წყალბურთი. ვიცე-ჩემპიონები, თასის ფინალისტები...

გასულ უქმეებზე საქართველოს წყალბურთელ ვაჟთა ნაკრების წევრებმა, რომლებიც ევროპულ კლუბებში თამაშობენ, მორიგი ტურის მატჩები ითამაშეს. საგულისხმოა, ჩვენებურთა ყველა გუნდმა წარმატებას მიაღწია და ქართველებსაც, თითქმის, უგოლოდ სარბიელი არ დაუტოვებიათ.

იტალიით დავიწყოთ, სადაც ჩვენი ეროვნული გუნდის სამი მოთამაშე გამოდის. სერია A1-ში მარკო ელაჩას "ორტიჯიამ" შინ, სირაკუზაში, "ლაციოს" 8:5 აჯობა. ელაჩამ სამი გოლი მიითვალა. მისი გუნდი ახლა 9 ტურის შემდეგ 14 ქულით მეექვსე ადგილზეა. 27-27 ქულით გათამაშების ცხრილის სათავეში ევროპული გრანდები - "პრო რეკო" და "ბრეშა" იმყოფებიან.

იტალიის ჩემპიონატის სერია A2-ის სამხრეთი ლიგის მე-4 ტურში პირველი გამარჯვება იზეიმა ანდრია ბითაძის "ვის ნოვამ" (რომი). შეგახსენებთ, რომ ეს გუნდი შარშან დაქვეითდა უმაღლესი ეშელონიდან.

ახალმა მთავარმა მწვრთნელმა, იტალიის ყველა დროის ერთ-ერთმა საუკეთესო წყალბურთელმა გალგატერამ, რომელიც ახალი სეზონის წინ დაინიშნა "ვის ნოვას" თავკაცად, გუნდი გააახალგაზრდავა. ბიჭებს ჯერ შეთამაშება აკლიათ, თუმცა ტურიდან ტურამდე იკრებენ ძალებს და აი, შინ "ტელიმარი" 14:8 დაამარცხეს.

ბითაძემ 2 ბურთი გაიტანა და არბიტრებს მეტოქის მცველები სამჯერ გააძევებინა აუზიდან. რომაელები 12-გუნდიან ჯგუფში 3 ქულით მე-11 ადგილზე არიან, 4 მოგებით "კამპოლონგო" ლიდერობს. თუმცა ჩემპიონატის ბოლომდე ჯერ კიდევ 18 ტურია სათამაშო.

სერია A2-ის ჩრდილოეთ ლიგაში გამოდის რევაზ იმნაიშვილის "სორი", რომელმაც შინ დაძაბულ პაექრობაში 8:7 აჯობა "ანკონას" და ოთხი შეხვედრის შემდეგ ორი გამარჯვება აქვს. იმნაიშვილმაც მეტოქის მეკარეს ორჯერ გამოატანინა ბადიდან ბურთი. მისი გუნდი 6 ქულით მესამე-მეშვიდე ადგილებს იყოფს. 12 ქულით პირველ ადგილზეა "ჯენოა".

* * *


სერბეთის "შაბაცის" ღირსებას იცავენ გიორგი მესხი და ნიკოლოზ შუშიაშვილი. მესხი შარშან ნოვი სადის "ვოივოდინას"  შემადგენლობაში სერბეთის ვიცეჩემპიონი გახდა. ახლა კი შაბაცელებთან ერთად ქვეყნის თასის გათამაშებაში დაიკავა მეორე ადგილი. შაბათს ნახევარფინალში "შაბაცი" შინ "ნიშის" დაუპირისპირდა.

ძირითადი დრო დამთავრდა ფრედ - 7:7. დაინიშნა პენალტები. 9 ხუთმეტრიანის შემდეგ ანგარიში აქაც თანაბარი იყო - 2:2. ბოლო დარტყმა მესხს ანდეს და მანაც თანაგუნდელები არ დააღალატა - მეკარისგან მარჯვენა მაღალ კუთხეში დიდოსტატური გოლი გაიტანა.

"შაბაცი" სერბეთის თასის ფინალში გავიდა, სადაც კვირას "ცრვენა ზვეზდას" მძლეველ (11:5) "პარტიზანს" დაუპირისპირდა. დაძაბული გადამწყვეტი პაექრობა ბელგრადელებმა მინიმალური უპირატესობით მოიგეს - 6:5 და მთავარ პრიზსს დაეუფლნენ.

* * *

სლოვაკეთის ჩემპიონატის უმაღლეს ეშელონში თამაშობს გიორგი მაგრაქველიძის "ნოვაკი". ჩემპიონატის ლიდერს ორი გასვლითი მატჩი ჰქონდა კოშიცეში. პირველ დღეს უპირველეს კონკურენტს - "ჰორნეცს" შეხვდა. სამი პერიოდის შემდეგ მასპინძლები წინ იყვნენ, მაგრამ მე-4 რვაწუთიანი მონაკვეთი "ნოვაკმა" 3:1 მოიგო და დრამატული მატჩიც ფრედ - 7:7 დასრულდა.

მაგრაქველიძემ 2 გოლი და ამდენივე საგოლე პასიც მიითვალა. მეორე დღეს სტუმრებმა კოშიცელთა "ლურჯ დრაკონს" იოლად სძლიეს - 17:10. გიორგიმ აქაც ორი გოლი გაიტანა. 11 ტურის შემდეგ "ნოვაკი (10 მოგება, ერთი ფრე) მეორე ადგილზეა. მას "ჰორნეცი" უსწრებს, რომელსაც ერთი მატჩით მეტი აქვს გამართული.

* * *

გერმანიის ბუნდესლიგაში 8 ტურის შემდეგ მე-4 ადგილზეა ალექსანდრე ყაზახიშვილის "ნოიკიოლნი" (ბერლინი), რომელმაც ბოლო ტურში შინ "ბაიერი" დაამარცხა - 11:10. ერთი გოლი ქართველი წყალბურთელის ანგარიშზეა. პირველ-მეორე ადგილებს "ვასპო ჰანოვერი" და "შპანდაუ" იყოფენ.

საბერძნეთის ჩემპიონატში გამოდიან ლევან ჩიქვინიძე და ხვიჩა ჯახაია. ისინი კრეტის "ოფის" სპორტულ ღირსებას იცავენ. შაბათს მათმა გუნდმა შინ სალონიკის "პაოკ-ს" სძლია -7:5. სტუმრების კარი ერთხელ ჯახაიამ აიღო, მეტოქის ხუთი მოთამაშის გაძევება კი ჩიქვინიძის ანგარიშზეა.

ქართველ წყალბურთელებს თავიანთ კლუბებში საახალწლო არდადეგები ეწყებათ. ისინი შინ დაბრუნდებიან და საქართველოს ნაკრებთან ერთად განაგრძობენ ვარჯიშს. ჩვენი ეროვნული გუნდი კი, რომელიც ევროპის თასისა და კონტინენტის ჩემპიონატის პლეიოფისთვის ემზადება, 2 იანვარს დუბროვნიკში (ხორვატია) ერთკვირიან საწვრთნელ შერებაზე გაემგზავრება.

ყოველდღიური სპორტული გაზეთი "ლელო"
1140
მკითხველის კომენტარები / 0 /
მსგავსი ამბები
რუბრიკის სხვა სიახლეები
;