წყალბურთი. ლეგიონი: გიორგი მაგრაქველიძე უგოლოდ მატჩებს არ ტოვებს

საქართველოს წყალბურთელ ვაჟთა ნაკრების წევრი, 19 წლის გიორგი მაგრაქველიძე მეორე წელიწადია, სლოვაკეთის ეროვნულ ჩემპიონატში მონაწილეობს და კლუბ "ნოვაკის" ღირსებას იცავს. ამ ხნის განმავლობაში იგი გუნდის ერთ-ერთ ლიდერად და ბომბარდირად ჩამოყალიბდა - მატჩებს უგოლოდ არ ტოვებს.

წლეულს ახალი სეზონისთვის მოსამზადებელ პერიოდში "ნოვაკმა" შინ სამი შეხვედრა მოიგო დიდი ანგარიშებით, გიორგი მაგრაქველიძემ შვიდი გოლით გამოიჩინა თავი. მერე ნოვაკელებმა სლოვაკეთის თასზე იასპარეზეს და მეორე ადგილი დაიკავეს. ქართველმა წყალბურთელმა შვიდიდან ექვს მატჩში მიიღო მონაწილეობა და თანაგუნდელებს ექვსი გოლით შეეწია.

ასაკიდან გამომდინარე, გიორგიმ 23-წლამდელთა სლოვაკეთის პირველობაშიც მიიღო მონაწილეობა. შეჯიბრებაში რვა გუნდი გამოდიოდა. "ნოვაკმა" შვიდივე შეხვედრა მოიგო და ჩემპიონობა მოიპოვა. ამ წარმატებაში ქართველმა წყალბურთელმა, რომელმაც მეტოქეთა მეკარეებს 16-ჯერ გამოატანინა ბადიდან ბურთი, დიდი წვლილი შეიტანა.

ორი კვირის წინათ "ნოვაკი" ეროვნულ ჩემპიონატში, ანუ ექსტრალიგაში ჩაება. უკვე სამი ტური მიილია. ქართველი წყალბურთელის გუნდმა სასტარტო შეხვედრა სტუმრად გამართა და "ჟილინა" 20:5 დაჯაბნა (მაგრაქველიძე -2 გოლი), მერე ორ მეტოქეს უმასპინძლა: "კუბელე" 18:3 დაამარცხა (მაგრაქველიძე-3), ხოლო ჩემპიონობისთვის მთავარ კონკურენტ ბრატისლავის "სლავიას" 14:6 სძლია (მაგრაქველიძე-1).

- შარშან "ნოვაკმა", რომლის შემადგენლობაში ჩამთან ერთად რევაზ იმნაიშვილიც გამოდიოდა, მხოლოდ ფინალური შეხვედრა დათმო და მეორე ადგილი დაიკავა. - გვითხრა გიორგი მაგრაქველიძემ, რომელსაც გუშინ სლოვაკეთში შევეხმიანეთ. - წლეულს კლუბს ჩემპიონობა აქვს გამიზნული. იმნაიშვილი იტალიაში გადავიდა სათამაშოდ, მე კი სლოვაკეთში დავრჩი, რადგან კლუბმა სხვებისგან განსხვავებით უკეთესი პირობები შემომთავაზა.

კმაყოფილი ვარ, რადგან რეგულარულად ვთამაშობ, წვრთნისა და დასვენების კარგი პირობები მაქვს, ოსტატობაც ავიმაღლე.

პირველი წრის შემდეგ საწვრთნელი შეკრებისთვის უნგრეთსა და ავსტრიაში გავემგზავრებით. ასე რომ, "ნოვაკში" ჯერჯერობით ზრდისა და წინსვლის საშუალება მაქვს, მერე კი ვნახოთ...

ყოველდღიური სპორტული გაზეთი "ლელო"
3762
მკითხველის კომენტარები / 0 /
მსგავსი ამბები
რუბრიკის სხვა სიახლეები
;