[წინათქმა] ეროვნული ლიგა. XXXIV ტური. კიდევ მოგვიწევს მოცდა...

თბილისისა და ბათუმის დინამოელები მორიგი ტურისთვის ემზადებიან


ამ ტურის შემდეგ ჩემპიონატში კიდევ ერთი და ამ სეზონში ბოლო სანაკრებო პაუზ იქნება. თუმცა ეროვნული ლიგის გათამაშებაში, ფაქტობრივად, მთელი სეზონის განმავლობაში არსებული სატურნირო ინტრიგა ამ ორკვირიანი პაუზის შემდეგაც ზეაქტუალური იქნება.

ანუ, იმის მიუხედავად, რომ სეზონის დასრულებამდე მხოლოდ 3 ტური დარჩა, სატურნირო ცხრილში კვლავაც ბუნდოვანი სიტუაციაა. არადა, შარშან, ზუსტად ამ პერიოდისთვის, ფაქტობრივად, ყველაფერი გარკვეული იყო - ჩემპიონის ვინაობაც, პრიზიორებისაც და ბოლო სამ ტურში მხოლოდ ისღა იყო საინტერესო, რომელი გუნდი დაიკავებდა IV ადგილს ("ჩიხურა" თუ "დილა") და ისიც, "სამტრედიასთან" ერთად, რომელ ქვემოქართლურ გუნდს ("რუსთავსა" თუ "სიონს") მოუწევდა პლეი აუტში ასპარეზობა.

ამჟამად კი, როგორც ზემოთ აღვნიშნეთ, გარკვეული პერიოდის განმავლობაში მოგვიწევს მოცდა და არც ის გამორიცხული, რომ ყველაფერი ბოლო ტურში გადაწყდეს. მანამდე კი XXXIV ტური გველოდება, ერთიმეორეზე საინტრიგო და არაპროგნოზირებადი მატჩებით...

არადა, ამ ტურში, სულ მცირე, სამი ისეთი წყვილია, სადაც, ერთი შეხედვით, ფავორიტი (ზედა სამეულის გუნდები ბოლო სამ ადგილზე მყოფ გუნდებს უნდა დაუპირისპირდნენ) აშკარა, მაგრამ მიმდინარე სეზონში ხომ უამრავი მოულოდნელი შედეგი დაფიქსირდა, რომ აღარაფერი ვთქვათ ჩემპიონატის დასკვნით, IV წრეზე, სადაც მართლაც ყველაფერი თავდაყირა დადგა...

პარასკევი, 8 ნოემბერი
დინამო (ბთ)-სიონი   19:00
ანგისა. დინამოს საწვრთნელი ბაზა. LIVE O2
47: +18 =12 -17, 62-45
I-II-III წრე: 4:2, 5:1, 4:0
დისკვალიფიკაცია: გაბრიელ რამოსი (დინამო ბთ)

ტური ისეთი გუნდების დაპირისპირებით დაიწყება, ჩემპიონატში აბსოლუტურად განსხვავებული მიზნები რომ აქვთ და, აქედან გამომდინარე, არც არავის უნდა გაჰკვირვებოდა, ამ ტურს ორივე გუნდი ასევე განსხვავებული სერიით რომ შეხვდა.

თუმცა, გასაკვირი ის აღმოჩნდა, რომ ჩემპიონობის ერთ-ერთმა უმთავრესმა ფავორიტმა ბათუმის "დინამომ" ბოლო ოთხ მატჩში მხოლოდ 1 ქულა აიღო (თუმცა, გარკვეული სამსაჯო შეცდომებმაც დიდი როლი ითამაშა), სამაგიეროდ, ცხრილის ქვედა ნაწილში მყოფმა "სიონმა" სეზონის ფინიშზე მკვეთრად მოუმატა და ამის დასტურიც არის ბოლნისელთა გუნდის მიერ ბოლო 3 მატჩში მოპოვებული 7 ქულა.

საერთოდაც, IV წრეში თეიმურაზ შალამბერიძის მიერ დამოძღვრილი "სიონი" საკმაოდ წარმატებით ასპარეზობს და განვლილი 6 ტურის შედეგებს თუ შევაჯამებთ, მხოლოდ "ლოკომოტივსა" და "დილას" ჩამორჩება.

ოღონდ, ეგ არის, რომ ბოლნისელთა სატურნირო მდგოიმარეობა ისეთია, რაც უნდა წარმატებით იასპარეზონ დარჩენილ სამ ტურში, მაინც კონკურენტების შედეგებზე იქნებიან დამოკიდებულნი. სხვა შემთხვევაში კი, ერთიმეორეზე გამოცდილი ფეხბურთელებით დაკომპლექტებულ "სიონს", ისევე, როგორც შარშან, ამჯერადაც პლეი აუტი ელოდება.

ასევე, მხოლოდ საკუთარ თავზე აღარ არის დამოკიდებული ბათუმის "დინამოც". გია გეგუჩაძის ხელმძღვანელობით მოასპარეზე აჭარულ გუნდს დარჩენილი სამივე მატჩის მოგებაც არ ეყოფა ისტორიულ საჩემპიონო ტრიუმფამდე, თუ უშუალო კონკურენტმა თბილისის "დინამომ" ამ ან მომდევნო ტურში არ დაკარგა ქულები.

