წყალბურთი. ლეგიონერები გუნდებს დაუბრუნდნენ

ისრაელის ეროვნულ გუნდთან ორი გამარჯვებისა და წყალბურთელ ვაჟთა ევროპის ჩემპიონატის ფინალში ადგილის დაბევების შემდეგ საქართველოს ნაკრების ლეგიონერები თავიანთ კლუბებს დაუბრუნდნენ და მორიგი ტურის მატჩებში იასპარეზეს.

იტალიის ჩემპიონატის სერია A1-ში მარკო ელაჩას "ორტიჯია" (სირაკუზა) სტუმრად ტრიესტის "პალანუოტოს" შეხვდა და 8:5 გაიმარჯვა. ელაჩა თანაგუნდელებს 2 გოლით შეეწია. 16 ტურის შემდეგ სირაკუზელები 30 ქულით მე-5 ადგილზე არიან. მათ "პრო პეკო" (48 ქულა), "მენეჯმენტი" (42), "ბრეშა" (43) და "სავონა" (31) უსწრებენ.

სერია A2-ის სამხრეთ ლიგაში რომის "ვის ნოვამ" შინ "არეჩის" მოუგო - 11:6. ანდრია ბითაძის ანგარიშზეა ერთი გოლი და მეტოქეთა ოთხი მცველის გაძევება. რომაელები 16 ქულით "პესკარასთან" მეხუთე-მეექვსე ადგილებს იყოფენ.

10 მარტს მე-12 ტურში "ვის ნოვა" ლიგის ლიდერ "კამპოლოგნოს" (28 ქულა) შეხვდება. ჩრდილოეთ ლიგაში რევაზ იმნაიშვილის "სორი" მე-11 ტურის გადადებულ მატჩს "კამოლისთან" 14 მარტს ითამაშებს.

ადრიატიკის ჩემპიონატის მეორე ჯგუფში (სულ 19 გუნდი თამაშობს: პირველში - 10, მეორეში - 9) "შაბაცმა", რომლის ღირსებასაც ნიკოლოზ შუშიაშვილი და გიორგი მესხი იცავენ, ორი მატჩი გამართა: შინ უშუალო კონკურენტ "ვოივოდინა" დაუზავდა - 9:9 (ჩვენებს ბურთები არ გაუტანიათ), შემდეგ კი სტუმრად "ნაისს" სძლია - 9:5. მესხმა ამ მატჩში ორი გოლი მიითვალა.

"შაბაცი" 29 ქულით მეორე ადგილზეა და უახლოეს მდევარ "ვოივოდინას" ქულით უსწრებს. 10 მარტს ქართველებსა და მათს თანაგუნდელებს შინ უმძიმესი პაექრობა ელით ჯგუფის ლიდერ "ცრვენა ზვეზდასთან" (42 ქულა), რომელსაც ჩემპიონატში ქულა არ დაუკარგავს.

ნიკოლოზ შუბლაძისა და დამირ ცრეპულიას "პრიმორაცი" ადრიატიკის ჩემპიონატის პირველ ჯგუფში ზედიზედ ორჯერ დამარცხდა - ჯერ ჰერცეგ ნოვის "იადრანთან" წააგო - 5:13 (დამირ ცრეპულიამ ერთი ბურთი გაიტანა), შემდეგ ზაგრების "მლადოსტთან" დათმო ორთაბრძოლა - 10:18 (ცრეპულია ორი გოლით გამოირჩა). ქართველთა გუნდი 13 ქულით მე-8 ადგილზეა.

ყოველდღიური სპორტული გაზეთი "ლელო"
893
მკითხველის კომენტარები / 0 /
მსგავსი ამბები
რუბრიკის სხვა სიახლეები
;