[წინათქმა] ეროვნული ლიგა. VIII ტური. არაფერი გაგვიკვირდეს!.. ანუ მწვანე შუქი ქომაგს!

არცთუ შორეულ წარსულში თბილისის დინამო და ჩიხურა ხშირად უპირისპირდებოდნენ ერთმანეთს საქართველოს თასის ფინალში თუ სუპერთასზე. თუმცა, ამჯერად სხვა ვითარებაა...


საქართველოს XXXII ჩემპიონატი. ეროვნული ლიგა. VIII ტურის წინათქმა

პარასკევი, 31 ივლისი
თელავი-მერანი (თბ)  21:00
თელავი. კავკასიონი არენა. LIVE Erovnuliliga.ge
ურთიერთშეხვედრები
არ შეხვედრიან

შაბათი, 1 აგვისტო
დინამო (თბ)-ჩიხურა  20:30
თბილისი. დინამო არენა. LIVE Erovnuliliga.ge
ურთიერთშეხვედრები
29: +19 =5 -5, 67-25

ლოკომოტივი-ტორპედო  21:30
თბილისი. მიხეილ მესხი (სათ). LIVE Erovnuliliga.ge
ურთიერთშეხვედრები
42: +12 =9 -21, 36-56
დისკვალიფიკაცია: გურამ ადამაძე (ტორპედო)

კვირა, 2 აგვისტო
საბურთალო-დილა   17:30
თბილისი. მიხეილ მესხი. LIVE სილქ უნივერსალი
ურთიერთშეხვედრები
16: +7 =4 -5, 19-16

დინამო (ბთ)-სამტრედია   21:00
ანგისა. ჯონი ბაკურიძე. LIVE სილქ უნივერსალი
ურთიერთშეხვედრები
35: +16 =5 -14, 55-41

   ბ
1. დილა  7 4 3 0 13:4 15
2. დინამო (თბ) 7 3 3 1 13:3 12
3. საბურთალო  7 3 3 1 8:5 12
4. დინამო (ბთ) 7 2 5 0 10:5 11
5. თელავი 7 2 4 1 8:5 10
6. ლოკომოტივი 7 2 3 2 9:12 9
7. სამტრედია 7 2 2 3 6:12 8
8. ჩიხურა  7 1 2 4 7:11 5
9. ტორპედო  7 1 2 4 4:11 5
10. მერანი (თბ) 7 0 3 4 2:12 3

ბომბარდირები
მ. კოვტალიუკი (დილა) 6
ი. სიხარულიძე (ლოკომოტივი) 4
ჯ. ფლამარიონი (დინამო ბთ) 4
თ. კაპანაძე (დინამო თბ) 3
ჯ. ჯიღაური (დინამო ბთ) 3
გ. ფანცულაია (ტორპედო) 3
ნ. ყურბანოვი (სამტრედია) 3
ი. რუხაძე (თელავი) 3

ამ ტურის უმნიშვნელოვანეს მოვლენად იქცა ქართულ სტადიონებზე გულშემატკივართა დაბრუნება, მართალია, შეზღუდული რაოდენობით, მაგრამ მაინც!.. აი, რა განცხადება გაავრცელა 30 ივლისს ეროვნული ლიგის ოფიციალურმა საიტმა:

"კრისტალბეთ ეროვნული ლიგის VIII ტურიდან მაყურებელი სტადიონზე დაიშვება. გულშემატკივარს სტადიონზე შესვლა საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს მიერ შემუშავებული პროტოკოლის მიხედვით მოხდება, რომელიც 30 ივლისს დამტკიცდა.

სამინისტროს მიერ გამოცემული რეკომენდაციების მიხედვით, სტადიონზე წინასწარ უნდა განისაზღვროს სტუმართა განთავსების ადგილები, ყოველი დაკავებული ადგილის შემდეგ იყოს ორი თავისუფალი ადგილი, იმგვარად, რომ ღონისძიებაზე დამსწრე პირთა მიერ დაკავებული ადგილების რაოდენობა არ აღემატებოდეს ადგილების საერთო რაოდენობის 33%-ს. ამას გარდა, აუცილებელია თერმოსკრინინგის ჩატარება და სტადიონის ტერიტორიის სადეზინფექციო საშუალებებით უზრუნველყოფა.

