[წინათქმა] კოპა ამერიკა 2019. ამაღამ არ დაიძინოთ! ბრაზილია-არგენტინის ნაადრევი ფინალი! როგორ აპირებს ტიტე მესის შეჩერებას?

როცა ერთმანეთს ბრაზილია და არგენტინა ხვდებიან, იქ არასოდეს იკითხავს გულშემატკივარი - რა ტურნირია ან რომელი სტადიაა. ბრაზილია არგენტინის წინააღმდეგ - ეს უკვე ძალიან დიდი ამბავია და არ აქვს მნიშვნელობა, თუნდაც ამხანაგური მატჩი იყოს, ან ორივე გუნდს კრიზისული ედგას...

მით უმეტეს, უკვე ძალიან მაგარი აფიშაა, თუ ორი სამხრეთამერიკული გრანდი ერთმანეთს "კოპა ამერიკის" ნახევარფინალში უპირისპირდება. დიახ, სამწუხაროდ ნახევარფინალში, რადგან ასე "ინება" არგენტინის ნაკრებმა, რომელიც მეორე ადგილით გავიდა პლეი ოფში და მონასტერი არია, თორემ ტურნირის ორგანიზატორებს ყველაფერი ისე ჰქონდათ გათვლილი, რომ "სელესაო" და "ალბისელესტე" ერთმანეთს ფინალამდე არ უნდა შეხვედროდნენ...

მაგრამ ახლა ამას აღარ აქვს მნიშვნელობა - დღეს, თბილისის დროით 04:30 საათისთვის, ფეხბურთის გულშემატკივარი ძილს არად დაგიდევს და დაელოდება რეპორტაჟს ბელუ-ორიზონტედან, სადაც ეკვადორელი არბიტრი როდი ალბერტო სამბრანო სათამაშოდ გაიხმობს ბრაზილიისა და არგენტინის ეროვნულ გუნდებს.

ეს იქნება ორი სამხრეთამერკული გიგანტის 105-ე ჯახი. აქამდე ბრაზილიამ 42 თამაში მოიგო, არგენტინამ - 38, ხოლო 24 დაპირისპირება ფრედ დასრულდა. ბოლო 5 ურთიერთშეხვედრაშიც უპირატესობა "პენტაკამპეონების" მხარესაა - 3 მოგება, თითო ფრე და მარცხი.

ამ მომენტისთვის გუნდები ვერ არიან იდეალურ ფორმაში. ბრაზილიის ნაკრებმა ორი ნულოვანი ფრე ითამაშა და პარაგვაისთან პენალტების სერიაში გამარჯვებით გავიდა ნახევარფინალში. ისტორიულად, ბრაზილია შეტევასთან და სანახაობასთან ასოცირდება, რასაც ვერ ვიტყვით ტიტეს გუნდზე, რომლის საუკეთესო რგოლები  მეკარე და დაცვაა.

ცხადია, ბრაზილიის ნაკრების მთავარი საფიქრალი ლიონელ მესის შეჩერებაა. საინტერესოა, რას ფიქრობს ამ პრობლემაზე "სელესაოს" თავკაცი. "მესის თამაშიდან სრულად გამოთიშვა წარმოუდგენელია, შესაძლებელია მხოლოდ მისი მოქმედებების შეყოვნება. ძალიან დიდი იმედი მაქვს გულშემატკივართა მხარდაჭერის. ეს ფეხბურთელებს დამატებით ძალას შესძენდა", - თქვა ტიტემ.

რაც შეეხება არგენტინას, რომელსაც 1993 წლის შემდეგ არ მოუგია "კოპა ამერიკა", უნდა ითქვას, რომ ლიონელ სკალონის გუნდი ტურნირის მსვლელობისას შედიან ფორმაში. კოლუმბიასთან პირველ ტურში წაგების შემდეგ მესიმ და მისმა მეგობრებმა ერთი მატჩი ფრედ ითამაშეს, ხოლო შემდეგ ზედიზედ ორი მატჩი მოუგეს ყატარსა და ვენესუელას.

ვერ ვიტყვით, რომ ამ გუნდების ძლევა მსოფლიოს ორგზის ჩემპიონებისთვის საგმირო საქმე იყო, მაგრამ ამდენი კრიტიკისა და წნეხის შემდეგ ფსიქოლოგიურად დიდი შვება კი გახლდათ. და მაინც, ლაუტარო მარტინესის (რომელიც ახლა კარგ ფორმაშია), სერხიო აგუეროსა და მესის ხელში არგენტინა ვერანაირად არ იქნება აუტსაიდერი თუნდაც მასპინძელ ბრაზილიასთან დაპირისპირებაში.

მით უმეტეს, ტიტეს წინა ხაზზე არ ეყოლება რიჩარლისონი, ხოლო საყრდენ ზონაში დიდი კითხვის ნიშნის ქვეშაა ფერნანდინიოს ჯანმრთელობა. რაც შეეხება სკალონის, მას საბრძოლო შემადგენლობის გამოყვანა შეუძლია.

სავარაუდო შემადგენლობები
ბრაზილია: ალისონი - დანი ალვეში, ტიაგო სილვა, მარკინიუში, ფილიპე ლუიში - კაზემირო, ალანი - ევერტონი, კოუტინიო, გაბრიელ ჟეზუში - ფირმინო.
არგენტინა: არმანი - ფოიტი, პეცელა, ოტამენდი, ტალიაფიკო - დე პაული, პარედესი, აკუნია - მესი, აგუერო, მარტინესი.

966
მკითხველის კომენტარები / 0 /
მსგავსი ამბები
რუბრიკის სხვა სიახლეები
;