წყალბურთი. ევროპის თასი ფავორიტით დავიწყეთ

გუშინ უნგრეთში დაიწყო ევროპის თასი, რომელიც წლეულს პირველად თამაშდება. მამაკაცებში საპრიზო ადგილებისთვის კონტინენტის 14 გუნდი იბრძოლებს. წილისყრით ისინი სამ ჯგუფში გადანაწილდნენ:

A ჯგუფი: (მასპინძელია უნგრეთი): უნგრეთი, ესპანეთი, საფრანგეთი, რუმინეთი, საქართველო
B ჯგუფი: (სპლიტი, ხორვატია): სერბეთი, საბერძნეთი, ხორვატია, ჰოლანდია, მალტა
c ჯგუფი: (პალერმო, იტალია): მონტენეგრო, იტალია, რუსეთი, გერმანია.

საქართველოს ნაკრები ამ შეჯიბრებისთვის მონდომებით ემზადებოდა სახელოვანი ქართველი წყალბურთელის - რევაზ ჩომახიძის ხელმძღვანელობით.

გუნდმა ერთი მოსამზადებელი შეკრება დუბროვნიკში გაიარა და იქაურ კლუბებთან ამხანაგური მატჩებიც გამართა. ერთი კვირის წინათ სტამბოლს ეწვია.

სპარინგპარტნიორობა თურქეთის ნაკრებმა გაუწია. აღსანიშნავია ისიც, რომ ჩვენი გუნდის წევრთა უმრავლესობა უცხოურ კლუბებში გამოდის და კარგი სათამაშო პრაქტიკა აქვს.

რევაზ ჩომახიძემ მადიარების ქვეყანაში ევროპის თასზე სათამაშოდ 13 წყალბურთელს უხმო.

ესენი არიან: ირაკლი რაზმაძე (`დინამო" თბილისი), ნიკოლოზ შუბლაძე (`პრიმორაცი", მონტენეგრო), ბექა ქავთარაძე (`ლოკომოტივი", თბილისი), ზურაბ ჩიკვაიძე (`ლოკომოტივი"),

მარკო ელაჩა (`ორტიჯია", იტალია), მიხეილ ბაღათურია (`დინამო"), რევაზ იმნაიშვილი (`სორი", იტალია), დამირ ცრეპულია (`პრიმორაცი", მონტენეგრო), ზურაბ რურუა (`დინამო"),

გიორგი მესხი (`შაბაცი". სერბეთი), გიორგი მაგრაქველიძე (`ნოვაკი", სლოვაკეთი), კოსტანტინე გეგელაშვილი (`ლოკომოტივი"), ანდრია ბითაძე (`ვის ნოვა", იტალია).

საქართველოს ნაკრებისთვის ევროპის თასზე მონაწილეობას უდიდესი მნიშვნელობა აქვს, რადგან ჩვენები 24 თებერვალსა (შინ) და 3 მარტს (სტუმრად) ევროპის ჩემპიონატის ფინალურ ეტაპზე მოსახვედრად პლეი ოფში ისრაელის ეროვნულ გუნდს დაუპირისპირდებიან.


საქართველო-უნგრეთი 5:16
0:6, 1:4, 1:5, 3:1

საქართველო: შუბლაძე, ქავთარაძე, ცრეპულია, იმნაიშვილი, მესხი (1), ელაჩა (1), ბითაძე (1), ბაღათურია (1), რურუა (1), გეგელაშვილი, მაგრაქველიძე, ჩიქვინიძე, რაზმაძე.

უნგრეთი: ნადი, ანდიალი (1), მანჰერჟი (4), ზალანკი (2), კოვაჩი (1), მეჟეი (2), დ. იანშიკი, ზ. იანშიკი (3), ერდელი (2), სალამონი (1), ბედო, ბატორი, ფოგელი.

უნგრელთა დახასიათებას არ შევუდგებით, ვიტყვით მხოლოდ, რომ მადიარებმა ოლიმპიური თამაშები 9-ჯერ მოიგეს, 3-3-ჯერ კი ვერცხლისა და ბრინჯაოს მედლები მოიპოვეს, მსოფლიოს ჩემპიონატებში 3 ოქროს, 7 ვერცხლისა და ერთი ბრინჯაოს მედალი დაიმსახურეს, ევროპის ჩემპიონატებში კვარცხლბეკის უმაღლეს საფეხურზე 12-ჯერ ავიდნენ, ექვსჯერ კი მეორე-მესამე ადგილებს დასჯერდნენ.

თავიდანვე ცხადი იყო, რომ ფავორიტები მასპინძლები იყვნენ და მათ მატჩის ბედი პირველსავე პერიოდში გადაწყვიტეს, როცა 6:0 დაწინაურდნენ. მეორე და მესამე რვაწუთიანი მონაკვეთებიც მათ მოიგეს ერთნაირი ანგარიშით - 5:1.

დასკვნით რაუნდში ქართველმა წყალბურთელებმა დაცვასა და თავდასხმაში უკეთ ითამაშეს და მადიართა მეკარე ნადის სამჯერ გამოატანინეს ბურთი ბადიდან, ორჯერ კი ელაჩას და ბაღათურიას ძლიერი დარტყმების შემდეგ უნგრელები გოლებისგან ძელმა იხსნა. საბოლოოდ მასპინძლებმა 16:5 გაიმარჯვეს. ჩვენს ჯგუფში რუმინეთმა საფრანგეთს აჯობა - 7:4.

16 თებერვალი
საქართველო-ესპანეთი 21:30
უნგრეთი-რუმინეთი 23:00

17 თებერვალი
რუმინეთი-საქართველო 13:00
საფრანგეთი-ესპანეთი 14:30
საფრანგეთი-საქართველო 21:30

18 თებერვალი
ესპანეთი-რუმინეთი 13:00
უნგრეთი-საფრანგეთი 14:30

ყოველდღიური სპორტული გაზეთი "ლელო"
1131
მკითხველის კომენტარები / 0 /
მსგავსი ამბები
რუბრიკის სხვა სიახლეები
;