წყალბურთი. გალაქტიონი და ახალგაზრდების გეგმები

წლეულს 11-14 მაისს ბულგარეთი 1999 წელს დაბადებულ წყალბურთელ ვაჟთა ევროპის ჩემპიონატის შესარჩევ ტურნირს უმასპინძლებს.

ფინალში მოსახვედრად ბულგარეთის, გერმანიის, ჰოლანდიისა და საქართველოს ნაკრები გუნდები იბრძოლებენ. ჩვენი ქვეყნის 19-წლამდელთა ნაკრებს გალაქტიონ ლაითაძე ხელმძღვანელობს.

- შესარჩევი ტურნირისთვის მზადება ჯერ კიდევ შარშან ოქტომბრიდან დავიწყეთ, - გვითხრა მან. - თავი მოვუყარეთ 1999 წელს დაბადებულ 12-მდე მოთამაშეს, მაგრამ მათგან 2 ან 3 თუ მოხვდება გუნდში. უფრო მეტად 2000 და 2001 წლებში დაბადებულებს თუ დავეყრდნობით, მაგრამ აქაც გვაქვს პრობლემები:

ამ ბიჭების უმრავლესობა წლეულს სკოლას ამთავრებს და ეროვნული გამოცდებისთვის ემზადება. შეღავათებს მათ არავინ აძლევს და, ცხადია, ვარჯიშების გაცდენისთვის ჩვენც ვერ ვსჯით.

საწყლოსნო კომპლექს "ოლიმპიკის" აუზში ბევრი გუნდი ვარჯიშობს, ამიტომ წვრთნისთვის მხოლოდ საათ-ნახევარი გვქონდა გამოყოფილი. ფედერაციის თანადგომითა და დახმარებით ჯერ ბათუმში გავემგზავრეთ, მერე სერბეთში ვიყავით ექვსდღიან საწვრთნელ შეკრებაზე და თანატოლთა რამდენიმე გუნდთან ამხანაგური მატჩებიც გავმართეთ. წახკაძორში საერთო-ფიზიკური მომზადება გავიარეთ. 16 აპრილს უნგრეთს მივაშურებთ და იქაც ექვსი დღე დავრჩებით.

ვარჯიშებთან ერთად ტესტმატჩებსაც გავმართავთ. აპრილის მიწურულს უკრაინის საერთაშორისო ტურნირში ჩავებმებით, რომელშიც უკრაინისა და ბელარუსის 19-წლამდელთა ნაკრებებთან ერთად უფროსების გუნდიც იქნება.

4-6 მაისს თბილისი უმასპინძლებს საერთაშორისო ტურნირს, რომელშიც რუს, ბელარუს და რუმინელ თანატოლებს დავუპირისპირდებით, შემდეგ კი ბულგარეთში გავემგზავრებით. მზადების ბოლო ეტაპზე ჩვენთან ერთად ივარჯიშებენ ქართველი ლეგიონერებიც. პრობლემების მიუხედავად, ვეცდებით, ქომაგები არ გავაწბილოთ...

19-წლამდელთა ნაკრებში ქართველ ლეგიონერთა შორის იქნება ნიკოლოზ შუშიაშვილი, რომელიც გიორგი მესხთან ერთად სერბეთის "შაბაცის" ღირსებას იცავს. ამ გუნდმა წარმატებით ითამაშა ადრიატიკის ჩემპიონატის მეორე ლიგაში და ზედა ეშელონის საგზური დაიმსახურა. ამ წარმატებაში ქართველებსაც მიუძღვით წვლილი, რომლებმაც გოლებითაც არაერთხელ გამოიჩინეს თავი.

შუშიაშვილი ახლა ახალგაზრდულ ნაკრებთანაა, მესხი კი "შაბაცთან" ერთად სერბეთის ჩემპიონატში ჩაება. პირველ ტურში შაბაცელებმა სტუმრად "ზემუნს" სძლიეს, მეორე ტურში კი შინ "ნაისს" აჯობეს 11:5 (ამ მატჩებში მესხს გოლი არ გაუტანია).

"შაბაცი" 6 ქულით "ცრვენა ზვეზდასთან" პირველ-მეორე ადგილებს იყოფს. 4-4 ქულით "პარტიზანი" და "ვოივოდინა" მესამე-მეოთხე ადგილებს ინაწილებენ. 14 აპრილს "შაბაცი" სტუმრად "რადნიჩკის" შეხვდება","ცრვენა ზვეზდა" კი შინ "პარტიზანს" მიიღებს...

სლოვაკეთში დამთავრდა წყალბურთელ ვაჟთა ეროვნული ჩემპიონატის სუპერლიგის რეგულარული პირველობა. ფინალური ოთხეულის ბოლო მატჩში გიორგი მაგრაქველიძის "ნოვაკმა" ბრატისლავის "სლავია" დაამარცხა მინიმალური ანგარიშით - 7:6 (1:2, 1:1, 2:3, 3:0), ხოლო კოშიცეს "კორნეტსმა" თანაქალაქელ "მოდრი დრაჩის" მოუგო - 10:4.

გუნდების სატურნირო მდგომარეობა ასეთია: "ჰორნეტსი" - 31 ქულა (262:96), "ნოვაკი" - 29 (271:113), "სლავია" - 24 (209:140), მოდრი დრაჩი" - 11 (163:212). ნახევარფინალში სამ მოგებამდე ითამაშებენ: "ნოვაკი"-"სლავია", "ჰორნეტსი"-"ნოვი დრაჩი".

ყოველდღიური სპორტული გაზეთი "ლელო"
804
მკითხველის კომენტარები / 0 /
მსგავსი ამბები
რუბრიკის სხვა სიახლეები
;