[წინათქმა] ეროვნული ლიგა. XXXIII ტური. ფერმკრთალი კლასიკო და ბევრი ინტრიგა

თბილისის დინამოსა და ტორპედოს შორის ბოლო დაპირისპირებაში ერთადერთი გოლი ლევან კუტალიამ გაიტანა


კარგა ხანია, წლევანდელის მსგავსი დაძაბული და საინტრესო ჩემპიონატი არ გვქონია: სეზონის დასრულებამდე 4 ტურია დარჩენილი და ჯერჯერობით მხოლოდ ბოლოადგილოსნის ვინაობაა ცნობილი. აი, დანარჩენი საინტრიგო თემები კი ისეთია, რომ ძალიან დიდი ალბათობით, ჩემპიონატის ბოლო ტურამდე მოგვიწევს მოცდა იმის გასარკვევად, თუ რომელი გუნდის ტრიუმფით დასრულდება ეროვნული ლიგის წლევანდელი გათამაშება და არც ის მიგვაჩნია ნაკლებად მნიშვნელოვან ინტრიგად, რომ გასავარდნ პლეი აუტში მოხვედრის შანსი... 5 გუნდს აქვს.

მოკლედ, ეროვნული ლიგის წლევანდელ გათამაშებას რასაც ნამდვილად ვერ დავუკარგავთ, ეს არის სატურნირო ინტრიგა. იმაზე აღარაფერს ვამბობთ, რომ არაპროგნოზირებადი მატჩების რაოდენობა ტურიდან ტურანდე იზრდება. აი, ახლაც ერთმანეთზე საინტრიგო დაპირისპირებებით აღსავსე XXXIII ტურის წინ ყოველგვარი პროგნოზისგან თავის შეკავება გვმართებს...

მით უფრო, რომ სადღეისო სატურნირო მდგომარეობით, ერთი შეხედვით, რამდენიმე წყვილს გამოკვეთილი ფავორიტი უნდა ჰყოლოდა. თუმცა, ჩემპიონატის დასკვნით, IV წრეში უკვე ისე მივეჩვიეთ მოულოდნელ შედეგებს, რომ უკვე აღარაფერი გვიკვირს...

პარასკევი, 1 ნოემბერი
ჩიხურა-დინამო (ბთ)   14:00
ივანწმინდა. LIVE O2
17: +6 =5 -6, 15-14
I-II-III წრე: 0:0, 1:2, 0:1

ისე დაემთხვა, რომ ეროვნული ლიგის ლიდერ ბათუმის "დინამოს" ზედიზედ 3 მატჩის გამართვა უწევს პლეი აუტის ზონის სიახლოვეში მყოფ გუნდებთან: გია გეგუჩაძის გუნდი ჯერ "ჩიხურას" ეთამაშება სტუმრად, შემდეგ კი, ზედიზედ 2 საშინაო მატჩი აქვს "სიონთან" და "რუსთავთან". ანუ, ადვილი მისახვედრია, როგორი რთული პაექრობები ელოდება ჩემპიონატის ერთ-ერთ გამოკვეთილ ფავორიტს სეზონის დასკვნით ნაწილში.

თანაც, ისიც ხომ გასათვალისწინებელია, რომ ბათუმის "დინამომ" ბოლო 3 მატჩი ფრედ დაასრულა და კიდევ კარგი, უახლოესმა მდევარმა თბილისის "დინამომაც" ვერ იყოჩაღა დასკვნით ტურებში, თორემ აჭარული გუნდის საჩემპიონო ოცნებები მომავალი წლისთვის გადაიდებოდა...

...იმის გარდა, რომ "ჩიხურა" მუდამ მიიჩნეოდა ბათუმის "დინამოსთვის" ერთ-ერთ ყველაზე უხერხულ მეტოქედ, საჩხერელთა სატურნირო მდგომარეობაც დამატებით ინტრიგას სძენს ამ ტურის სასტარტო მატჩს: პირველად ბოლო წლებში, "ჩიხურას" ქვედა ლიგაში დაქვეითება ემუქრება.