სპორტულ ღონისძიებებზე სტადიონზე მაყურებლის დაშვების ინიციატივით საქართველოს მთავრობას სფფ-ის პრეზიდენტმა, ლევან კობიაშვილმა მიმართა და გადაწყვეტილება უწყებათაშორისმა საკოორდინაციო საბჭომ 21 ივლისს გამართულ სხდომაზე მიიღო".

აი, ასე. ახლა რაც შეეხება უშუალოდ მატჩებს. პირველი წრის დასრულებამდე 2 ტურიღა დარჩა და სულ მალე გვეცოდინება პირველი საშუალედო ეტაპის გამარჯვებულის ვინაობაც. ამჟამად, ცხრილში ისეთი სიტუაციაა, "ზაფხულის ჩემპიონის" არაოფიციალური ტიტულის მოპოვების ყველაზე კარგი შანსი, რა თქმა უნდა, ლიდერ გორის "დილას" აქვს, თუმცა...

პირველი წრის ბოლომდე დარჩენილი მატჩების კალენდარს თუ გადავხედავთ, კონკურენტებთან შედარებით ყველაზე რთული შეხვედრები სწორედ "დილას" ელოდება. მაგრამ გიორგი ნემსაძის გუნდმა წლეულს უკვე იმდენჯერ გაგვაოცა, ამ ზემოტივირებული კრებულისგან რაღა უნდა გაგვიკვირეს?!.

ისევე, როგორც გასაკვირი არ უნდა იყოს პირველი წრის ბოლომდე დარჩენილ სხვა მატჩებში დაფიქსირებული ესა თუ ის შედეგი...

VIII ტური იმ გუნდების დაპირისპირებით იწყება, უმაღლეს ლიგაში სადებიუტო სეზონს რომ ატარებენ. თუმცა "თელავისა" და "მერანის" დებიუტი აშკარად არაერთგვაროვანი გამოდგა: რევაზ გოცირიძის ხელმძღვანელობით მოასპარეზე კახური გუნდი დღესდღეობით V ადგილზეა და ამ სასურველი სატურნირო მდგომარეობის გარდა, თამაშის ხარისხიც მხოლოდ დადებით ემოციებს იწვევს.

აი, "მერანმა" კი სადებიუტო სეზონი ურიგოდ ნამდვილად არ დაიწყო და ერთიმეორეზე რთულ მეტოქეებთან ზედიზედ 3 მატჩი არ წააგო...

მაგრამ ამას მოჰყვა ზედიზედ 4 მარცხი და ეს დედაქალაქური გუნდი ახლა უკვე ბოლო ადგილზე ხვდება I წრის ფინიშს. იმასაც შეგახსენებთ, რომ სწორედ "მერანია" ერთადერთი გუნდი მიმდინარე ეროვნულ ლიგაში, ჯერ არც ერთი მატჩი რომ არ მოუგია...

* * *

I წრის ფინიშზე, კონკურენტებთან შედარებით, ბევრად უფრო იოლი კალენდარი თბილისის "დინამოს" აქვს. მოქმედ ჩემპიონს ორივე დარჩენილი შეხვედრა აუტსაიდერებთან ("ჩიხურა" და "მერანი") აქვს. ამდენად, თუ რაიმე გაუთვალისწინებელი არ მოხდა, ჩემპიონატის ამ საშუალედო ეტაპს ჩვენი ყველაზე ტიტულოვანი კლუბი 18 ქულით დაასრულებს - მაშინ როცა, ლიდერ გორის "დილას" ერთიმეორეზე რთული პაექრობები ელოდება "საბურთალოსა" და "ლოკომოტივთან"...

...წინა ტურში კახა ჩხეტიანის "დინამომ", ბევრისთვის მოულოდნელად, ძალიან იოლი გამარჯვება მოიპოვა "სამტრედიასთან" გასვლით მატჩში. თანაც, ამ შეხვედრაში "დინამომ", ფაქტობრივად, ოპტიმალური შემადგენლობით იასპარეზა, რაც წლევანდელ სეზონში აქამდე იშვიათობა იყო.

