წყალბურთი.ლეგიონი. ქართული გოლები სლოვაკეთსა და იტალიაში

საქართველოს წყალბურთელ ვაჟთა ნაკრების წევრი გიორგი მაგრაქველიძე სლოვაკეთის ექსტრალიგაში თამაშობს "ნოვაკის" შემადგენლობაში.

გასულ უქმეებზე ქართველი სპორტსმენის გუნდმა ჩემპიონატზე ორი გასვლითი მატჩი ითამაშა სტუმრად: ჯერ "პიეშჩანს" სძლია 24:4, შემდეგ კი "ბრატისლავას" დანებდა - 11:12.

მაგრაქველიძემ ამ შეხვედრებში ორ-ორი გოლი გაიტანა. 13 ტურის შემდეგ "ნოვაკი", ერთი წაგების მიუხედავად, ლიდერობს.

იტალიის სერია A1-ში სირაკუზის "ორტიჯიას" ღირსებას იცავს მარკო ელაჩა. მისმა გუნდმა მორიგ ტურში შინ "ფლორენციას" სძლია 7:5 (ელაჩას გოლი არ გაუტანია) და ახლა 21 ქულით გათამაშების ცხრილის მე-6 საფეხურზეა.

სერია A 2-ში გამოდიან ანდრია ბითაძე და რევაზ იმნაიშვილი. ბითაძის ახალგაზრდული რომის "ვის ნოვა" თანაქალაქელთა "რომანუიროსთან" ერთი ბურთის სხვაობით - 11:12 დამარცხდა.

ჩვენებურმა ერთი გოლი მიითვალა და არბიტრებს მეტოქის ოთხი წყალბურთელი გააძევებინა, მაგრამ წარმატებისთვის ეს საკმარისი არ აღმოჩნდა. 12-გუნდიან სამხრეთ ლიგაში "ვის ნოვა" ხუთი ტურის შემდეგ ბოლოსწინა ადგილზეა.

ჩრდილოეთ ლიგაში რევაზ იმნაიშვილის "სორიმაც" სტუმრად ითამაშა და წაგებულმა დატოვა აუზი - 8:9. იმნაიშვილი თანაგუნდელებს ორი გოლით შეეწია. "სორის" 5 ტურის შემდეგ 2 მოგება აქვს და მე-8 ადგილი უკავია. ქართველთა გუნდები იტალიის ჩემპიონატში მორიგი ტურის შეხვედრებს 20 იანვარს გამართავენ.

ყოველდღიური სპორტული გაზეთი "ლელო"
888
მკითხველის კომენტარები / 0 /
მსგავსი ამბები
რუბრიკის სხვა სიახლეები
;