ანუ, ისეთი მატჩია, სადაც ქულები ორივე გუნდს მართლაც რომ ძალიან სჭირდება და საწყენია ის ფაქტი, რომ ასეთი მნიშვნელობის მატჩი ისეთ მოედანზე ტარდება, რომელიც, ჩვენი აზრით, უმაღლეს ლიგას არ შეეფერება...

შაბათი, 2 ნოემბერი
სიონი-რუსთავი    14:00
ბოლნისი. თამაზ სტეფანია. LIVE O2
7: +1 =3 -3, 10-14
I- II- III წრე: 1:1, 3:3, 1:2
დისკვალიფიკაცია: ზურაბ ჯაფიაშვილი (სიონი) - გიორგი ვასაძე, პაატა კიტეიშვილი (ორივე - რუსთავი)

ამ ტურის, ალბათ, ერთ-ერთი ყველაზე საინტროგო მატჩი: იმის გარდა, რომ ქვემოქართლური "დერბია", შარშანდელიდან მოყოლებული, "სიონისა" და "რუსთავის", ფაქტობრივად, ყველა დაპირისპირება უაღრესად დაძაბულად და საინტერესოდ მიმდინარეობს.

რაღა შორს წავიდეთ, თუნდაც წლევანდელ 24 მაისს გამართული მატჩი გავიხსენოთ, მიმდინარე სეზონში ერთ-ერთი ყველაზე დრამატული რომ გამოდგა. დიახ, II წრის იმ ბოლნისურ შეხვედრას ვიხსენებთ, კოკისპირული წვიმის თანხლებით რომ დაიწყო და თითქმის ერთი საათის განმავლობაში, სტუმართა დომინირებით აღინიშნა. თუმცა რუსთაველთა 3 გოლს "სიონმა" ამდენივეთი უპასუხა და თამაში ფრედ დასრულდა.

მიმდინარე სეზონის რიგით მეოთხე ქვემოქართლურ დერბის ისეთი მნიშვნელობა აქვს, რომ ამ მატჩში დამარცხება, ფაქტობრივად, პლეი აუტში მონაწილეობას ნიშნავს. მით უფრო, სეზონის ბოლომდე დარჩენილი  მატჩების გათვალისწინებით და ამ შემთხვევაში, ბევრად უფრო რთული კალენდარი "რუსთავს" აქვს - ვარლამ კილასონიას გუნდს მომდევნო 2 მატჩი ხომ ჩემპიონობის ორ კანდიდატთან - ბათუმისა და თბილისის "დინამოებთან" აქვს, ბოლო ტურში კი "დილასთან" მოუწევს დაპირისპირება და არავინ იცის, იმ დროისთვის გორელთა გუნდი რომელ ადგილზე იქნება სატურნირო ცხრილში...

შაბათი, 2 ნოემბერი
ვიტ ჯორჯია-ლოკომოტივი   18:00
თბილისი. მიხეილ მესხი 2. LIVE O2
41: +18 =12 -11, 47-36
I-II-III წრე: 1:0, 0:3, 1:1

ერთი შეხედვით, ამ ტურში მხოლოდ ეს მატჩი უნდა მიგვეჩნია დანარჩენებთან შედარებით უმოტივაციოდ, გამომდინარე ორივე გუნდის სატურნირო მდგომარეობიდან. მოგეხსენებათ, "ლოკომოტივს" თითქმის 99 პროცენტით აქვს განაღდებული IV ადგილი, რაც იმას ნიშნავს, რომ ლევან კორღალიძის გუნდი, მომავალ წელს ევროტურნირებზე იასპარეზებს...

