტემატური სათამაშო პრაქტიკა აქვს "შტურმში". რაც შეეხება ტაბიძეს, ჩვენი ვარაუდით, ოფიციალურ შეხვედრაში დებიუტი ექნება შვეიცარიული "ციურიხის" მარცხენაფლანგელ ლევან ხარაბაძეს.

რას გვიმზადებს ვაისი?

ვფიქრობთ, ვაისი შვეიცარიასთან შეხვედრის შემდეგ მიხვდა, რომ სიურპრიზების დროა. მით უმეტეს, ამ შესარჩევ ციკლში წნეხი არ გვახრჩობს, ერთა ლიგის ნახევარფინალში ვართ, საიდანაც ევროპის ჩემპიონატამდე ორი ნაბიჯიღა გვაშორებს.

გასაგებია, რომ თორნიკე ოქრიაშვილი ბოლომდე მზად არ არის, მაგრამ ჩვენი აზრით, თუნდაც ნახევარი საათით მინდორზე გასულს, შეუძლია, უამრავი პრობლემა შეუქმნას ირლანდიის ნაკრებს.

ძალიან გვინდა, სანაკრებო ფორმაში ვნახოთ ვატო არველაძე, ვინც მართლაც რომ შესანიშნავ ფორმაშია. მისი ტექნიკური თამაშის მანერა, შეიძლება, სიურპრიზი იყოს ირლანდიელი მცველებისთვის. მით უმეტეს, ირლანდიელებმა ვატოს შესახებ თითქმის არაფერი იციან.

მაკარტი: მძულს თითოეული წუთი!

ირლანდიის ნაკრების შესახებ ჩვენი წერილი სხვა ქვეთავებში უფრო დაწვრილებით ვისაუბრებთ. მანამდე კი გავეცნოთ მიკ მაკარტის კომენტარს, რომელიც მან გიბრალტართან შეხვედრის შემდეგ გააკეთა. "ჯუჯებთან" ირლანდიამ მართლაც რომ საშინლად ითამაშა და გაჭირვებით მოიგო. გიბრალტარს რამდენიმე კარგი მომენტი ჰქონდა. მაკარტი კი გაცეცხლებული გახლდათ:

"რა თქმა უნდა, ქართველებმა ნახეს გიბრალტართან ჩვენი მატჩი. იმ შეხვედრაში საშინლად ვითამაშეთ. უნდა გითხრათ, რომ იმ მატჩის თითოეული წუთი მძულს. ქართველებს ალბათ იმედი აქვთ, რომ ასე მოთამაშე ირლანდიასთან იოლად მოიგებენ, მაგრამ ჩვენ ყველას ვპირდებით, რომ საქართველოსთან შეხვედრაში უკეთეს ირლანდიას იხილავთ".

ბრიტანული მედია ვარაუდობს, რომ მაკარტი საქართველოსთან შეხვედრისთვის რამდენიმე ცვლილებას განახორციელებს "სამყურათა" ძირითად შემადგენლობაში.

ნავსი გასატეხია!

"სამყურებთან" თამაშები ჩვენთვის კარგად გასახსენებელი ნამდვილად არ არის და მკითხველი ამას დაწვრილებით სხვა წერილში წაიკითხავს. აქ კი მხოლოდ ის ვთქვათ, რომ "სამყურებმა" თითქმის ყველგან მოგვიგეს, სადაც კი ვეთამაშეთ. გამონაკლისი ოდენ ბოლო დაპირისპირებაა, რომელიც თბილისში 1:1 დასრულდა.

ირლანდიის ნაკრები ვერ მოხვდა რუსულ მუნდიალზე, სექტემბერში გუნდი ჩაება ერთა ლიგის გათამაშებაში. ზეგამოცდილი მარტინ ო'ნილის (რომელიც 2013-18 წლებში წვრთნიდა ირლანდიის ნაკრებს ) შეგირდებს ძალიან ცუდი სტარტი გამოუვიდათ - სტუმრად 1:4 წააგეს უელსთან.

