[წინათქმა] საქართველოს დ. ყიფიანის სახელობის თასი. აქ ფავორიტ(ებ)ი არ არსებობს!

თბილისის მერანი საბურთალოსთან დედაქალაქური სათასო დერბისთვის ემზადება


სამშაბათს და ოთხშაბათს საქართველოს დავით ყიფიანის სახელობის თასის გათამაშების მეოთხედფინალური მატჩები გაიმართება და ერთრაუნდიან დაპირისპირებებში ის 4 გუნდიც გაირკვევა, ამ საპატიო პრიზისათვის რომ გააგრძელებს ბრძოლას.

ვიდრე მეოთხედფინალურ მატჩებზე ვისაუბრებთ, მანამდე აუცილებლად გვინდა ყურადღების გამახვილება იმ ფაქტზე, რომ პირველად საქართველოს თასის 30-წლიან ისტორიაში, გათამაშების ამ ეტაპზე, რანგით IV (მეოთხე!) ლიგის ერთდროულად 2 წარმომადგენელი იასპარეზებს! ეგ კი არა, წილისყრამ ისე "ინება", რომ ლიგა 4-ის ეს ორი წარმომადგენელი, "გარეჯი" და "თბილისი სითი", ერთმანეთს უნდა დაუპირისპირდეს, რაც იმას ნიშნავს, რომ ამათგან ერთ-ერთს... ნახევარფინალში ვიხილავთ!..

საქართველოს სათასო ისტორიაში, რამდენიც გნებავთ, იმდენი სენსაცია მომხდარა: რანგით II თუ III ლიგის გუნდები ნახევარფინალამდე გასულან, II ლიგის  გუნდებს ფინალშიც უასპარეზიათ და ერთხელ (2011 წელს), სულაც თასიც აუღიათ ("გაგრა")...

თუმცა, როგორც უკვე აღვნიშნეთ, აქამდე არასდროს მომხდარა, როცა რანგით IVლიგის გუნდმა, ნახევარფინალში რომ უნდა იასპარეზოს. მოკლედ, დღეს და ხვალ, ძალზე საინტრიგო და, რაც მთავარია, უფავორიტო წყვილები გველოდება.

და ეს, იმის მიუხედავად, რომ დღევანდელ მატჩებში ეროვნული ლიგის გუნდებს უფრო დაბალი ლიგის წარმომადგენლებთან მოუწევთ პაექრობები...

სამშაბათი, 24 სექტემბერი
მერანი (მარტვილი)-ლოკომოტივი (თბილისი)  15:00
მარტვილი. მურთაზ ხურცილავა
დისკვალიფიკაცია: ირაკლი კომახიძე (ლოკომოტივი)

პირველი ნახევარფინალისტი მარტვილში უნდა გამოვლინდეს, სადაც რანგით III ლიგაში მოასპარეზე ადგილობრივმა "მერანმა", ეროვნული ლიგის ერთ-ერთ ამბიციურ გუნდს, თბილისის "ლოკომოტივს" უნდა უმასპინძლოს. თუ რაიმე სასწაული არ მოხდა, "მერანს", ფაქტობრივად, განაღდებული აქვს ეროვნულ ლიგა 2-ში აღზევება და ახლა უკვე თასის გათამაშებაშიც შეეცდება ანალოგიური წარმატებით ასპარეზობას.

მით უფრო, რომ გია გიგატაძის ხელმძღვანელობით მოასპარეზე "მერანში" არაერთი კვალიფიციური ფეხბურთელიც ასპარეზობს, რომელთა შორისაც, რაღა თქმა უნდა, 36 წლის შემტევი გაგა ჩხეტიანი უნდა გამოვარჩიოთ, რომელსაც ჯერ კიდევ... 15 წლის წინ აქვს საქართველოს თასის ფინალში ნათამაშები ("ტორპედოს" შემადგენლობაში).

ის ფაქტიც არ უნდა გამოგვრჩეს, რომ მარტვილელთა გუნდისთვის თასის გათამაშების ამ ეტაპზე გასვლა უცხო ნამდვილად არ არის. ეგ კი არა, 2016 წელს. როცა "მერანი" რანგით მეორე ლიგაში ასპარეზობდა, თასის ფინალშიც გავიდა, სადაც ქუთაისის "ტორპედოსთან" დამარცხდა.

"ლოკომოტივი" ამ ბოლო დროს ეროვნულ ლიგაში არასტაბილურად გამოდის: ლევან კორღალიძის დამოძღვრილმა გუნდმა ბოლო ხუთ მატჩში მხოლოდ 2 ქულა აიღო. თუმცა, დედაქალაქური გუნდი კვლავაც რჩება IV ადგილის დაკავების ერთ-ერთ კანდიდატად, რაც, მოვლენათა სასურველი სცენარით განვითარების შემთხვევაში, ევროპალიგის საგზურს იძლევა.

