წინასათასო: ჩხეტიანი ტორპედოს ფანებს იხმობს

საქართველოს დავით ყიფიანის სახელობის თასის ნახევარფინალურ მატჩში ქუთაისის "ტორპედო" უპრინციპულეს მეტოქე თბილისის "დინამოს" უმასპინძლებს. მატჩამდე კომენტარი გააკეთა ქუთაისელთა მთავარმა მწვრთნელმა კახა ჩხეტიანმა:

"ხვალინდელი მატჩის მოლოდინი ძალიან დიდია. ორივე გუნდის შესრულებით კარგ და ლამაზ ფეხბურთს ველით. ვიმედოვნებ, ფინალში გავალთ. ფანები "ტორპედოსთვის" ბევრს ნიშნავს. მათ გარეშე მატჩის მოგება ძალიან რთულია და გუნდის წარმატებაში დიდი წვლილი შეაქვთ. ამიტომ, მოვუწოდებ მათ და ვთხოვ - ვისაც "ტორპედო" გიყვართ, მოდით სტადიონზე და გვერდში დაგვიდექით.

გუნდში მშვენიერი განწყობაა, მოტივაციაზე ხომ ლაპარაკიც ზედმეტია. ყველამ კარგად იცის, თუ რაოდენ მნიშვნელოვანია ფეხბურთელებისთვის ამ გუნდების დაპირისპირება. ფინალში გასასვლელად თავს არ დავზოგავთ", - ამბობს კახა ჩხეტიანი.

* * *
პირველად, საქართველოს თასის გათამაშების ისტორიაში, მესამელიგელი ნახევარფინალში თამაშობს...

"იმერეთმა" გუშინ მარტვილში, მურთაზ ხურცილავას სახელობის სტადიონზე ივარჯიშა. გუნდის კაპიტანმა გიორგი ხელაძემ კლუბის ვებგვერდზე კომენტარი გააკეთა.

"თასის ნახევარფინალამდე მისასვლელად რთული გზა გავიარეთ. იოლი თამაშები არც ერთ გუნდთან არ გვქონია, თუმცა გამარჯვებები მონდომებისა და სისწრაფის ხარჯზე მოვიპოვეთ. მეოთხედფინალში ლიგა 3-ის გამორჩეული გუნდი "ნორჩი დინამო" დავამარცხეთ.

რაც შეეხება "ჩიხურას", ძლიერი გუნდია, ეროვნულ ლიგაში ასპარეზობს და ამ შეხვედრას ორმაგად მოტივირებულნი ვხვდებით. ვფიქრობ, 1 ნოემბერს მოსული გულშემატკივარი ძალიან კარგ და დაძაბულ თამაშს იხილავს, თითოეული ჩვენგანი კი გამარჯვებისთვის იბრძოლებს", - ამბობს ხელაძე.

"გუნდი მობილიზებულია და ნახევარფინალისთვის სრული შემართებით ემზადება. დაგვიბრუნდნენ ალექსანდრე სულაძე და მათე აშვეთია. ბიჭებმა კარგად იცინიან, რომ "ჩიხურა" ძლიერი გუნდია. აქედან გამომდინარე, ისინი სრულად აცნობიერებენ, რომ ეს შეხვედრა მნიშვნელოვანია როგორც რაიონისთვის, ასევე გულშემატკივრებისთვის.

რაც შეეხება შანსებს, ეს ერთმატჩიანი შეხვედრაა და აქედან გამომდინარე ყველაფერი შეიძლება მოხდეს - ვიმედოვნებთ, გამარჯვება ჩვენ დაგვრჩება", - ეს "იმერეთის" მწვრთნელ დემურ ხაბურძანიას სიტყვებია.

* * *
საჩხერის "ჩიხურა" ბოლო წლებში ორჯერ გავიდა თასის ფინალში, მაგრამ ორჯერვე თბილისის "დინამოსთან" დამარცხდა. მატჩისთვის მზადებაზე "ლელომ" მცირე ინტერვიუ ჩაწერა "ჩიხურას" მთავარ მწვრთნელ სოსო ფრუიძესთან:

- მეტოქისადმი პატივისცემას გამოვხატავთ, მაგრამ ჩვენი მიზანი თასის აღებაა. ამიტომ, ამ ნახევარფინალური შეხვედრისთვის სრული სერიოზულობით ვემზადებით.

- მარტვილში თამაში რატომ გადაწყდა?
- ეს მასპინძლის, "იმერეთის" გადაწყვეტილება იყო. პრინციპში, საწინააღმდეგო არაფერი გვაქვს. ხელოვნურ საფარზე თამაში სასიამოვნო არ არის, მაგრამ მარტვილში ერთ-ერთი საუკეთესო ხალიჩაა.

- ყველა ფეხბურთელი მზადაა?
- ზაზა ჭელიძემ, რომელსაც ქუთაისის "ტორპედოსთან" კუნთი დაეჭიმა, უკვე ვარჯიში განაახლა. თორნიკე მუმლაძეს კი ისევ ტრავმა აწუხებს, მასაც კუნთი აქვს დაჭიმული და ვერ დაგვეხმარება. ყველა დანარჩენი მწყობრშია.

- ხონის "იმერეთზე" რა წარმოდგენა გაქვთ?
- თავის ლიგაში ნორმალურად თამაშობს, საკმაოდ დაბალანსებული და სწრაფი გუნდია. ცხადია, თავისი პლუს-მინუსები აქვს. ჩვენ სწორედ მინუსების გამოყენებას შევეცდებით.

- საერთოდ, ასეთ შეხვედრაში მაღალი ლიგის გუნდის ყველაზე დიდი მოწინააღმდეგე ზედმეტი თავდაჯერებულობა და კონცენტრაციის ნაკლებობაა...
- ნახევარფინალში შარშანაც ვითამაშეთ, იმ დროს ჩემპიონატში მეორე ადგილზე ვიყავით, მაგრამ მოვდუნდით და პირველლიგელმა "მერანმა" 3:0 მოგვიგო.

- ისე, ის თამაშიც მარტვილის სტადიონზე გაიმართა...
- ეს ყველას გვახსოვს და ვეცდებით, შარშანდელი შეცდომები აღარ გავიმეოროთ. "იმერეთში" საინტერესო ბიჭები არიან. მათ სურთ, დაამტკიცონ, რომ ნახევარფინალში შემთხვევით არ გასულან. ასე რომ, მძიმე თამაშს ველით.

ყოველდღიური სპორტული გაზეთი "ლელო"
1652
მკითხველის კომენტარები / 0 /
მსგავსი ამბები
რუბრიკის სხვა სიახლეები
;