აი, რაც შეეხება "ვიტ ჯორჯიას", ეროვნული ლიგის ყველაზე ახალგაზრდული (და ბოლო ტურებში ყველაზე ბრძოლისუნარინი) გუნდი მომავალ სეზონს ქვედა ლიგაში გაატარებს. თუმცა, იმის მიუხედავად, რომ "ვიტ ჯორჯიას" ბედი, ფაქტობრივად, უკვე ზაფხულშივე იყო გარკვეული, ამ გუნდმა მაინც არ უღალატა სამართლიანი თამაშის პრინციპებს და ერთმანეთზე მოტივირებულ, ფაქტობრივად, ყველა მეტოქეს დააკარგვინა უძვირფასი ქულები!

აი, ასეთი ბრძოლისუნარიანი გუნდი ჩამოაყალიბა ახალგაზრდული "ვიტ ჯორჯიას" ზეგამოცდილმა მწვრთნელმა ვლადიმერ ხაჩიძემ და ამ კვალიფიციურ სპეციალისტს მხოლოდ ქების სიტყვები ეკუთვნის.

ყოველივე ზემოთქმულის მიუხედავად, ამ წყვილსაც "მოვუძებნეთ" გარკვეული სატურნირო ინტრიგა: "ლოკომოტივმა" ეს მატჩი თუ მოიგო და მეორე დღეს "ტორპედო" დამარცხდა აშკარად გაფერმკრთალებულ "ქართულ კლასიკოში", "ლოკომოტივი" სეზონის დასრულებამდე 3 ტურით ადრე უკვე ოფიციალურად გაინაღდებს ევროტურნირების საგზურს, რაც "რკინიგზელებს" 2008 წლის შემდეგ არ მოუპოვებიათ.

კვირა, 3 ნოემბერი
დილა-საბურთალო  16:00
გორი. თენგიზ ბურჯანაძე. LIVE I არხზე
15: +4 =4 -7, 14-19
I-II-III წრე: 1:2, 1:1, 0:3

კიდევ ერთი მატჩი, ასევე უდიდეს ინტერესს რომ იწვევს და სადაც ნებისმიერი შედეგი ჩვეულებრივ ამბად უნდა მივიჩნიოთ. ეს იმის მიუხედავად, რომ მასპინძლებს მხოლოდ 1 ქულა აშორებთ გასავარდნ პლეი აუტამდე, ხოლო მოქმედი ჩემპიონი კვლავაც აქტიურად არის ჩართული ოქროს მედლებისთვის ბრძოლაში...

წყვილი უფავორიტოა და ის ფაქტორიც გასათვალისწინებელია, რომ გიორგი ჭიაბრიშვილის "საბურთალომ" ვერც შარშანდელ, საჩემპიონო სეზონში შეძლო "დილასთან" სტუმარდ გამარჯვება და ვერც - წლეულს. თუმცა, ამ შემთხვევაში სტატისტიკა მართლაც რომ მეორეხარისხოვანია: გიორგი ნემსაძის ხელმძღვანელობით მოასპარეზე "დილას" სატურნირო მდგომარეობა ხომ უკვე ვახსენეთ და ისიც ვთქვათ, რომ გორელებს დარჩენილი მატჩებიც ერთმანეთზე უფრო რთული აქვთ.

აი, "საბურთალოს" კი, იმის გარდა, რომ საკუთარი მატჩები უნდა მოიგოს, ერთდროულად ორი კონკურენტის წაფორხილების იმედად ყოფნა მოუწევს, თორემ სხვა შემთვევაში, უკვე ექსჩემპიონის სტატუსით მოუწევს დაკმაყოფილება.

