წყალბურთი. ლეგიონი: მოგება სამი მარცხის შემდეგ

იტალიასა და სერბეთში გრძელდება წყალბურთელ ვაჟთა ეროვნული ჩემპიონატები, რომლებშიც საქართველოს ნაკრების ოთხი წევრი თამაშობს.

სერბეთის სუპერლიგაში გიორგი მესხის "შაბაცმა" ზედიზედ სამი მარცხის შემდეგ მეორე წრის პირველ ტურში შინ "ზემუნ ბორალს" სძლია - 15:6, ამის მიუხედავად, 15 ქულით ისევ მეოთხე ადგილზე რჩება, რადგან მისმა კონკურენტებმაც გაიმარჯვეს.

რვა ტურის შემდეგ პირველ-მესამე ადგილებს "პარტიზანი" (22 ქულა), "ცრვენა ზვეზდა" (21) და "ვოივოდინა" იყოფენ. "შაბაცი" ხვალ სტუმრად ბოლოსწინა ადგილზე მყოფ "ნაისს" ეთამაშება.

აპენინელთა სერია A1-ში მარკო ელაჩას "ორტიჯია" სტუმრად "ფლორენციასთან" 7:8 დამარცხდა. არადა, ბოლო პერიოდის წინ სირაკუზელები 3 ბურთით წინ იყვნენ.

ელაჩამ ამ მატჩში ორი გოლი მიითვალა. ბოლო ტურის წინ "ორტიჯია" 44 ქულით მე-6 ადგილზეა. ჩვენებურის გუნდს უსწრებენ "პრო რეკო" (75 ქულა), "ბრეშა" (66), "სპორტმენეჯმენტი" (64), "სანოვა" (45) და "ნაპოლი" (44). 19 მაისს ბოლო ტურში "ორტიჯია" მე-4 ადგილისთვის უშუალო კონკურენტ "ნაპოლის" უმასპინძლებს, "სანოვა" სტუმრად შეხვდება "სპორტმენეჯმენტს", რომელსაც ვერცხლის მედლებისთვის სამი ქულა ჰაერივით სჭირდება, თუმცა ნაკლებსავარაუდოა, რომ ელაჩას ყოფილმა გუნდმა მეორე ადგილი დაიკავოს, რადგან "ბრეშა" სტუმრად დაუპირისპირდება გათამაშების ცხრილის ფსკერზე უქულოდ მყოფ "აკვაჩიარას" და ვიცეჩემპიონობის შანსს ხელიდან არ გაუშვებს.

სერია A2-ის ჩრდილოეთ ლიგაში ისევ დამარცხდა რევაზ იმნაიშვილის "სორი" - ამჯერად "ჩიავარი ნუოტოსთან" წააგო შინ 7:8 (იმნაიშვილს გოლი არ გაუტანია). ბოლოსწინა 21-ე ტურში "სორი" საკუთარ აუზში დაუპირისპირდება 46 ქულით მე-2 ადგილზე მყოფ "ბოლონიას". 60 ქულით "ჯენოა" მეწინავეობს. იმნაიშვილის გუნდი 16 ქულით მე-9 ადგილზეა.

სამხრეთ ლიგაში ანდრია ბითაძის "ვის ნოვა" "პესკარას" დაუზავდა - 6:6 (ერთი გოლი და მეტოქეთა მცველების რამდენიმე გაძევებაა ბითაძის ანგარიშზე). რომაელები 26 ქულით მე-6 ადგილზე არიან. აქ 50 ქულით "რომა ნუოტო" ლიდერობს. 19 მაისს "ვის ნოვა" მესამე ადგილზე მყოფ "ლატინა პალანუოტოს" გაუწევს მეტოქეობას.

ყოველდღიური სპორტული გაზეთი "ლელო"
992
მკითხველის კომენტარები / 0 /
მსგავსი ამბები
რუბრიკის სხვა სიახლეები
;