[წინათქმა] ეროვნული ლიგა. VII ტური. ძველი ანგარიშები და ახალი ტრადიცია. ანუ, ვის შეუძლია, ფავორიტს ნერვები დააგლიჯოს?  

2017 წელი. ეროვნულ ლიგაში გადასასვლელი პლეი-ოფი. ბათუმელებს სიონთან ძველი ანგარიშები აქვთ


ეროვნული ლიგის მეექვსე ტური ეს-ესაა ჩათავდა და უკვე მეშვიდე მოგვადგა კარს. რას ვიზამთ, თუ ევროპულ რელსებზე სიარული გვსურს, თანამედროვე საფეხბურთო ტენდენციებს ფეხი მაქსიმალურად უნდა ავუწყოთ.

მართალია, ამ ტურში არ გვაქვს მეგა-მატჩი, მაგრამ ფაქტია ისიც, რომ წინასწარი პროგნოზით თამაშების უმრავლესობას დაძაბულობა არ უნდა მოაკლდეს. დანარჩენს უშუალოდ ქართულ მინდვრებზე ვნახავთ...

შაბათი, 6 აპრილი
ჩიხურა-ლოკომოტივი                19:00
თბილისი. მიხეილ მესხი. LIVE ტელეკომპანია O2
13: +4 =4 -5, 16-24

კვირა, 7 აპრილი
სიონი-დინამო (ბთ)                     16:00
ბოლნისი. თამაზ სტეფანია. LIVE I არხზე
44: +17 =12 -15, 42-49

დინამო (თბ)-რუსთავი                19:00
თბილისი. დინამო არენა. LIVE ტელეკომპანია O2
4: +3 =0 -1, 8-3

დილა-ტორპედო                          21:00
გორი. თენგიზ ბურჯანაძე. LIVE ტელეკომპანია O2
61: +19 =9 -33, 69-108

ორშაბათი, 8 აპრილი
ვიტ ჯორჯია-საბურთალო           21:00
თბილისი. მიხეილ მესხი (სათ). LIVE ტელეკომპანია O2
0: +0 =0 -0, 0-0

ჩიხურა-ლოკომოტივი


ტური "ჩიხურა"-"ლოკომოტივის" დაპირისპირებით იწყება. მცირე სასტარტო ჩავარდნის შემდეგ, საჩხერელებმა, თითქოს, საკუთარი თამაში იპოვეს. ისე ჩანს, ჩვენი პირველობის ერთ-ერთმა გამორჩეულმა მწვრთნელმა, სოსო ფრუიძემ, კარგად გამოიყენა სანაკრებო პაუზა. "ჩიხურას" ძალიან უკომპრომისო გუნდი ჰყავს. ამაზე მეტყველებს ის, რომ მიმდინარე ეროვნულ ლიგაში ამ გუნდს ყველაზე მეტი ფრე აქვს ნათამაშები.

თქმა რად უნდა, რომ "ლოკომოტივს" იოლი გასეირნება არ ელის. "რკინიგზელებს" ნამდვილად არ უდგათ საუკეთესო დროება, მათ ზედიზედ 3 მატჩი წააგეს და ახლა თავს არ დაზოგავენ, რათა ეს სავალალო სტატისტიკა გამოასწორონ.

სიონი-დინამო (ბთ)


ამ დროისთვის "სიონს" ცხრილში მე-6 ადგილი უჭირავს, არადა, სულ რაღაც 2 ტურის წინ ბოლნისელები მე-2 ადგილზეც კი იყვნენ. თემურ შალამბერიძის გუნდმა მიმდინარე ჩემპიონატში 2 მატჩი მოიგო და ორივე - შინაურ კედლებში.

რაც შეეხება ბათუმის "დინამოს", აჭარული გუნდი მოწინავეთა შორისაა, მაგრამ, თუ გუნდის შეტევით პოტენციალს გავითვალისწინებთ, გაცილებით შედეგიანად თამაშიც შეუძლია.

ამ გუნდებს ერთმანეთთან ძველი ანგარიშები აქვთ. გვახსოვს, როგორ მოუგო "სიონმა" ზღვისპირელებს უმაღლეს ლიგაში გადასასვლელი პლეი-ოფი არცთუ შორეულ წარსულში...

