[წინასამატჩო] რა გზას აირჩევს ვაისი: ცენტრფორვარდით თუ მის გარეშე?

D ჯგუფი. საქართველო-შვეიცარია. თბილისი. დინამო არენა. 18:00. LIVE I არხზე

შაბათს საქართველოს ეროვნული ნაკრები ევროპის ჩემპიონატის შესარჩევ ციკლს იწყებს. ვლადიმირ ვაისის გაწვრთნილი გუნდის მეტოქე შვეიცარიის უპირველესი გუნდი იქნება. ფაქტია, "ჯვაროსნებს" საშინაო ასპარეზზე ურთულესი გამოცდის ჩაბარება მოუწევთ.

ისიც ფაქტია, რომ მატჩის მნიშვნელობა უდიდესია. ქართველები ხასიათისა და ემოციის ხალხი ვართ. საქართველოს ნაკრებს კარგმა დასაწყისმა ფრთები შეიძლება შეასხას, მარცხმა კი... გვარგუნოს მორიგი იმედგაცრუება, რომელიც კარგა ხნის განმავლობაში გაგვყვება...

 

არა შაჩირითა ხოლო...

შვეიცარიის ნაკრებს თბილისურ შეხვედრაში დააკლდება უდავო ლიდერი - ჯერდან შაჩირი. ის ცოტას თამაშობს "ლივერპულში", მაგრამ შვეიცარიელთათვის მართლაც რომ უდიდესი ძალაა. ამის თქმის საფუძველს მის მიერ ეროვნულ გუნდში ჩატარებული არაერთი შესანიშნავი მატჩი გვაძლევს.

და მაინც, ვერავინ იტყვის, რომ შვეიცარიის ნაკრები ერთი კაცის გუნდია. აქ არიან ფეხბურთელები, რომელთაც ბევრი შეუძლიათ და, მათ შორის, შაჩირის შეცვლაც. ამ უკანასკნელისა და ჰარის სეფეროვიჩის არყოფნაში შეტევის ხაზში ძალიან ბევრი იქნება დამოკიდებული "შალკეს" მოიერიშე ბრილ ემბოლოზე, მით უმეტეს, თბილისში გამოფრენამდე შვეიცარიელებს ადნან მეჰმედიც გამოაკლდათ...

რაც შეეხება ემბოლოს, მას თავის დროზე ევროპის ერთ-ერთ ყველაზე ნიჭიერ ფეხბურთელად მიიჩნევდნენ, მაგრამ ფაქტია, ავანსები ბოლომდე ვერ გაამართლა. ამის მიუხედავად, შვეიცარიელთა შეტევაში ყველაზე დიდ საფრთხეს, ალბათ, ემბოლოსაგან უნდა ველოდოთ.

"ერთი კაცის" გუნდს ნამდვილად ვერ დავარქმევთ იმ ნაკრებს, რომელმაც ცოტა ხნის წინ ერთა ლიგის გათამაშების ჯგუფი მოიგო A დივიზიონის გუნდებს შორის. მაგრამ მოგებაცაა და მოგებაც. ალბათ, ჩვენი მეხსიერებიდან კარგა ხნის განმავლობაში არ ამოვა, თუ როგორ გაანადგურა (5:2) შვეიცარიამ ბელგია საშინაო ასპარეზზე.

ასე რომ, საქართველოს ნაკრებს საქმის დაჭერა მოუწევს ძალიან აწყობილ, ევროპული ფეხბურთის მიმდევარ ნაკრებთან, რომელიც მისხალ შეცდომასაც არ ჰპატიობს არცერთ ოპონენტს და არც ჩვენ გვაპატიებს.

შტეფან ლიხტშტაინერი, გრანიტ ჯაკა, ფაბიან შერი და სხვები - ამ სახელებს ქართველი გულშემატკივრის წინაშე წარდგენა ნამდვილად არ სჭირდება. შვეიცარიას ჰყავს ფეხბურთელები, რომელთაც ნამდვილად შეუძლიათ, კონკრეტულ სიტუაციაში საკუთარ თავზე აიღონ ლიდერობა.

როგორ სტრატეგიას აირჩევს პეტკოვიჩი?

ძალიან საინტერესოა, როგორ სტრატეგიას აირჩევს ამ მატჩისთვის შვეიცარიის ნაკრების სამწვრთნელო შტაბი. ზოგადად, ვლადიმირ პეტკოვიჩი არ არის ის მწვრთნელი, რომლის გუნდებიც მოწინააღმდეგეს თავქუდმოგლეჯილები უტევენ.

დავამატოთ ამას ისიც, რომ შესარჩევი ციკლის პირველი მატჩია და შვეიცარიის ნაკრები სტუმრად თამაშობს. ამიტომაც გვგონია, რომ მეტოქე ერთგვარად მოლოდინის ტაქტიკას აირჩევს - ანუ ჩაუსაფრდება ჩვენს შეცდომას, ჩაუსაფრდება და დაელოდება, როდის დაკარგავს კონცენტრაციას საქართველოს ეროვნული ნაკრები...