კვირა, 3 ნოემბერი
დინამო (თბ)-ტორპედო  19:00
თბილისი. დინამო არენა. LIVE O2
74: +37 =20 - 17, 121-68
I-II-III წრე: 0:0,  2:1, 1:0

პარადოქსია, მაგრამ ფაქტია: საქართველოს ჩემპიონატების ისტორიაში ყველაზე პრინციპულ დაპირისპირებად აღიარებული ძველი და უკოპრომისო მეტოქეების მორიგ პაექრობას ინტრიგა ნამდვილად აკლია. ოღონდ, სატურნირო ინტრიგას მოკლებული ნამდვილად არ არის მორიგი "ქართული კლასიკო" - თბილისის "დინამო" კვლავაც იბრძვის მონატრებული საჩემპიონო ტიტულისთვის, ხოლო "ტორპედოს" ჯერ კიდევ არ გაუნაღდებია ეროვნულ ლიგაში ადგილის შენარჩუნება...

თანაც, ისიც გასათვალისწენებელია, რომ ორივე გუნდი ამ ბოლო დროს საკმაოდ წარუმატებლად ასპარეზობს: შეგახსენებთ, რომ "ტორპედო" ერთადერთი გუნდია ეროვნულ ლიგაში, IV წრეში ხუთივე მატჩი რომ წააგო, ხოლო "დინამომ" ბოლო სამ შეხვედრაში მხოლოდ 2 ქულა აიღო.

ოღონდ, ისიც აღსანიშნავია, რომ "ტორპედოში" მიმდინარე პროცესებიდან გამომდინარე, ამ გუნდის მწვრთნელ-ფეხბურთელებს ვერც ვერავინ გაამტყუნებს არასასურველი შედეგის გამო. აი, თბილისის "დინამოს" ბოლოდროინდელი ჩავარდნა კი, რბილად რომ ვთქვათ, უცნაურიც არის და გაუგებარიც...

...შარშან, სეზონის დასკვნით ნაწილში "ტორპედომ" ოთხდღიან ინტერვალში ზედიზედ ჩატარებულ ორ მატჩში "დინამოს" მხოლოდ 1 ქულა "დაუთმო" და ამით, დიდწილად შეუმცირა საჩემპიონო შანსები თავის ყველაზე პრინციპულ მეტოქეს...

შარშანწინდელ ამბებზე კი ახალი რა უნდა ვთქვათ - 2017 წლის სეზონის გამარჯვებულის ბედი ხომ ამ ორი გუნდის უშუალო დაპირისპირებაში ირკვეოდა და სადაც ყველაფერი ქუთაისელთა მეკარისა და კაპიტნის როინ კვასხვაძის გმირობამ გადაწყვიტა...

აი, წლეულს კი, "ტორპედოში" არსებული უმძიმესი ფინანსური მდგომარეობიდან გამომდინარე, წინა სამივე "კლასიკო" ძალიან მშვიდობიანიც გამოდგა და, ცოტა არ იყოს, გაფერმკრთალებულიც...

  ბ
1. დინამო (ბთ) 32 19 7 6 52-26 64
2. დინამო (თბ) 32 19 6 7 62-29 63
3. საბურთალო 32 18 7 7 56-31 61
4. ლოკომოტივი 32 14 4 14 38-42 46
5. ტორპედო 32 11 7 14 48-49 40
6. დილა 32 10 8 13 34-39 38
7. ჩიხურა 32 9 11 12 41-39 38
8. რუსთავი 32 9 10 13 36-48 37
9. სიონი 32 9 8 15 34-70 35
10. ვიტ ჯორჯია 32 4 8 20 14-41 20

ბომბარდირები
ლ. კუტალია (დინამო თბ) 17
ჯ. ფლამარიონი (დინამო ბთ) 16

მომდევნო ტური
პარასკევი, 1 ნოემბერი
ჩიხურა-დინამო (ბთ) 14:00
შაბათი, 2 ნოემბერი
სიონი-რუსთავი 14:00
ვიტ ჯორჯია-ლოკომოტივი 18:00
კვირა, 3 ნოემბერი
დილა-საბურთალო 16:00
დინამო (თბ)-ტორპედო 19:00
823
მკითხველის კომენტარები / 0 /
მსგავსი ამბები
რუბრიკის სხვა სიახლეები
;