თუმცა, წინა ტური ხომ "ჩიხურასთვისაც" განსაკუთრებული იყო - ვახტანგ თურმანიძის გუნდმა, როგორც იქნა, სეზონში პირველი გამარჯვება (თანაც, "მერანთან" "ექვსქულიან" მატჩში) მოიპოვა. თუმცა I წრის ფინიშზე "ჩიხურას" ურთულესი მეტოქეები ეყოლება სეზონის ორივე გამოკვეთილი ფავორიტის სახით: ჯერ - თბილისის "დინამო", მერე - ბათუმის "დინამო"...

არცთუ შორეულ წარსულში თბილისის "დინამო" და "ჩიხურა" ხშირად უპირისპირდებოდნენ ერთმანეთს საქართველოს თასის ფინალში თუ სუპერთასზე. თუმცა, ამჯერად სხვა ვითარებაა - "დინამო" მარადიული ფავორიტის" სტატუსს ინარჩუნებს, აი, საჩხერელთა გუნდს კი წლეულს ბევრად უფრო მოკრძალებული მიზნები აქვს...

* * *

ამ ტურში ორი ისეთი მატჩია, ნებისმიერ შედეგს უნდა ველოდოთ და ერთ-ერთი ასეთი არაპროგნოზირებადი პაექრობა შაბათს უნდა გაიმართოს: ერთმანეთს ბოლო დროს არასტაბილურად მოასპარეზე გუნდები - "ლოკომოტივი" და "ტორპედო" უნდა დაუპირისპირდნენ.

თუმცა "ლოკომოტივის" წლევანდელ ასპარეზობას მხოლოდ "არასტაბილურს" ვერ ვუწოდებთ: განვლილი 7 ტურის განმავლობაში გუნდმა სამჯერ შეიცვალა მთავარი მწვრთნელი, რაც ადეკვატურად აისახა კიდეც შედეგებზე...

ამას გარდა, ისიც გასათვალისწინებელია, რომ მთავარ მწვრთნელად გიორგი ჭიაბრიშვილის დანიშვნის შემდეგ, გუნდს ჯერ არც ერთი მატჩი არ ჩაუტარებია ოპტიმალური შემადგენლობით - ტრავმების, დისკვალიფიკაციისა თუ კიდევ სხვა მიზეზთა გამო.

თუმცა ამ ობიექტური ფაქტორების გათვალისწინებითაც, ცოტა არ იყოს, მოულოდნელია "ლოკომოტივის" 5-მატჩიანი მოუგებელი სერია, არადა, ფეხბურთელებისა და, რა თქმა უნდა, მწვრთნელთა კვალიფიკაციიდან გამომდინარე, "რკინიგზელებს" მაინც რეალურად ხელეწიფებათ მაქსიმალური მიზნებისთვის ბრძოლა.

სამწუხაროდ, ამასვე ვერ ვიტყვით წლევანდელი ფორმაციის "ტორპედოზე". ისევე, როგორც შარშან, ქუთაისელთა გუნდის წლევანდელი პროგრამა-მაქსიმუმიცა და მინიმუმიც უმაღლეს ლიგაში ადგილის შენარჩუნება უნდა იყოს.

იმედს ვიტოვებთ, ტიტულებით საქართველოში მეორე კლუბი დაძლევს ამ გაჭიანურებულ კრიზისს და კვლავ ვიხილავთ დიდი ამბიციების მქონე "ტორპედოს"...

* * *

და აი, ამ ტურის უდავოდ ყველაზე საინტრიგო დაპირისპირებაც - ბოლო დროს მშვენივრად ათამაშებულმა "საბურთალომ" გათამაშების ლიდერ "დილას" უნდა უმასპინძლოს. მოკლედ, ისეთი მატჩია, სადაც ფავორიტი არ არსებობს და სადაც, არც ერთი შედეგი არავის არ უნდა გაუკვირდეს!..

...ზემოთ, "ლოკომოტივის" საკადრო პრობლემები ვახსენეთ და, არანაკლები კი არა, ბევრად უფრო მეტი პრობლემა ჰქონდა "საბურთალოს" სეზონის დასაწყისიდანვე, თან არა მხოლოდ საკადრო, არამედ, წმინდა ადამიანურიც...