სამწუხაროდ, შვეიცარიას აქვს ამგვარი ფიქრისა და თამაშის სწორედ ასე აწყობის საფუძველი. თუ ერთა ლიგის შეხვედრებს არ ჩავთვლით, საქართველოს ნაკრების თამაშში მუდამ დგებოდა მონაკვეთი, როცა გვეკარგებოდა კონცენტრაცია.

ისე ჩანს, შვეიცარიის ნაკრების მთავარი მწვრთნელი ცოტათი უფრთხის კიდეც ჩვენს გუნდს. "ქართველები თამაშობენ რუსულ ფეხბურთს ბრაზილიური იდეით", - თქვა მან ამასწინათ. რა თქმა უნდა, ჩვენთვის ამ კომენტარში ძალიან არასასიამოვნოა სიტყვა - "რუსული", მაგრამ, მეორე მხრივ, პეტკოვიჩი საქართველოს ნაკრებს "ჯუჯებთან" ერთ რიგში რომ აყენებდეს, ნამდვილად არ გამოიყენებდა სიტყვას - "ბრაზილიური".

 

ლიდერი უნდა გამოჩნდეს!

ახლა საქართველოს ნაკრებზე ვთქვათ და დავსვათ ასეთი კითხვა - ვინ იქნება ნაკრების ლიდერი შვეიცარიასთან მატჩში?

ეს კითხვა ნამდვილად არ შეგვაშფოთებდა, გიორგი ჩაკვეტაძე რომ ჯანმრთელად ყოფილიყო, მაგრამ რას ვიზამთ, ფეხბურთი და ტრავმები არავის გაუყვია და უნდა შევეგუოთ იმას, რომ ამ ორ შეხვედრაში "გენტის" უნიჭიერესი შემტევი არ გვეყოლება.

რა თქმა უნდა, როცა ლიდერზე ვლაპარაკობთ, მხედველობაში გვყავს ისეთი მოთამაშე (ან მოთამაშეები), რომლებიც ბევრს ქმნიან მეტოქის კართან, თორემ ლიდერები არ აკლია საქართველოს ნაკრებს - თუნდაც ჯაბა კანკავასა და გურამ კაშიას დასახელება იქნება საკმარისი.

ახლა ის ვიკითხოთ, ვინ უნდა დაატრიალოს ქარიშხალი მოწინააღმდეგის კართან ჩაკვეტაძის არყოფნაში? თორნიკე ოქრიაშვილს ბოლომდე ვერ მოვთხოვთ ამას. კარგა ხანია, ის მინდორზე არ გასულა. კი, მონდომებით ვარჯიშობს და თავს არ ზოგავს. ისიც ვიცით, რას ნიშნავს მისთვის თითოეული სანაკრებო მატჩი, მაგრამ როცა ოფიციალურ თამაშებში პრაქტიკა გაკლია, ცოტა რთულია, ამ დონის მეტოქეებთან თქვა გადამწყვეტი სიტყვა...

ოქრიაშვილი, ვაისს, ალბათ, დროის კონკრეტულ მონაკვეთებში დასჭირდება. სხვანაირად რომ ვთქვათ, მან უფრო "ჯოკრის" ფუნქცია უნდა იტვირთოს. ასეთ სიტუაციაში კი განუზომლად იზრდება ჯანო ანანიძის როლი. გავრისკავთ და ვიტყვით, რომ ის უკვე კარგა ხანია, არ ყოფილა ასეთ სპორტულ ფორმაში. ბოლოს და ბოლოს, ანანიძემ იპოვა კლუბი, სადაც ის რიგითი ფეხბურთელი კი არა, გამოკვეთილი ლიდერია და ეს ფსიქოლოგიური თვალსაზრისითაც დიდი პლუსია.  

 

ვაისი არჩევანის წინაშე

საქართველოს ნაკრების მწვრთნელს მოუწევს ფიქრი იმაზე, თუ როგორ შეავსოს ცენტრალური თავდამსხმელის პოზიციაზე არსებული ვაკანსია. ეს ის პოზიციაა, სადაც მართლა ძალიან გვიჭირს. ამ დროისთვის გიორგი ქვილითაია "გენტის" მთავარ გუნდში თამაშის სიამოვნებას მოკლებულია...

ლევან მჭედლიძე დაშავებულია და ნაკრებშიც არ არის. ვატო არველაძემ შესანიშნავი გოლები შეაგდო პოლონეთის ჩემპიონატში, მაგრამ ბოლო დღეებში ის ინდივიდუალურად ვარჯიშობდა. გარდა ამისა, არც ის უნდა დავივიწყოთ, რომ არველაძეების საფეხბურთო დინასტიის მეოთხე წევრი ნაკრების დებიუტანტია...

