[ვრცელი მიმოხილვა] ფიჯი... ბორჯღალოსნების წლის პირველი წაგება

ფიჯი-საქართველო 37:15

ფიჯი: (15-9) მურიმურივალუ (ტ.ნანგუსა 66), გონევა, რადრანდრა, ვატუმბუა, ნადოლო, ვოლავოლა (ვეიტოკანი 80), სენილოლი (ლომანი 62); (1-8) მაჰაფუ (მავი 71), ვერე"მალუა (ნავუმა 80), საულო (ტავაკე 64), რატუნიარავა (ნამბოუ 72), ნაკარავა, ვანქანიმბოროტუ, ქერა, მატა (ნ.ნაგუსა 62)
6ლ: სენილოლი (2) ვატუმბუა, ლომანი (2) რადრანდრა. 2გ, ს: ნადოლო

საქართველო: (15-9) მათიაშვილი, მჭედლიძე (კვირიკაშვილი 68), კაჭარავა, მალაღურაძე (კვესელაძე 66), თოდუა, ხმალაძე, ლობჟანიძე (ბეგაძე 55); (1-8) ასიეშვილი (ჟვანია 55), მამუკაშვილი (ჭყოიძე 71), ჩილაჩავა (მელიქიძე 41), ნემსაძე, მიქაუტაძე (ჭეიშვილი 52), ცუცქირიძე, კოლელიშვილი, გიორგაძე (სუთიაშვილი 50)
2ლ: კოლელიშვილი, თოდუა; ს, გ: მათიაშვილი
მსა37ჯი: ჟერომ გარსე (საფრანგეთი)

საქართველოს ნაკრებმა ივნისის ტესტების მეორე მატჩი სუვაში, მასპინძელთა ნაკრებთან 15:37 წააგო. შედეგად, წყნარი ოკეანის თასის მფლობელი ფიჯის ნაკრები გახდა.

ჩვენმა გუნდმა თავის შესაძლებლობები (ისიც არასრულად) მხოლოდ პირველ ტაიმში გამოავლინა და, რომ არა ხშირი შეცდომები, ანგარიშში სხვაობა ჩვენს სასარგებლოდ უფრო მეტი უნდა ყოფილიყო, ვიდრე ხუთი ქულაა. "ბორჯღალოსნებმა" მძლავრ, თითქმის ოპტიმალური, უძლიერესი შემადგენლობით მოთამაშე ფიჯელებს პირველ ნახევარში ბევრი არაფერი დაუთმეს და შესვენების წინ 15:10 დაწინაურდნენ.

საგულისხმოა, რომ შერკინებაში პირველ ტაიმში ყველაფერი რიგზე იყო. შესაბამისად, შეიძლება ითქვას, რომ თამაშსაც ვაკონტროლებდით და მიუხედავად იმისა, რომ მეტოქე თავიდანვე დაწინაურდა, ანგარიშის გათანაბრება და წინ გასვლაც მოვახერხეთ.

პირველი ლელო "ბორჯღალოსნებმა" ბევრჯერ ნაცადი ხერხით, მოლით გაიტანეს და ამ მეთოდს კიდევ სამჯერ მიმართეს, მაგრამ ფიჯელებმა, როგორც ჩანს, მატჩის წინ ჩვენი ამ იარაღის განეიტრალებაზე ბევრი იმუშავეს. მასპინძლებმა სამჯერვე უკან დაგვახევინეს და მეტოქის ლელოსთან საფრთხე ვეღარ შევქმენით.

სამწუხაროდ, მეორე ნახევარში ყველაფერი თავდაყირა დადგა. განსაკუთრებით მას შემდეგ, რაც პირველი ხაზი შეიცვალა, შერკინებაში უპირატესობა დავკარგეთ და გუნდი მთლიანად განიარაღებული გამოიყურებოდა. შეცდომას შეცდომა მოსდევდა და ფიჯელები ანგარიშში სხვაობას მეთოდურად ზრდიდნენ.

მასპინძლებმა ექვსი ლელო გაგვიტანეს და აქედან ოთხი ცხრა ნომრების, ჰენრი სენილოლისა და მისი შემცვლელის, ფრენკ ლომანის ანგარიშზეა.

ეს დამაფიქრებელი ფაქტია. ფიჯელი ცხრა ნომრების ასეთი შედეგიანობა ჩვენი გუნდისთვის მოულოდნელობაა, მიუხედვად იმისა, რომ მათ ოსტატობას ვერაფრით დაუწუნებ. ერთი სიტყვით, ჩვენმა მორაგბეებმა მეტოქის ზორბა, ტექნიკურ გარემარბებთან და შუამარბებთან ბრძოლაში ცხრა ნომრებს ჯეროვანი ყურადღება ვერ მიაქციეს და ისინიც წარმოქმნილ სივრცეებს შესანიშნავად იყენებდნენ.