...მაგრამ, ყოველივე ამის მიუხედავად, თეიმურაზ შალამბერიძის გუნდმა ძალიან მალე დაძლია ის მცირე ჩავარდნა, ჩემპიონატის განახლების შემდეგ რომ ჰქონდა (ორ მატჩში მხოლოდ 1 ქულა აიღო) - არცთუ იოლ მეტოქეებთან ჩატარებულ ბოლო სამ მატჩში თბილისელებმა 7 ქულა ისე აიღეს, გოლი არ გაუშვიათ!..

ლიდერი "დილა" კი ტურიდან ტურამდე რჩება საყოველთაო ყურადღების ცენტრში. თანაც, გიორგი ნემსაძის გუნდს, კარგად ორგანიზებული თამაშით რომ გამოირჩევა, პრობლემას უქმნის... ფაქტობრივად, ცარიელი სათადარიგოთა სკამი!..

აი, ასე - იშვიათი ბრძოლისუნარიანობითა და მონდომებით, ყველა მეტოქესთან სწორად შერჩეული ტაქტიკითა და თითოეული ფეხბურთელის ინდივიდუალური თვისებების მაქსიმალური გამოყენებით, "დილა" აბსოლუტურად დამსახურებულად ლიდერობს!..

სხვა საქმეა, თუ რამდენ ხანს გასტანს გორელთა ასეთი წარმატებული სვლა ერთობ მწირი საკადრო რესურსის პირობებში. ამას გარდა, ცოტა არ იყოს, უხერხულადაც მიგვაჩნია ის ფაქტი, როცა უმაღლეს ლიგაში მოასპარეზე გუნდს (თანაც - გათამაშების ლიდერს), ერთ კონკრეტულ მატჩში (მით უმეტეს, ჩემპიონობის ერთ-ერთ გამოკვეთილ ფავორიტ ბათუმის "დინამოსთან") სათადარიგოთა სკამზე მხოლოდ... 4 (ოთხი!) ფეხბურთელი ჰყავს...

* * *

ჩემპიონატის თითქმის ნახევარი მიილია და წლევანდელი სეზონის ერთ-ერთმა გამოკვეთილმა  ფავორიტმა ბათუმის "დინამომ" ვერაფრით დაძლია "საყაიმო სინდრომი". ერთიმეორეზე კვალიფიციური ფეხბურთელებით დაკომპლექტებულმა აჭარულმა გუნდმა განვლილ 7 ტურში 5 მატჩი დაასრულა ფრედ!..

თუმცა, არც ის დაგვავიწყდეს, რომ გამოცდილი და ტიტულოვანი სპეციალისტის, გია გეგუჩაძის ხელმძღვანელობით მოასპარეზე ბათუმის "დინამო" ჩემპიონატში ჯერაც დაუმარცხებელია და, რაც ყველაზე მთავარია, მეორე წრეში თბილისის "დინამოსაც", "ლოკომოტივსაც" და "დილასაც" შინ უნდა ეთამაშოს.

მოკლედ, იმის მიუხედავად, რომ ბათუმის "დინამო" დღესდღეობით IV ადგილზეა, მაინც ღრმად გვწამს ამ გუნდის საჩემპიონო ამბიციების. მით უფრო, რომ კონკურენტებისგან განსხვავებით, ბათუმის "დინამოს", ფაქტობრივად, ორი თანაბარი შემადგენლობა ჰყავს.

..."სამტრედიას" წლევანდელი ასპარეზობა კი აშკარად არაერთგვაროვნად უნდა შეფასდეს: გამოცდილი სპეციალისტის, კახა კაჭარავას მიერ დამოძღვრილი გუნდი არასტაბილურობითაც გამოირჩევა და შეტევაშიც მოიკოჭლებს...

არადა, ერთი შეხედვით, ურიგო ფეხბურთელებით არ არის დაკომპლექტებული, თუმცა უამრავ ახალწვეულს კვლავაც აქვს ერთმანეთთან შეთამაშების პრობლემა, რომ აღარაფერი ვთქვათ უკვე ნახსენებ დაბალ შედეგიანობაზე.

ამის დასტურად ის ფაქტიც გამოდგება, რომ მიმდინარე სეზონში გამართულ 7 მატჩში "სამტრედიამ" მხოლოდ 6 გოლი გაიტანა და აქედან 3 - პენალტით.

1156
მკითხველის კომენტარები / 0 /
მსგავსი ამბები
რუბრიკის სხვა სიახლეები
;