ამ შეხვედრაში კუნძულელთა დაცვაში მართლაც რომ საშინელებები ხდებოდა. ტომ ლოურენსმა, გარეთ ბეილმა, აარონ რემზიმ და კონორ რობერტსმა ოთხჯერ გაუტანეს ირლანდიას. პრესტიჟის გოლი შონ უილიამსმა შეაგდო.

ამის შემდეგ იყო უგოლო მატჩი დანიასთან. მართალია, სტუმრები დიდ სათამაშო უპირატესობას ფლობდნენ, მაგრამ გატანა ვერ მოახერხეს და მასპინძლებმა ქულა აშკარად იღბლის წყალობით მოიპოვეს.

ამას მოჰყვა დუბლინური მატჩი იმავე უელსთან, რომელიც ჰარი უილსონის ერთადერთი გოლის წყალობით კვლავ უელსმა მოიგო. ირლანდიამ ბევრი კი იბრძოლა, მაგრამ მეტოქეს პასუხი ვერ გასცა.

ბოლოს კი იყო კიდევ ერთი უგოლო ფრე იმავე დანიასთან. ირლანდიამ ჯგუფში ბოლო ადგილი დაიკავა და ერთა ლიგის C დივიზიონში დაქვეითდა, სადაც მომავალ გათამაშებაში საქართველოს ნაკრების ერთ-ერთი პოტენციური მეტოქე გახლავთ.

ვინ არის მიკ მაკარტი?

ნოემბერში ირლანდიის ნაკრებს ო'ნილზე არანაკლებ გამოცდილი, 59 წლის მიკ მაკარტი ჩაუდგა სათავეში. მაკარტი თავის დროზე კარგი მცველი იყო. სხვადასხვა დროს იცავდა "ბარნსლის", "მანჩესტერ სიტის", "სელტიკის", "ლიონისა" და "მილუოლის" ღირსებას. 1984-92 წლებში იყო ირლანდიის ნაკრების წევრი და ამ გუნდის შემადგენლობაში 57 მატჩიც (2 გოლი) ჩაატარა.

"სამყურების" მწვრთნელად ის უკვე მუშაობდა 1996-2002 წლებში (68 მატჩი, 29 მოგება, 20 ფრე, 19 წაგება). ის ზუსტად იმ შესარჩევის წინ გაათავისუფლეს, როცა ირლანდია საქართველოსთან ერთად მოხვდა ევრო 2004-ის საკვალიფიკაციო ეტაპზე - შვეიცარიასთან, რუსეთსა და ალბანეთთან ერთად. ამას გარდა, მან იმუშავა "მილუოლში", "სანდერლენდში", "ვულვზსა" და "იფსვიჩში".

ირლანდია კრიზისშია?

ირლანდიის ნაკრებში ახლა თაობათა ცვლის პროცესი მიდის. ფაქტია, გუნდი ვეღარ არის ისეთი ძლიერი, როგორიც იყო ადრე. აღარ არის რობი კინი და კიდევ რამდენიმე გამოცდილი ფეხბურთელი.

ასეა, ადრე თუ გვიან ყველა გუნდი რჩება ლიდერის გარეშე, მაგრამ მოდიან ახალი ლიდერები. იცვლება ბირთვი... ეს ჩვეულებრივი პროცესია. ირლანდიის ნაკრები მაინც სავსეა ინგლისურ პრემიერლიგასა და ჩემპიონშიფში გამობრძმედილი ფეხბურთელებით.

გუნდის ლიდერად ახლა "ევერტონის" ფლანგელი მცველი სიმუს კოულმენი ითვლება. მისი სატრანსფერო ღირებულება 12 მილიონი ევროა.

10 მილიონი ღირს "ბარნლის" ნახევარმცველი რობი ბრეიდი, ისევე, როგორც იმავე "ბარნლის" კიდევ ერთი შუახაზელი ჯეფ ჰენდრიკი.