არადა, თბილისის "დინამოს" ზედიზედ 2 გასვლითი მატჩი აქვს, მაშინ როცა ბათუმის "დინამო" ზედიზედ ორ საშინაო შეხვედრას ჩაატარებს...

შაბათი, 9 ნოემბერი
რუსთავი-დინამო (თბ)  14:00
რუსთავი. სფფ-ის აკადემია. LIVE O2
7: +1 =1 -5, 6-14
I- II- III წრე: 1:3, 0:1, 2:2

ამ ტურის, ალბათ, ერთ-ერთი ყველაზე საინტრიგო მატჩი, რომლის შედეგსაც ორივე გუნდისთვის უდიდესი სატურნირო მნიშვნელობა აქვს. თავად განსაჯეთ - უსერიოზულესი საკადრო პრობლემების მქონე "რუსთავი" თუ დამარცხდება ჩემპიონატის ლიდერთან, ეს თითქმის 99-პროცენტით პლეი აუტში მონაწილეობას უნდა ნიშნავდეს.

ეგ კი არა, ფრეც დიდი ვერაფერი ნუგეში უნდა იყოს მასპინძლებისთვის, რომლის მთავარ მწვრთნელ ვარლამ კილასონიას სერიოზული საფიქრალი აქვს, როგორ "შეაგროვოს" ჯანმრთელი... 11 ფეხბურთელი ამ უმნიშვნელოვანესი მატჩისთვის!

"რუსთავს" ისედაც არ ჰქონდა გრძელი სათადარიგოთა სკამი, ახლა კი ისეთი სიტუაცია შეიქმნა, რომ ადრე ტრავმირებულ ფარხად გისტაროვს კიდევ 3 ფეხბურთელი (ნიკა ძალამიძე, გიორგი თევზაძე, ლუკა იმნაძე) დაემატა, ხოლო გიორგი მამარდაშვილი და პაატა კიტეიშვილი კილასონიას გუნდში თბილისის "დინამოდან" იჯარით არიან მისულები და, შესაბამისად, ამ მატჩში ვერ ითამაშებენ.

ისე, ფრე თბილისის "დინამოსთვისაც", ფაქტობრივად, წაგების ტოლფასი უნდა იყოს და ამიტომაც ველოდებით ამ მატჩში "გახსნილ" ფეხბურთს...

შაბათი, 9 ნოემბერი
საბურთალო-ვიტ ჯორჯია  14:00
თბილისი. მიხეილ მესხი. LIVE O2
3: +2 =1 -0, 6-0
I-II-III წრე: 3:0, 3:0, 0:0
დისკვალიფიკაცია: სანდრო ალთუნაშვილი (საბურთალო)

ერთი შეხედვით, ყოვლად უმოტივაციო მეტოქეების მატჩი გველოდება: "საბურთალოს" ხომ მხოლოდ თეორიული შანსიღა დარჩა შარშანდელი შედეგის გასამეორებლად, "ვიტ ჯორჯია" კი, უკვე ოფიციალურად დაქვეითდა.

თუმცა, ამ ყველაფრის მიუხედავად, მაინც საინტერესო პაექრობის მოლოდინი გვაქვს: ერთიმეორეზე ახალგაზრდა და გამოუცდელი ფეხბურთელებით დაკომპლექტებული "ვიტ ჯორჯია" არცერთ მეტოქეს არ ეპუება და ყველა მატჩში მაქსიმალური მონდომებით თამაშობს.

სხვათა შორის, ამ სეზონში "ვიტ ჯორჯიამ" ჯერ კიდევ მოქმედ ჩემპიონსაც დააკარგვინა ქულები, როცა III წრის მატჩში 0:0 ითამაშა "საბურთალოსთან".

არადა, გიორგი ჭიაბრიშვილის დამოძღვრილ "საბურთალოს" იმ მატჩში უამრავი ხელსაყრელი მომენტი ჰქონდა, მაგრამ მართლაც გამორჩეული შეხვედრა ჩაატარა "ვიტ ჯორჯიას" მეკარემ ლევან ისერგიშვილმა, რომელმაც, ვინ მოთვლის, რამდენჯერ გადაარჩინა გუნდი აშკარა ხიფათს.

შაბათი, 9 ნოემბერი
ლოკომოტივი-ჩიხურა   18:00
თბილისი. მიხეილ მესხი 2. LIVE O2
16: +6 =4 -6, 28-20
I-II-III წრე: 0:1, 2:0, 3:2
დისკვალიფიკაცია: გიორგი კორიფაძე (ჩიხურა)

ძალიან დიდია იმის ალბათობა, რომ სწორედ ამ ტურის შემდეგ სატურნირო ცხრილში კიდევ ერთი ინტრიგა მოკვდეს. ბოლო დროს მართლაც მშვენიერ ფორმაში მყოფ "ლოკომოტივს" დარჩენილ სამ ტურში 1 ქულაც ჰყოფნის IV ადგილის დასაკავებლად, რაც ავტომატურად ნიშნავს მომავალ ზაფხულს ევროტურნირებზე ასპარეზობას...