თუმცა, ეს უფრო სავარაუდო ვარიანტია, რეალური კი ის იქნება, "ლოკომოტივი" თასის გათამაშებაში თუ მიაღწევს წარმატებას. სხვათა შორის, "რკინიგზელებს" 3-ჯერ აქვთ საქართველოს თასი მოგებული, ეს კი, თბილისის "დინამოსა" და ქუთაისის "ტორპედოს" შემდეგ, მესამე მაჩვენებელია.

სამშაბათი, 24 სექტემბერი
მერანი (თბილისი)-საბურთალო (თბილისი)  18:00
თბილისი. სპაერი
დისკვალიფიკაცია: ელვინ ტერა (საბურთალო)

უცნაური დამთხვევაა: რანგით მეორე და მესამე ლიგებში, ორივე ლიდერს, ფაქტობრივად, განაღდებული აქვს პირველი ადგილი და, შესაბამისად, პლეი ოფის გარეშე აღზევებაც რანგით უფრო მაღალ ლიგაში და ამ ორივე გუნდს, სახელწოდებაც ერთნაირი აქვს.

ჰო, როგორც მარტვილის "მერანია" უკვე "ცალი ფეხით" ზედა ლიგაში გადასული, იგივე სიტუაციაა ეროვნულ ლიგა 2-შიც, სადაც თბილისის "მერანი" ბოლო, IV წრის წინ, 14 ქულით უსწრებს უახლოეს მდევარს!

აი, ასე მოუხდა სახელწოდების შეცვლა ამ დედაქალაქურ გუნდს ("ნორჩი დინამოს" სახელით რომ ასპარეზობდა), რომლის მთავარი მწვრთნელის, გამოცდილი სპეციალისტის, ავთანდილ შენგელიას განკარგულებაშიც, ერთიმეორეზე გამოცდილი და საქართველოს მასშტაბით, ერთიმეორეზე ტიტულოვანი ფეხბურთელები გამოდიან.

თავად განსაჯეთ: 30 წლის ლევან შარიქაძეს, 31 წლის რევაზ თევდორაძეს, 31 წლის გიორგი მიქაბერიძეს, 32 წლის გიორგი კახელიშვილს, 34 წლის რევაზ გეწაძეს, 34 წლის გიორგი დათუნაიშვილს, 34 წლის გოგა ფიფიას, 35 წლის დაჩი ფოფხაძესა და, რა თქმა უნდა, 39 წლის დავით ბოლქვაძეს ხომ სხვადასხვა გუნდის მაისურით თასის ფინალშიც არაერთხელ უასპარეზიათ და ბევრ მათგანს რამდენჯერმე გაუმარჯვია კიდეც!

აი, რაც შეეხება "საბურთალოს", გიორგი ჭიაბრიშვილის გუნდში, ამ მხრივ, მხოლოდ რამდენიმე ფეხბურთელს თუ აქვს ფინალში თამაშის გამოცდილება, ისიც, რა თქმა უნდა, სხვა გუნდების შემადგენლობაში: ომარ მიგინეიშვილს, გიორგი რეხვიაშვილს, ლევან კაკუბავას, გიორგი გაბედავას, თორნიკე გორგიაშვილს. ეგ კი არა, "საბურთალოსათვის" ეს არის... პირველი სათასო მეოთხედფინალი...

რატომღაც, ისე ხდებოდა, რომ ეს გუნდი თასის გათამაშებას, ნამეტნავად ადრეულ ეტაპზე ეთიშებოდა ხოლმე. თუმცა, ნურც იმ ფაქტს დავივიწყებთ, რომ დღესდღეობით საქართველოს მოქმედი ჩემპიონი "საბურთალო" მხოლოდ 6 წლის წინ გამოჩნდა საქართველოს ჩემპიონატის ჯერ პირველ, შემდეგ კი უმაღლეს ლიგაში...

ოთხშაბათი, 25 სექტემბერი
გარეჯი (საგარეჯო)-თბილისი სითი (თბილისი)  15:00
საგარეჯო. არსენ მეკოკიშვილი
დისკვალიფიკაცია: ზურაბ ძამსაშვილი (გარეჯი)

რუსთავი (რუსთავი)-ტორპედო (ქუთაისი)  15:00
რუსთავი. სფფ-ს ბავშვთა აკადემია. 15:00

621
მკითხველის კომენტარები / 0 /
მსგავსი ამბები
რუბრიკის სხვა სიახლეები
;