წყალბურთი. ლეგიონერები: იტალიასა და სერბეთში

უცხოურ კლუბებში წარმატებით გამოსვლას განაგრძობენ საქართველოს წყალბურთელ ვაჟთა ნაკრების წევრები, თუმცა მათი გუნდები ეროვნულ ჩემპიონატებში დიდი შედეგიანობით არ გამოირჩევიან.

იტალიაში სამი ჩვენებური თამაშობს. სერია A1-ში გამოდის მარკო ელაჩა. მისმა გუნდმა "ორტიჯიამ" სტუმრად "სელესო ნუოტო" დაამარცხა 9:7 (ელაჩამ 2 გოლი მიითვალა). სირაკუზელები 24 ტურის შემდეგ 44 ქულით მე-4 ადგილზე არიან. ჩემპიონატს 72 ქულით "პრო რეკო" ლიდერობს. 25-ე ტურში "ორტიჯია" სტუმრად "ფლორენციას" დაუპირისპირდება.

სერია A2-ის ჩრდილოეთ ლიგაში რევაზ იმნაიშვილის "სორი" სტუმრად "ლავანიას" დაუზავდა - 11:11. ორი გოლი ქართველი წყალბურთელის ანგარიშზეა. "სორის" 19 ტურის შემდეგ 16 ქულით მე-9 ადგილი უკავია. 57 ქულით "ჯენოა" მეწინავეობს.

სამხრეთ ლიგაში რომის "ვის ნოვამ", რომლის სპორტულ ღირსებასაც ანდრია ბითაძე იცავს, სტუმრად "მური ანტიჩთან" წააგო - 7:9 (ერთი ბურთი ბითაძემ გაიტანა). ქართველი წყალბურთელის გუნდი 25 ქულით მე-6 ადგილზეა. 47 ქულით "რომა ნუოტო" ლიდერობს.

სერბეთის სუპერლიგაში ოთხი წარმატებული მატჩის შემდეგ ზედიზედ მესამედ დამარცხდა გიორგი მესხის "შაბაცი" - ამჯერად სტუმრად "ცრვენა ზვეზდასთან" 7:15 (ერთი გოლი მესხის ანგარიშზეა). პირველი წრის შემდეგ 19 ქულით გათამაშების ცხრილის სათავეშია "პარტიზანი". მას ქულით ჩამორჩება "ცრვენა ზვეზდა", მესამე ადგილზე მყოფ "ვოივოდინას" 16 ქულა აქვს, ხოლო "შაბაცი" 12 ქულით მეოთხე ადგილზეა.

ყოველდღიური სპორტული გაზეთი "ლელო"
765
მკითხველის კომენტარები / 0 /
მსგავსი ამბები
რუბრიკის სხვა სიახლეები
;