მოკლედ, ამ მატჩში მასპინძლებმა ფრედ რომ ითამაშონ, ლევან კორღალიძის გუნდს უკვე ვერც ერთი კონკურენტი ("დილა", "ჩიხურა", "ტორპედო") ვეღარ შეეცილება! თუმცა, ნუ დაგვავიწყდება, რომ "ჩიხურასაც" საკმარისზე მეტი მოტივაცია დარჩა ჩემპიონატში: სოსო ფრუიძის გუნდმა ბოლო ოთხ მატჩში უმნიშვნელოვანესი 9 ქულა კი შემატა თავის აქტივს, მაგრამ პლეი აუტისთვის თავის არიდება ჯერ გადაწყვეტილი არ არის.

ისე, წლევანდელი სეზონი მართლაც უცნაური გამოდგა: ეროვნულ ლიგაში ადგილის შესანარჩუნებლად, შეაძლოა, 42-43 ქულაც არ გამოდგეს საკმარისი. არადა, შარშან VII ადგილზე გასულმა "რუსთავმა" ბოლოსწინა ტურში რომ გაინაღდა ეროვნულ ლიგაში დარჩენა, 37 ქულა ეყო, აი, წლეულს კი, V-IX ადგილებზე მყოფ ერთდროულად ხუთ გუნდს ემუქრება პლეი აუტში მონაწილეობა...

კვირა, 10 ნოემბერი
ტორპედო-დილა   14:00
წყალტუბო. 26 მაისი. LIVE O2
64: +35 =11 -19, 115-74
I-II-III წრე: 2:0, 3:3, 2:2
დისკვალიფიკაცია: ბაქარ მირცხულავა (დილა)

ამ ტურს ისეთი მატჩი დაასრულებს, რომლის შედეგსაც ორივე გუნდისთვის ძალიან დიდი მნიშვნელობა რომ აქვს! თავად განსაჯეთ: თუ მასპინძლები ნანატრ გამარჯვებას იზეიმებენ, 43 ქულა გაუხდებათ და დარჩენილი მატჩებიდან გამომდინარე, თითქმის 99-პროცენტით გაინაღდებენ დარჩენას ეროვნულ ლიგაში.

წესით, არც ფრე უნდა იყოს ურიგო შედეგი "ტორპედოსთვის", გამომდინარე იქიდან, თუ როგორი რთული მატჩები ელოდებათ ამ ტურში "სიონსა" და "რუსთავს".

აი, თუ "დილამ" შეძლო და IV წრეში თავისი წარმატებული ასპარეზობა გააგრძელა, მაშინ გორელთა გუნდს ასევე  თითქმის 99-პროცენტით ექნება გარანტირებული მართლაც მშვიდი ფინიში. არადა, შეგახსენებთ, რომ ორკვირიანი პაუზის შემდეგ "დილამ" ჯერ თბილისის "დინამოს" უნდა უმასპინძლოს, ბოლო ტურში კი "რუსთავთან" უნდა ჩაატაროს გასვლითი მატჩი...

ამ მატჩში ერთმანეთს უნდა დაუპირისპირდნენ ის გუნდები, ჩემპიონატის დასკვნით წრეში რადიკალურად განსხვავებულად რომ ასპარეზობენ: ყველასთვის კარგად ნაცნობ მიზეზთა გამო, "ტორპედომ" მეოთხე წრეში, ექვსივე მატჩი წააგო, გიორგი ნემსაძის ხელმძღვანელობით მოასპარეზე "დილამ" კი ყველაზე მეტი - 13 ქულა დააგროვა.

   ბ
1.  დინამო (თბ) 33 20 6 7 64-29 66
2.  დინამო (ბთ) 33 19 7 7 52-28 64
3.  საბურთალო 33 18 7 8 56-33 61
4.  ლოკომოტივი 33 15 4 14 40-42 49
5.  დილა 33 11 8 14 36-39 41
6.  ჩიხურა 33 10 11 12 43-40 41
7.  ტორპედო 33 11 7 15 49-51 40
8.  სიონი 33 10 8 15 36-71 38
9.  რუსთავი 33 9 10 14 37-50 37
10.  ვიტ ჯორჯია 33 4 8 21 14-43 20

შენიშვნა:    n ჩემპიონთა ლიგის საკვალიფიკაციო;     
n ევროპალიგის საკვალიფიკაციო;
nპლეი ოფი ლიგა 2-ის II-III ადგილოსანთან; 
n  პირდაპირ ვარდება ლიგა 2-ში.  

ბომბარდირები
 ლ. კუტალია (დინამო თბ) 19
 ჯ. ფლამარიონი (დინამო ბთ) 16
 ი. სიხარულიძე (ლოკომოტივი) 13

686
მკითხველის კომენტარები / 0 /
მსგავსი ამბები
რუბრიკის სხვა სიახლეები
;