წყალბურთი. ლეგიონი: სლოვაკეთში ლიდერი, საბერძნეთში აუტსაიდერი

საქართველოს წყალბურთელ ვაჟთა ნაკრების წევრებმა, რომლებიც უცხოურ კლუბებში თამაშობენ, გასულ უქმეებზე მორიგი ტურის მატჩები გამართეს.

19 წლის გიორგი მაგრაქველიძის "ნოვაკმა" შინ სლოვაკეთის ეროვნული ჩემპიონატის ორი შეხვედრა ჩაატარა: ჯერ უახლოეს კონკურენტს - კოშიცეს "ჰორნეტს" სძლია დაძაბულ პაექრობაში - 12:11 (3 ბურთი მაგრაქველიძის ანგარიშზეა), გუშინ კი კოშიცეს "ლურჯი ურჩხული" დაამარცხა დიდი ანგარიშით - 19:5. ქართველი წყალბურთელი ორი გოლით დაკმაყოფილდა. ხუთი ტურის შემდეგ "ნოვაკი" 10 ქულით დაწინაურდა. 8-8 ქულით მეორე-მესამე ადგილებს "კოშიცე" და ბრატისლავის "სლავია" იყოფენ.

ოთხი ჩვენებური ადრიატიკის რეგიონალლიგაში მონაწილეობს. 4 ტურის შემდეგ გიორგი მესხისა და ნიკოლოზ შუშიაშვილის "შაბაცი" (სერბეთი) მეორე ჯგუფში ნოვი სადის "ვოივოდინასთან" 9-9 ქულით მეორე-მესამე ადგილებს იყოფდა. შაბათს შაბაცელები კონკურენტთან სტუმრად 8:10 დამარცხდნენ. შუშიაშვილი თანაგუნდელებს ერთი გოლით შეეწია.

მეორე ჯგუფში ნიკოლოზ შუბლაძისა (მეკარე) და დამირ ცრეპულიას ხორვატულმა "პრიმორაცმა" იყოჩაღა - მე-5 ტურში შინ ჰერცეგნოვის "იადრანთან" 4:11 წააგო. ცრეპულიას გოლი არ გაუტანია.

საბერძნეთის ჩემპიონატის უმაღლესი ლიგის გუნდ "ჰერაკლიონის" (კრეტა") სპორტულ ღირსებას იცავენ ხვიჩა ჯახაია და ლევან ჩიქვინიძე. მათი გუნდი წლეულს გადმოვიდა უმაღლეს ლიგაში და, ეტყობა, ჯერჯერობით ადაპტაციას ვერ ახერხებს, რადგან განვლილ ოთხ ტურში ყველა მატჩი დათმო. ჯახაიამ ოთხ შეხვედრაში 7 გოლი მიითვალა.

მარკო ელაჩა ამ წლის განმავლობაში იტალიის სერია A-ში "სპორტმენეჯმენტის" შემადგენლობაში გამოდიოდა და ორჯერ ბრინჯაოს მედალიც დაიმსახურა. ახალი სეზონისთვის იგი სირაკუზის "ორტიჯიაში" გადავიდა. სიცილიელებმა მე-4 ტურის გასვლით პაექრობაში "ბოლიასკოს" აჯობეს - 10:9. ელაჩამ წინა ტურებში გატანილ სამ გოლს ერთიც მიუმატა.

ყოველდღიური სპორტული გაზეთი "ლელო"
1129
მკითხველის კომენტარები / 0 /
მსგავსი ამბები
რუბრიკის სხვა სიახლეები
;