წყალბურთი. ლეგიონი: ქართველები მასპინძლებს არ ჩამორჩებიან

ფოტოზე: რევაზ იმნაიშვილი
საქართველოს წყალბურთელ ვაჟთა ნაკრების 11 წევრი, როგორც ქომაგებმა უწყიან, უცხოურ კლუბებში თამაშობს. ცხრა მათგანმა გასულ უქმეებზე მორიგი ტურის მატჩებში იასპარეზა.

კვლავ გამოირჩა სლოვაკეთის "ნოვაკის" წყალბურთელი გიორგი მაგრაქველძე. ქვეყნის ესტრალიგის მე-9 ტურში მისმა გუნდმა შინ "ჟილინა" დაჯაბნა - 19:5. გიორგიმ ამ მატჩში 5 გოლი გაიტანა. ნოვაკელები გათამაშების ცხრილის სათავეში არიან.

"ნოვაკის" სპორტულ ღირსებას ორი წლის განმავლობაში იცავდა რევაზ იმნაიშვილი, რომელმაც გუნდთან ერთად ქვეყნის ჩემპიონობაც მოიპოვა და თასიც. ახალ სეზონში იმნაიშვილი იტალიის ჩემპიონატის მე-2 ჯგუფის ჩრდილოეთი ლიგის მონაწილე "სორიში" გადავიდა. ქართველმა წყალბურთელმა სადებიუტო მატჩი შაბათს ითამაშა: "სორიმ" ჩემპიონატის პირველი ტურის შეხვედრა სტუმრად "პრომოსეტოს" მოუგო 9:6. ჩვენებური თანაგუნდელებს ორი გოლით შეეწია.

ამავე ჯგუფის სამხრეთ ლიგაშია ანდრია ბითაძის "ვის ნოვა" (რომი). "ვის ნოვამ" პირველი მატჩი სტუმრად "კამპოლოგნოსთან" წააგო - 3:10. ბითაძეს გოლი არ გაუტანია.

იტალიის ჩემპიონატის მეორეჯგუფელებს სასტარტო შეხვედრები თუ ჰქონდათ, სერია A-ში მე-6 ტურის პაექრობები გაიმართა. მარკო ელაჩას ახალი კლუბი - სირაკუზის "ორტიჯია" სტუმრად ტორინოს "რეალ მუტუას" დაუზავდა - 8:8. ელაჩამ ერთხელ აიღო მეტოქის კარი. მისი გუნდი 11 ქულით მე-5 ადგილზეა.

რეგიონალლიგაში (ადრიატიკის ჩემპიონატი ოთხი ქვეყნის 19 გუნდის მონაწილეობით) ოთხი ჩვენებური ასპარეზობს. გიორგი მესხისა და ნიკოლოზ შუშიაშვილის "შაბაცი" მეორე ჯგუფშია. შაბაცელები შაბათს სტუმრად ბელგრადში ერთპიროვნულ ლიდერ "ცრვენა ზვეზდასთან" დაძაბულ პაქერობაში ერთი ბურთის სხვაობით დამარცხდნენ -10:11. შუშიაშვილის ანგარიშზეა ერთი ბურთი.

პირველი ჯგუფის წევრ კოტორის "პრომორაცის" ღირსებას იცავენ მეკარე ნიკოლოზ შუბლაძე და დამირ ცრეპულია. მათმა გუნდმა ამჯერადაც წაიფორხილა - სტუმრად "პრიმორიესთან" 11:12 წააგო. ერთი ბურთი ცრეპულიამ მიითვალა.

გერმანიის ბუნდესლიგაში ალექსანდრე ყაზახიშვილის "ნოიკიოლნი" ხუთი ტურის შემდეგ 3 ქულით გათამაშების ცხრილის მეხუთე საფეხურზე იყო და მესამეადგილოსან "პოტსდამს" 3 ქულით ჩამორჩებოდა. ბერლინელებმა სტუმრად აღმავლობით ითამაშეს და მეტოქეს 16:11 აჯობეს, რითაც ქულათა სხვაობა მინიმუმამდე დაიყვანეს. ყაზახიშვილმა "პოტსდამის" მეკარეს საკუთარი ბადიდან ბურთი ხუთჯერ გამოატანინა.

ყოველდღიური სპორტული გაზეთი "ლელო"
1007
მკითხველის კომენტარები / 0 /
მსგავსი ამბები
რუბრიკის სხვა სიახლეები
;