წყალბურთი: ისრაელს 12:1 მოვუგეთ და ევროპას ძალიან მივუახლოვდით

წლეულს 14-28 ივლისს ბარსელონა წყალბურთელ ვაჟთა 33-ე ევროპის ჩემპიონატის ფინალურ პაექრობებს უმასპინძლებს. საპრიზო ადგილებისთვის კონტინენტის 16 საუკეთესო ნაკრები დაუპირისპირდება ერთმანეთს.

2016 წლის ბელგრადის პირველობის შედეგების გათვალისწინებით, კატალონიურ ბატალიებში მონაწილეობა განაღდებული აქვთ სერბეთს, ხორვატეთს, უნგრეთს, საბერძნეთს, იტალიას, რუსეთს, მონტენეგროსა და ესპანეთს. დანარჩენ რვა იღბლიანს პლეი ოფების მატჩები გამოავლენს. ბარსელონის საგზურის მაძიებელთა შორისაა საქართველოს ნაკრებიც, რომელმაც ისრაელს უმასპინძლა და ანგარიშში დიდი სხვაობით დაამარცხა.

საქართველო-ისრაელი 12:1

5:0, 2:0, 2:0, 3:1

საქართველო: შუბლაძე, ქავთარაძე (1), რუსიშვილი, იმნაიშვილი, ბითაძე (2), ელაჩა (3), ჯახაია (1), ბაღათურია (1), რურუა (1), გეგელაშვილი, მაგრაქველიძე (3), მესხი, რაზმაძე, მწვრთნელი ჩომახიძე.

ისრაელი: მალკისი, შაჰამი, გროსი, ი. კერემი, კონევი, ო. კერემი, ფრედი, ჰაპარი, კოტერი, ზონანშტერნი (1), გრუნდლინდი, ფირი, მწვრთნელი ბარდიჩი.

ქართველმა წყალბურთელებმა თავიდანვე აქტიურად შეუტიეს მეტოქის კარს და პირველ რვაწუთიან მონაკვეთში ხუთი უპასუხო გოლი გაიტანეს. დანარჩენი სამი პერიოდიც მასპინძელთა უპირატესობით წარიმართა და მათ მატჩი 11-ბურთიანი სხვაობით მოიგეს.

განმეორებითი შეხვედრისთვის, რომელიც 3 მარტს ისრაელში გაიმართება, ეს სოლიდური მარაგია. ორი პაექრობის შედეგით უკეთესი გუნდი ბარსელონის ფინალური ასპარეზობის საგზურს მოიპოვებს.

- ანგარიში სავსებით დამაკმაყოფილებელია, - გვითხრა ჩვენებურთა თავკაცმა რევაზ ჩომახიძემ. - ვფიქრობ, ორი მატჩის ჯამში გამარჯვება და ევროპის ჩემპიონატის დასკვნით რაუნდში ზედიზედ მესამედ თამაშის უფლების მოპოვება არ უნდა გაგვიჭირდეს.

1386
მკითხველის კომენტარები / 0 /
მსგავსი ამბები
რუბრიკის სხვა სიახლეები
;