ერთადერთი ცენტრფორვარდი, ვისაც აქვს სისტემატური სათამაშო პრაქტიკა თავის კლუბში, კვიპროსული "ანორთოსისის" შემტევი ნიკა კაჭარავაა. სავსებით შესაძლებელია, ვაისი ფიქრობდეს გამოკვეთილი ცენტრფორვარდის გარეშე თამაშზეც. თუ სლოვაკი სპეციალისტი ამ ვარიანტზე შეაჩერებს არჩევანს, მაშინ ჩვენ თავისუფლად შეგვიძლია ვნახოთ შეტევის ფორპოსტზე ვაკო ყაზაიშვილი - ეგრეთ წოდებული "ცრუ ცენტრფორვარდის" ამპლუაში.

არ ვიცით, რამდენად არიან მზად ამ ვარიანტისთვის შვეიცარიელები, მაგრამ ვაისის ასეთი არჩევანი სასწაული ნამდვილად არ იქნება, მით უმეტეს, საქართველოს ნაკრებს უკვე აქვს ასეთი თამაშის გამოცდილება.

ასეა თუ ისე, ჩვენი ტექნიკური არსენალი ბოლომდე უნდა ავამოქმედოთ და ამით პრობლემები შევუქმნათ შვეიცარიელთა მაღალ და ოდნავ მოუხეშავ ცენტრალურ მცველებს.

 

საქართველო


მეკარეები - გიორგი ლორია (მაგდებურგი, გერმანია), გიორგი მაკარიძე (სეტუბალი, პორტუგალია), როინ კვასხვაძე (ტორპედო);
მცველები - ოთარ კაკაბაძე (ლუცერნი, შვეიცარია), გურამ კაშია (სან ხოსე, აშშ), სოლომონ კვირკველია (ლოკომოტივი, რუსეთი), დავით ხოჭოლავა (შახტარი, უკრაინა), ჯიმი ტაბიძე (უფა, რუსეთი), გიორგი ნავალოვსკი (დინამო ბთ), ლევან ხარაბაძე (ციურიხი, შვეიცარია);
ნახევარმცველები - ჯაბა კანკავა (ტობოლი, ყაზახეთი), ჯანო ანანიძე (კრილია სოვეტოვი, რუსეთი), ოთარ კიტეიშვილი (შტურმი, ავსტრია), ლაშა პარუნაშვილი (ესბიერგი, დანია), ვაკო გვილია (გურნიკი, პოლონეთი), გიორგი მერებაშვილი (ვისლა პლოცკი, პოლონეთი), საბა ლობჟანიძე (რანდერსი, დანია), ჯაბა ჯიღაური (გრენობლი, საფრანგეთი), ვახტანგ ჭანტურიშვილი (ზლინი, ჩეხეთი), ნიკა კვეკვესკირი (ტობოლი, ყაზახეთი), ვაკო ყაზაიშვილი (სან ხოსე, აშშ), თორნიკე ოქრიაშვილი (უგუნდოდ);
თავდამსხმელები - გიორგი ქვილითაია (გენტი, ბელგია), ვატო არველაძე (კორონა, პოლონეთი), ნიკა კაჭარავა (ანორთოსისი, კვიპროსი).
მწვრთნელი: ვლადიმირ ვაისი

შვეიცარია


მეკარეები - ივონ მვოგო (ლაიპციგი, გერმანია), იონას ომლინი (ბაზელი), იან ზომერი (გლადბახი, გერმანია);
მცველები - მანუელ აკანჯი (დორტმუნდი, გერმანია), ლორის ბენიტო (იანგ ბოიზი), ნიკო ელვედი (გლადბახი, გერმანია), ტიმ კლოზე (ნორვიჩი, ინგლისი), მიხაელ ლანგი (გლადბახი, გერმანია), ტეფან ლიხტშტაინერი (არსენალი, ინგლისი), რიკარდო როდრიგესი (მილანი, იტალია), ფაბიან შერი (ნიუკასლი, ინგლისი);
ნახევარმცველები - ალბიან აიეტი (ბაზელი), კრისტიან ფასნახტი (იანგ ბოიზი), რემო ფროილერი (ატალანტა, იტალია), მარიო გავრანოვიჩი (დინამო ზაგრები, ხორვატია), ჯიბრილ სოვი (იანგ ბოიზი), რენატო შტეფენი (ვოლფსბურგი, გერმანია), გრანიტ ჯაკა (არსენალი, ინგლისი), კევინ მბაბუ (იანგ ბოიზი);
თავდამსხმელები - ბრილ ემბოლო (შალკე, გერმანია), დენის ზაკარია (გლადბახი, გერმანია), სტივენ ცუბერი (შტუტგარტი).
მწვრთნელი: ვლადიმირ პეტკოვიჩი

ფოტოები: gff.ge

2332
მკითხველის კომენტარები / 0 /
მსგავსი ამბები
რუბრიკის სხვა სიახლეები
;