წყალბურთი. ეროვნული ნაკრები ტესტმატჩებს სლოვაკეთსა და ჰოლანდიაში გამართავს

გუშინ საქართველოს წყალბურთელ ვაჟთა ნაკრები მთავარი მწვრთნელის - რევაზ ჩომახიძის ხელმძღვანელობით ხუთდღიან საწვრთნელ შეკრებაზე სლოვაკეთს გაემგზავრა.

ვარჯიშების გარდა, ჩვენი ბიჭები (ირაკლი რაზმაძე, ნიკოლოზ შუბლაძე, დამირ ცრეპულია, მარკო ელაჩა, ლევან ჩიქვინიძე, ანდრია ბითაძე, კონსტანტინე გეგელაშვილი, მიხეილ ბაღათურია, ზურაბ რურუა, ნიკა შუშიაშვილი, გიორგი მესხი, გიორგი მაგრაქველიძე, ბექა ქავთარაძე, რევაზ იმნაიშვილი, ალექსანდრე რუსიშვილი, ხვიჩა ჯახაია, მწვრთნელები - გელა ტუკვაძე, თამაზ კუტივაძე) სლოვაკებთან ორ ტესტმატჩსაც გამართავენ, მერე ჰოლანდიაში გადაინაცვლებენ, სადაც 26 და 28 ივნისს მასპინძლებს დაუპირისპირდებიან.

სამშობლოში დაბრუნების შემდეგ ქართველი წყალბურთელები 6-8 ივლისს საწყლოსნო კომპლექს "ოლიმპიკში" თბილისის თასზე სლოვაკებს, თურქებსა და ყაზახებს გაუწევენ მეტოქეობას. ამ ტურნირით დამთავრდება მზადება ევროპის 33-ე ჩემპიონატის დასკვნითი ბატალიებისთვის, რომლებიც 14-28 ივლისს კატალონიის დედაქალაქ ბარსელონაში გაიმართება.

პირენეიში წყალბურთელ ვაჟთა 16 საუკეთესო გუნდი იბრძოლებს მედლებისთვის. გადამწყვეტ ეტაპზე თამაშის უფლება რვა ნაკრებმა ორი წლის წინათ ბელგრადში გამართულ ჩემპიონატში პირველი-მერვე ადგილების დაკავებით დაიბევა, ხოლო დანარჩენი ვაკანსიები პლეი ოფის გამარჯვებულებმა შეავსეს. საქართველო ისრაელის ძლევით გადამწყვეტ რაუნდში ზედიზედ მესამედ იასპარეზებს.

ფინალისტები წილისყრით ოთხ ჯგუფში გადანაწილდნენ. საქართველოს ნაკრები A ჯგუფშია, სადაც მეტოქეობას გაუწევს კონტინენტის პირველობების 12-გზის გამარჯვებულს, ექვსი ვერცხლისა და ამდენივე ბრინჯაოს მედლის მფლობელ უნგრეთს, ევროპის სამგზის ჩემპიონს, ორგზის ვერცხლისა და ექვსგზის ბრინჯაოს პრიზიორ იტალიას, კონტინენტის პირველობების სამგზის მეორე და ორგზის მესამეადგილოსან გერმანიას.

მართალია, ძლიერი და ტიტულოვანი გუნდები სხვა ჯგუფებშიც არიან, მაგრამ ამ მხრივ საქართველოს მაინც განსაკუთრებული პატივი ერგო.
უკვე ცნობილია ჯგუფური ეტაპის შეხვედრათა განრიგიც.

A ჯგუფი. გერმანია, საქართველო, იტალია, უნგრეთი

16 ივლისი. საქართველო-უნგრეთი, გერმანია-იტალია
18 ივლისი. გერმანია-საქართველო, უნგრეთი-იტალია
20 ივლისი. გერმანია-უნგრეთი, საქართველო-იტალია

B ჯგუფი. მონტენეგრო, მალტა, საფრანგეთი, ესპანეთი
C ჯგუფი. ხორვატია, თურქეთი, ჰოლანდია, საბერძნეთი
D ჯგუფი. რუსეთი, სერბეთი, სლოვაკეთი, რუმინეთი.

16 ივლისი. მონტენეგრო-საფრანგეთი, მალტა-ესპანეთი (B), თურქეთი-საბერძნეთი, ხორვატია-ჰოლანდია (ჩ), რუსეთი-სლოვაკეთი, სერბეთი-რუმინეთი (D);
18 ივლისი. მონტენეგრო-მალტა, ესპანეთი-საფრანგეთი (B), ხორვატია-თურქეთი, საბერძნეთი-ჰოალნდია (ჩ), რუმინეთი-სლოვაკეთი, რუსეთი-სერბეთი (D);
20 ივლისი. მალტა-საფრანგეთი, მონტენეგრო-ესპანეთი (B), თურქეთი-ჰოლანდია, ხორვატია-საბერძნეთი (ჩ), სერბეთი-სლოვაკეთი, რუსეთი-რუმინეთი (D).

ჯგუფების გამარჯვებულები პირდაპირ მეოთხედფინალში გავლენ. მათთან შეხვედრის უფლების მოსაპოვებლად მეორე-მესამედგილოსნები შეხვდებიან ერთმანეთს: A2-ჩ3, A3-ჩ2, B2-D3, B3-D2. ჯგუფების მეოთხეადგილოსნები XIII-XVI ადგილებს გაითამაშებენ.

ყოველდღიური სპორტული გაზეთი "ლელო"
769
მკითხველის კომენტარები / 0 /
მსგავსი ამბები
რუბრიკის სხვა სიახლეები
;