ვფიქრობთ, საქართველოს ნაკრებს დუბლინში  შეუძლია გამარჯვება. დანარჩენს უშუალოდ მინდორზე ვნახავთ.

ირლანდია


მეკარეები - დარენ რენდოლფი (მიდლსბრო, ინგლისი), კაირენ ვუსტვუდი (შეფილდ უენსდი, ინგლისი), მარკ ტრავერსი (ბორნმუთი);
მცველები - სიმუს კოელმენი (ევერტონი, ინგლისი), მეტ დოჰერტი (ვულვზი, ინგლისი), რიჩარდ კეო (დერბი, ინგლისი), ჯონ იგანი (შეფილდ იუნაიტედი, ინგლისი), შეინ დაფი (ბრაიტონი, ინგლისი), ენდა სტივენსი (შეფილდ იუნაიტედი, ინგლისი);
ნახევარმცველები - ალან ჯაჯი (იფსვიჩი, ინგლისი), ჯერ ჰენდრიკი (ბარნლი, ინგლისი), კონორ ჰურიჰანი (ასტონ ვილა, ინგლისი), ალან ბრაუნი (პრესტონი, ინგლისი), ჰარი არტერი (კარდიფ სიტი, უელსი), გლენ უელანი (ასტონ ვილა, ინგლისი), რობი ბრეიდი (ბარნლი), კალუმ 'დოუდა (ბრისტოლ სიტი, ინგლისი), ჯეიმს მაკლინი (სტოკი, ინგლისი);
თავდამსხმელები - შეინ ლონგი (საუთჰემპტონი, ინგლისი), შონ მაგუაირი (პრესტონი, ინგლისი), რონან კერტისი (პორტსმუთი, ინგლისი), დევიდ მაკგოლდრიკი (შეფილდ იუნაიტედი, ინგლისი), ჯეიმს კოლინზი (ლუთონი, ინგლისი).
მწვრთნელი: მიკ მაკარტი

საქართველო


მეკარეები - გიორგი ლორია (მაგდებურგი, გერმანია), გიორგი მაკარიძე (სეტუბალი, პორტუგალია), როინ კვასხვაძე (ტორპედო);
მცველები - ოთარ კაკაბაძე (ლუცერნი, შვეიცარია), გურამ კაშია (სან ხოსე, აშშ), სოლომონ კვირკველია (ლოკომოტივი, რუსეთი), დავით ხოჭოლავა (შახტარი, უკრაინა), გიორგი ნავალოვსკი (დინამო ბთ), ლევან ხარაბაძე (ციურიხი, შვეიცარია);
ნახევარმცველები - ჯაბა კანკავა (ტობოლი, ყაზახეთი), ოთარ კიტეიშვილი (შტურმი, ავსტრია), ლაშა პარუნაშვილი (ესბიერგი, დანია), ვაკო გვილია (გურნიკი, პოლონეთი), გიორგი მერებაშვილი (ვისლა პლოცკი, პოლონეთი), საბა ლობჟანიძე (რანდერსი, დანია), ჯაბა ჯიღაური (გრენობლი, საფრანგეთი), ვახტანგ ჭანტურიშვილი (ზლინი, ჩეხეთი), ნიკა კვეკვესკირი (ტობოლი, ყაზახეთი), ვაკო ყაზაიშვილი (სან ხოსე, აშშ), თორნიკე ოქრიაშვილი (უგუნდოდ);
თავდამსხმელები - გიორგი ქვილითაია (გენტი, ბელგია), ვატო არველაძე (კორონა, პოლონეთი), ნიკა კაჭარავა (ანორთოსისი, კვიპროსი).
მწვრთნელი: ვლადიმირ ვაისი

3086
მკითხველის კომენტარები / 0 /
მსგავსი ამბები
რუბრიკის სხვა სიახლეები
;