წყალბურთი. ბოლო მატჩები ევროპის თასამდე

საქართველოს წყალბურთელ ვაჟთა ნაკრების ლეგიონერმა წევრებმა ევროპის თასის გათამაშების წინ სხვადასხვა ქვეყნის ეროვნულ ჩემპიონატებში ბოლო შეხვედრები გამართეს.

იტალიაში ჩვენი სამი ლეგიონერი გამოდის. მარკო ელაჩას "ორტიჯია" (სირაკუზა) სერია A1-ის ბინადარია, რომელმაც სტუმრად "პოსილიპოს" აჯობა 11:9 (ერთი ბურთი ელაჩამ გაიტანა) და 14 ტურის შემდეგ 27 ქულით გათამაშების ცხრილის მეოთხე საფეხურზე იმყოფება.

სერია A2-ის სამხრეთ ლიგაში თამაშობს რომის "ვის ნოვა". ანდრია ბითაძის ეს გუნდი გასულ უქმეებზე "პესკარას" დაუზავდა - 9:9. ანდრიას ანგარიშზეა ერთი გოლი და მეტოქეთა შვიდი გაძევება. ცხრა ტურის შემდეგ 13 ქულით "ვის ნოვა" პესკარასთან" ერთად მეხუთე-მეექვსე ადგილებს იყოფს.

სამხრეთ ლიგაშია რევაზ იმნაიშვილის "სორი", რომელმაც გასვლით მატჩში "ჩიავარი" დაამარცხა 4:3 (ერთი გოლი ქართველმა წყალბურთელმა მიითვალა) და 12 ქულით მე-7 ადგილზეა.


რეგიონალნა ლიგაში (ადრიატიკის ჩემპიონატი) ოთხი ქართველი თამაშობს. ამას წინათ, საქართველოს ნაკრებს თურქეთში შეკრებაზე ახლდნენ მეკარე ნიკოლოზ შუბლაძე და დამირ ცრეპულია.

გასულ შაბათს მათი გუნდი "პრიმორაცი" დუბროვნიკში A1 ლიგის ლიდერ "იუგთან" ვერაფერს გახდა - 9:14. ცრეპულია თანაგუნდელებს 5 გოლით შეეწია, მაგრამ მარცხისგან მაინც ვერ იხსნა. "პრიმორაცს" 12 ქულით მე-7 ადგილი უკავია.

A2 ლიგაში გიორგი მესხისა და ნიკოლოზ შუშიაშვილის "შაბაცმა" შინ "ვალიევოს" 17:10 აჯობა. მესხმა ერთი პენალტი გაიტანა. "შაბაცი" 22 ქულით მესამე ადგილზეა, ოღონდ, კონკურენტებზე ერთი მატჩით ნაკლები აქვს ჩატარებული.

ალექსანდრე ყაზახიშვილი ბერლინში ცხოვრობს და ბუნდესლიგის კლუბ "ნოიკილნში" გამოდის. მისი გუნდი მე-11 ტურში შინ "პოდსტამს" დაუზავდა - 8:8. ქართველი წყალბურთელი ერთ საგოლე გადაცემას დასჯერდა. ბერლინელები 11 ქულით მე-4 ადგილზე არიან.

ყოველდღიური სპორტული გაზეთი "ლელო"
994
მკითხველის კომენტარები / 0 /
მსგავსი ამბები
რუბრიკის სხვა სიახლეები
;