დინამო (თბ)-რუსთავი


ქაღალდზე ეს წყვილი ყველაზე იოლად პროგნოზირებადია. თითქოს, რა უნდა დაუპირისპიროს ეროვნული ლიგის აუტსაიდერმა ერთ-ერთ ლიდერს, მაგრამ ფეხბურთში ყველაფერი ხდება და ამაზე დიდი სენსაციებიც მომხდარა.

"დინამო" ბოლო დროს აღმავლობით თამაშობს. გუნდმა ჯერ "საბურთალოს" მოუგო, მერე კი ბოლო ტურში ქულა მოიპოვა (0:0) ქუთაისის "ტორპედოსთან" გასვლით შეხვედრაში.

"რუსთავი" შედარებით კარგი იყო "სიონთან" წინა ტურის საშინაო მატჩში, მაგრამ გამარჯვების მოპოვება მაინც ვერ მოახერხა. არადა, ამას ნამდვილად იმსახურებდა. მოკლედ, რუსთაველები ყველაფერს გააკეთებენ იმისთვის, რომ ფავორიტს ნერვები დააგლიჯონ.

დილა-ტორპედო


ძველი, ტრადიციული მეტოქეების ჯახი ნამდვილად იმსახურებს ტურის ერთ-ერთი ცენტრალური დაპირისპირების სტატუსს. ვნახოთ, რამდენად შეძლებენ ქუთათურები ძალების აღდგენას "დინამოსთან" მომქანცველი შეხვედრის შემდეგ.

რაც შეეხება "დილას", გორელებს ჯერ მხოლოდ ერთი მოგება აქვთ მიმდინარე ჩემპიონატში. გიორგი დეკანოსიძის გუნდი ჯერაც დალაგების პროცესშია და ამ შემადგენლობით მეტი რომ შეუძლია, ყველა ვხვდებით. ასე რომ, შემტევი და საინტერესო ფეხბურთის მოლოდინში ვართ.

ვიტ ჯორჯია-საბურთალო


ზემოთ ტრადიცია ვახსენეთ და, ქართულ ფეხბურთში ახალ ტრადიციას ეყრება საფუძველი. ეს გუნდები საქართველოს ჩემპიონატის უმაღლეს ლიგაში პირველად ხვდებიან ერთმანეთს. მოქმედი ჩემპიონი "საბურთალო" მიმდინარე მარათონის ლიდერია. გიორგი ჭიაბრიშვილი კარგად იყენებს მის ხელთ არსებულ რესურსს. "საბურთალოს" მიმდინარე სეზონში ერთადერთი ჩავარდნა თბილისის "დინამოსთან" მატჩში ჰქონდა.

რაც შეეხება "ვიტ ჯორჯიას", ეს გუნდი ძალზე ორგანიზებულ და სიმპათიურ ფეხბურთს თამაშობს. ასე რომ, თბილისური დერბი ძალიან ბევრ საინტერესოს გვპირდება...

გია ტუხაშვილი
ალეკო კაკაურიძე

1. საბურთალო 6 5 0 1 13:7 15
2. დინამო (თბ) 6 3 1 2 11:5 10
3. ტორპედო 6 3 1 2 7:7 10
4. დინამო (ბთ) 6 3 1 2 3:3 10
5. ვიტ ჯორჯია 6 2 2 2 3:3 8
6. სიონი 6 2 2 2 6:10 8
7. ჩიხურა 6 1 4 1 8:5 7
8. ლოკომოტივი 6 2 0 4 8:12 6
9. დილა 6 1 2 3 5:6 5
10. რუსთავი 6 0 3 3 4:10 3

ბომბარდირები
ლ. კუტალია (დინამო თბ) 4
ო. როლოვიჩი (საბურთალო) 4
მ. სარდალიშვილი (ჩიხურა) 4
ლ. შინდაგორიძე (საბურთალო) 4

638
მკითხველის კომენტარები / 0 /
მსგავსი ამბები
რუბრიკის სხვა სიახლეები
;