წყალბურთი. კარგი ასპარეზი ნაკრების წევრებისთვის

თბილისის საწყლოსნო კომპლექს "ოლიმპიკის" აუზში გუშინ განახლდა საქართველოს წყალბურთელ ვაჟთა ეროვნული ჩემპიონატი, რომელშიც ოთხი გუნდი მონაწილეობს.

მესამე წრის პირველ ტურში ერთმანეთს დაუპირისპირდნენ გათამაშების ცხრილის მე-2 საფეხურზე მყოფი "დინამო" და აუტსაიდერი "სპორტმენეჯმენტი", ასევე, ასპარეზობის ლიდერი "ლოკომოტივი" და "თბილისი". მეწინავეებმა აქტივში მორიგი ორ-ორი ქულა ჩაიწერეს.

ეროვნული ჩემპიონატის მატჩები საქართველოს ნაკრების წევრებისთვის კარგი სათამაშო პრაქტიკა იქნება - მათ ხომ თებერვალში კონტინენტის თასის გათამაშება და ევროპის 2018 წლის ჩემპიონატის პლეი ოფის ორრაუნდიანი პაექრობა ელით ისრაელის გუნდთან.

დინამო-სპორტმენეჯმენტი 20:6
4:2, 5:2, 5:1, 6:1

დინამო: რაზმაძე, შავშიშვილი (2), მოსაშვილი, თეთრაძე, კაპანაძე (2), ადეიშვილი (1), ხვედელიანი (3), ბაღათურია (4), რურუა (4), ჯახაია (2), ხამოევი (1), ერისთავი, ქართველიშვილი (1), დვალი, გვეტაძე
სპორტმენეჯმენტი: ჩხიკვიშვილი, მერაბიშვილი, მაისურაძე, გაგოშიძე (1), ახვლედიანი (2), შუბითიძე, ჭეიშვილი (1), პატარიძე (1), ბარბაქაძე (1), რობაქიძე

ამ შეხვედრაში ფავორიტი "დინამო" იყო და მატჩიც მისი იერიშებით დაიწყო. მეორე წუთის მიწურულს ანგარიში დინამოელთა კაპიტანმა რურუამ გახსნა. მალევე ახვლედიანმა წონასწორობა აღადგინა, მაგრამ მერე ტუკვაძის შეგირდებმა ხელთ იგდეს ინიციატივა და ორთაბრძოლა დიდი ანგარიშითაც მოიგეს - 20:6.

ლოკომოტივი-თბილისი 11:5
4:0, 2:2, 3:1, 2:2

ლოკომოტივი: ქარჩავა, ქავთარაძე (2), ქარჩილაძე, ფურცელაძე (2), ბაბუნაშვილი (3), ყავლაშვილი, რუსიშვილი, ივანიშვილი (1), ურუშაძე, გეგელაშვილი (1), კახეთელიძე (1), ჩიკვაიძე (1), კუჭუაშვილი
თბილისი: კაპანაძე, დადვანი (2), დიასამიძე, სამყურაშვილი, მემანიშვილი, ხოხაშვილი, გიორგაძე, კუჭუაშვილი, ხვინგია, ჭეიშვილი (2), იმნაიშვილი, ქათამაძე, ბარაბაძე

შეხვედრის პირველ რვაწუთიან მონაკვეთს თუ არ მივიღებთ მხედველიბაში, სამი პერიოდი "თბილისი" ტოლ-სწორად ეთამაშა ჩემპიონატის ერთპიროვნულ ლიდერს, რასაც მეორე და მეოთხე რაუნდების ფრედ დასრულებაც მოწმობს.

რკინიგზელებმა მატჩის ბედი, ფაქტობრივად, პირველ პერიოდში გადაწყვიტეს, როცა კაპანაძის კარში ოთხი უპასუხო გოლი გაიტანეს. ამ გამარჯვებით (11:5) "ლოკომოტივმა" ლიდერობა შეინარჩუნა.

დღეს და ხვალ ჩემპიონატზე კიდევ ოთხი შეხვედრა გაიმართება.

26 იანვარი
სპორტმენეჯმენტი-თბილისი
ლოკომოტივი-დინამო

27 იანვარი
დინამო-თბილისი
ლოკომოტივი-სპორტმენეჯმენტი

ყოველდღიური სპორტული გაზეთი "ლელო"
867
მკითხველის კომენტარები / 0 /
მსგავსი ამბები
რუბრიკის სხვა სიახლეები
;