საქართველოს ნაკრებმა, როგორც უკვე ვთქვით, თამაში აქტიურად დაიწყო და ანგარიში სოსო მათიაშვილმა მე-9 წუთზე საჯარიმოდან გახსნა - 3:0.

ფიჯელებმა ხუთი წუთის შემდეგ პირველი ლელო მიითვალეს. საკუთარი ლელოდან ხუთ მეტრში შერკინება მოვიგეთ, მაგრამ რვა ნომრის პოზიციაზე მოთამაშე ოთარ გიორგაძემ ბურთის გამოტანა ვერ მოახერხა და ის სწორედ სენილოსლის ნადავლი შეიქნა, რომელმაც ჩათვლის მოედანში დაამიწა. ბენ ვოლავოლამ ვერ გარდასახა - 5:3.

ორი წუთი არ იყო გასული, როცა მოედნის ცენტრში ფიჯელებმა ხაზი გაჭრეს და თავი ისევ სენილოლიმ გამოიჩინა. ესეც ვერ გარდასახეს და ანგარიშში სხვაობა მხოლოდ ხუთი ქულით გაიზარდა - 10:3.

ამის შემდეგ, მოედანზე ჩვენი გუნდი დომინირებდა. 23-ე წუთზე 5-მეტრიანი დერეფნიდან მოლი ავაგორეთ და ლელო ვიქტორ კოლელიშვილმა მიითვალა. მათიაშვილის გარდასახვის შემდეგ კი ანგარიში გათანაბრდა - 10:10.

ტაიმის დასრულებას ერთი წუთი აკლდა, როცა მეტოქის 22-მეტრიანი ზონის ხაზთან მგეზავმა ლაშა ხმალაძემ ჩვეულ სტილში, ცრუ მანევრით ხაზი გაჭრა და ფრთაზე, კიდესთან უმეთვალყურეოდ დატოვებულ გარემარბ ალექსანდრე თოდუას გადააწოდა, რომელსაც ლელოს გატანა აღარ გასჭირვებია. მათიაშვილმა ვერ გარდასახა - 15:10. ასე დასრულდა პირველი ტაიმი. მეორე ტაიმში კი მოსაყოლი არაფერია.

საქართველოს ნაკრები ახლა იაპონიაში გადაინაცვლებს, სადაც 23 ივნისს, ტოიოტა სითის სტადიონზე მასპინძელთა ეროვნულ გუნდს დაუპირისპირდება.

წყნარი ოკეანის თასი - 2018

თ მ ფ წ ბ ქ(პ)
1. ფიჯი 2 2 0 0 +24 10(2)
2. ტონგა 2 1 0 1 +9 5(1)
3. საქართველო 2 1 0 1 -21 4(0)
4. სამოა 2 0 0 2 -12 1(0)

ივნისის ტესტების მეორე სათამაშო დღეს რამდენიმე მოულოდნელი ანგარიში დაფიქსირდა. იაპონიის ნაკრებმა, რომელიც ჩვენი მომდევნო მეტოქეა, კობეში იტალიის ნაკრებთან 22:25 წააგო. თუმცა, ბევრად მოულოდნელი და სენსაციური გამარჯვება მოიპოვა აშშ-ის ნაკრებმა, რომელმაც შინ შოტლანდიის ეროვნული გუნდის დამარცხება შეძლო - 30:29.

საკუთარ მოედანზე დამარცხდა საქართველოს ნაკრების მეტოქე მსოფლიოს თასის გათამაშებაში ავსტრალიის ეროვნული გუნდი. "ვოლაბებს" ირლანდიის ნაკრებმა მოუგო - 26:21. KOBE

იაპონია-იტალია 22:25
ახ. ზელანდია-საფრანგეთი 26:13
ავსტრალია-ირლანდია 21:26
სამ. აფრიკა-ინგლისი 23:12
არგენტინა-უელსი 12:30
კანადა-რუსეთი 20:43
აშშ-შოტლანდია 30:29
გერმანია-პორტუგალია 16:13
ტონგა-სამოა 28:18

23 ივნისი
იაპონია-საქართველო
ფიჯი-ტონგა
ავსტრალია-ირლანდია
სამ. აფრიკა-ინგლისი
ახ. ზელანდია-საფრანგეთი
კანადა-აშშ
არგენტინა-შოტლანდია

ყოველდღიური სპორტული გაზეთი "ლელო"
1167
მკითხველის კომენტარები / 0 /
მსგავსი ამბები
რუბრიკის სხვა სიახლეები
;