წყალბურთი. თბილისის დინამო ჩემპიონთა ლიგაზე პირველ მატჩს გამართავს

საქართველოს წყალბურთის მატიანეში დღეს ახალი ფურცელი ჩაიწერება - თბილისის „დინამო“ პრესტიჟულ ევროტურნირ ჩემპიონთა ლიგაზე პირველ მატჩს გამართავს. ის სტუმრად ესპანეთის „ტერასას“ გაუწევს მეტოქეობას.

- ევროპის საწყლოსნო სახეობათა ფედერაციამ განვითარებადი ქვეყნების საწყალბურთო კლუბებს ჩემპიონთა ლიგაზე გამოსვლის შანსი მოგვცა. - გვითხრა „დინამოს“ პრეზიდენტმა გიორგი ხვედელიანმა. - 10 კონკურენტს ვაჯობეთ და ეს ჩვენი საამაყო გუნდის ისტორიული წარსულის დამსახურებაა. მთელი წლის განმავლობაში ევროპის უძლიერეს კლუბებს დავუპირისპირდებით, რაც ეროვნული ნაკრების წევრებისთვის ოსტატობის ზრდის იდეალური შანსია... 

დღეს პაექრობაში B ჯგუფის წარმომადგენლები ჩაებმებიან. ერთმანეთს დაუპირისპირდებიან: ტერასას (ესპანეთი) „ტერასა“ - თბილისის (საქართველო) „დინამო“, ბუდაპეშტის (უნგრეთი) „ფერენცვაროში-ტელეკომი“ - ჰანოვერის (გერმანია) „ვასპო-98“, ბუდაპეშტის (უნგრეთი) OSC - ზაგრების (ხორვატია) „მლადოსტი“, მარსელის (საფრანგეთი) „მარსელი“ - რეკოს (იტალია) „პრო რეკო“.

გუშინ ტერასაში მასპინძლებმა და დინამოელებმა პრესკონფერენცია გამართეს. 

რევაზ ჩომახიძე, „დინამოს“ მთავარი მწვრთნელი: „ისეთი დებიუტანტი გუნდისთვის, როგორიც „დინამოა“, ტერასაში თამაში იოლი არ იქნება, ყოველ შემთხვევაში, ყველაფერს გავაკეთებთ საიმისოდ, რომ ყველას ვაჩვენოთ, ჩემპიონთა ლიგაში ჩვენი მოხვედრა ბედნიერი დამთხვევა არ არის“. 

ზურაბ რურუა, „დინამოს“ კაპიტანი: „ტერასას“ წინააღმდეგ არასდროს მითამაშია, მაგრამ ჩემპიონთა ლიგის საკვალიფიკაციო რაუნდიდან მისი სამი მატჩი ვნახე. მათ ახალი წესებით ასპარეზობის დიდი გამოცდილება მიიღეს. პაექრობა რთული იქნება, მაგრამ ჩვენ აქ საბრძოლველად და ამ შეხვედრის მოსაგებად ჩამოვედით“. 

დიდაკ კობაჩო, „ტერასას“ მწვრთნელი: „ეს მატჩი განსაკუთრებულია ჩვენთვის, რადგან კლუბის ისტორიაში ჩემპიონთა ლიგაზე პირველად ვთამაშობთ. დიდი ინტერესით ველით პაექრობას. ლიგის საკვალიფიკაციო რაუნდში საერთაშორისო შეხვედრების გამოცდილება მივიღეთ. მთელი გუნდი ჯანმრთელადა და ამაღლებულ ხასიათზეა. ვფიქრობ, გულშემატკივრთა დიდ არმიას წყალბურთის კარგი თამაშით სიამოვნებას მივანიჭებთ, საშუალებას მივცემთ, წყალბურთით დატკბეს.

ამასთანავე ისიც უნდა აღინიშნოს, რომ თბილისის „დინამო“ ძლიერი გუნდია. საერთოდ, ჩემპიონთა ლიგის თექვსმეტეულში სუსტი მეტოქე არ არსებობს. რთული თამაში გველის, რადგან ქართველთა შორის არიან ცნობილი წყალბურთელები ვაპენსკი, ელაჩა, ბარალდი. მათთან პაექრობა საინტერესო იქნება“.

რიკარდ ალარკონი, „ტერასას“ წყალბურთელი: „დინამო“ - ეს არის გუნდი, რომელიც მთლიანად საქართველოს ნაკრების წყალბურთელებით არის დაკომპლექტებული. მის შემადგენლობაში განსაკუთრებით სამი მოთამაშე იქცევს ყურადღებას: სიმაღლითა და სიძლიერით გამორჩეული იტალიის ნაკრების ყოფილი ცენტრფორვარდი ფაბიო ბარალდი, ქართველთა ნატურალიზებული ცენტრალური მცველი მარკო ელაჩა და სერბი ცაცია ბორის ვაპენსკი. ქართველებს ჰყავთ გუნდი, რომელსაც ჯგუფში პირველი ოთხი ადგილისთვის ბრძოლა შეუძლია. ვფიქრობ, თანაბარძალოვანთა მატჩი იქნება. შევეცდებით, ამ შეხვედრისგან მაქსიმალური შედეგი მივიღოთ, რადგან ჩვენი მიზანია, რაც შეიძლება მეტი ქულა მოვაგროვოთ შინ“... 

დღეს საქართველოს პირველი არხით 22.30 საათიდან გადაიცემა „ტერასას“ და „დინამოს“ მატჩი, რომელსაც ქართული გუნდი რევაზ ჩომახიძის ხელმძღვანელობით ასეთი შემადგენლობით ითამაშებს: მეკარეები - ირაკლი რაზმაძე და ნიკოლოზ შუბლაძე, მცველები - ხვიჩა ჯახაია, ბექა ქავთარაძე და მარკო ელაჩა, თავდამსხმელები - ზურაბ რურუა (კაპიტანი), მიხეილ ბაღათურია, გიორგი მაგრაქველიძე, რევაზ იმნაიშვილი, ბორის ვაპენსკი და დამირ ცრეპულია, ცენტრალური თავდამსხმელები - ანდრია ბითაძე და ფაბიო ბარალდი.

A ჯგუფი: სპლიტის (ხორვატია) „იადრანი“ - ათენის (საბერძნეთი) „პანათინაიკოსი“ 8:17, ბერლინის (გერმანია) „შპანდაუ 04“ - ბარსელონის (ესპანეთი) „ზოდიაკი“ 8:11, ზოლნოკის (უნგრეთი) „დოჟა“ - ყაზანის (რუსეთი) „სინთეზი“ 13:10, ჰერცეგ ნოვის (მონტენეგრო) „იადრანი“ - დუბროვნიკის (მონტენეგრო) „იუგი“ 7:12.

ყოველდღიური სპორტული გაზეთი "ლელო"
250
მკითხველის კომენტარები / 0 /
მსგავსი ამბები
რუბრიკის სხვა სიახლეები
;