წყალბურთი: ლოკომოტივი სათავეშია

გასულ უქმეებზე საწყლოსნო კომპლექს "ოლიმპიკის" აუზში საქართველოს წყალბურთელ ვაჟთა ეროვნული ჩემპიონატის პირველი წრის ორი ტურის პაექრობები გაიმართა. შეჯიბრების მეორე დღეს ფავორიტები დაუპირისპირდნენ ერთმანეთს.

დინამო-ლოკომოტივი 10:11 (3:3, 1:3, 2:2, 4:3)
დინამო: რაზმაძე, შავშიშვილი, ღავთაძე, თეთრაძე (1), გაბადაძე, ადეიშვილი (1), ხვედელიანი, ბაღათურია (4), რურუა (4), მოსაშვილი, ხამოევი, თევდორაშვილი, ერისთავი, დვალი, გვეტაძე, მწვრთნელები-ტუკვაძე და გოგელია.
ლოკომოტივი: ქარჩავა, ქავთარაძე (1), ქარჩილაძე, ფურცელაძე (2), ბაბუნაშვილი, ყავლაშვილი, რუსიშვილი (3), ივანიშვილი, ურუშაძე (2), გეგელაშვილი (1), კახეთელიძე (2), ჩიკვაიძე, კუჭუაშვილი, მწვრთნელები - დავითიანი და ივანიშვილი.

დაძაბული და საინტერესო მატჩი გამოდგა, სწორედ, რომ კონკურენტების შესაფერისი. ასპარეზობის ბოლო წუთამდე გამარჯვებულის გამოცნობა შეუძლებელი იყო. ანგარიში მე-40 წამზე ლოკომოტიველმა რუსიშვილმა გახსნა, მაგრამ ადეიშვილმა მალევე გაათანაბრა. მერე კახეთელიძემ დააწინაურა რკინიგზელები, მას დინამოელი ბაღათურიაც არ ჩამორჩა. ასე დევნაში გაილია ოთხი პერიოდის თითქმის 31 წუთი. ანგარიში კი თანაბარი იყო - 10:10. საფინალო სასტვენამდე 1.5 წუთით ადრე ლოკომოტიველმა გეგელაშვილმა გამარჯვების გოლო გაიტანა.

სპორტმენეჯმენტი-თბილისი 6:13 (0:3, 2:3, 2:6, 2:1)
სპორტმენეჯმენტი: ჩხიკვიშვილი, ალავიძე (1), პატარიძე (1), დვალიშვილი (1), შუბითიძე (1), წულაძე, სამყურაშვილი, ჭეიშვილი, მერაბიშვილი (1), გაგოშიძე, ბარბაქაძე, ახვლედიანი, გარსევანიშვილი, სადუნიშვილი (1), არუთინოვი, მწვრთნელები - ლაითაძე და გოგიჩაიშვილი.
თბილისი: კაპანაძე, ცხაკაია (1), დიასამიძე (2), სამყურაშვილი (2), მემანიშვილი, ხოხაშვილი (1), დადვანი (1), კუჭუაშვილი (1), ხვინგია (2), ჭეიშვილი, იმნაიშვილი, ქათამაძე (3), ბარაბაძე, გიორგაძე, მწვრთნელები - კუტივაძე და ქოიავა.

შეჯიბრების სტარტზე ორივე გუნდი დამარცხდა, ამიტომ მეორე ტურში მეტოქეებს გათამაშების ცხრილში პირველი მოგების ჩაწერა ეწადათ. თუმცა თანაბარი ბრძოლა არ გამოვიდა: მთელი მატჩის განმავლობაში თბილისელები მეტი ორგანიზებულობით გამოირჩეოდნენ როგორც დაცვაში, ისე თავდასხმაში, ამიტომაც იერიშებს უფრო ხშირად გოლებით აგვირგვინებდნენ. მართალია, მე-4 რვაწუთიანი რაუნდი 1:2 დათმეს, მაგრამ ამას მატჩის საბოლოო შედეგზე გავლენა არ მოუხდენია - "თბილისმა" 13:6 მიაღწია წარმატებას.

დინამო-თბილისი 15:8 (5:3, 3:3, 3:1, 4:1)
დინამო: რაზმაძე, შავშიშვილი (1), ღავთაძე, თეთრაძე (3), გაბადაძე, ადეიშვილი, ხვედელიანი (1), ბაღათურია, რურუა (7), მოსაშვილი, ხამოევი (2), ერისთავი, დვალი, გვეტაძე (1), მწვრთნელები - ტუკვაძე და გოგელია.
თბილისი: კაპანაძე, ცხაკაია (2), დიასამიძე, სამყურაშვილი, მემანიშვილი, ხოხაშვილი (2), დადვანი, კუჭუაშვილი (1), ხვინგია, ჭეიშვილი, იმნაიშვილი, ქათამაძე (3), ბარაბაძე, გიორგაძე, მწვრთნელები - კუტივაძე და ქოიავა.

საქართველოს ჩემპიონატის წინა სეზონის ფინალში აღორძინებულმა "დინამომ" "თბილისს" სძლია და პირველი ადგილი დაიკავა. მე-3 ტურის ამ ორთაბრძოლაში თბილისელები რევანშის წყურვილით ჩაებნენ და კუჭუაშვილის გოლით წინაც გავიდნენ, მაგრამ შავშიშვილმა მალევე აღადგინა წონასწორობა. მესამე წუთზე ქათამაძემ ისევ დააწინაურა თავისი გუნდი, მაგრამ პირველი პერიოდის მეხუთე წუთიდან საქართველოს ვიცეჩემპიონები საფინალო გონგამდე მხოლოდ მდევრის როლში იყვნენ და საბოლოოდ 8:15 დამარცხდნენ.

სპორტმენეჯმენტი-ლოკომოტივი 8:18 (2:4, 2:4, 2:3, 2:7)
სპორტმენეჯმენტი: ჩხიკვიშვილი, ალავიძე (1), პატარიძე (1), შუბითიძე, წულაძე, სამყურაშვილი, ჭეიშვილი (2), მერაბიშვილი (1), გაგოშიძე (2), ბარბაქაძე (1), ახვლედიანი, გარსევანიშვილი, სადუნიშვილი, არუთინოვი, მწვრთნელები - ლაითაძე და გოგიჩაიშვილი.
ლოკომოტივი: ქარჩავა, ქავთარაძე, ქარჩილაძე, ფურცელაძე (3), ბაბუნაშვილი, ყავლაშვილი (3), რუსიშვილი (3), ივანიშვილი (1), ურუშაძე, გეგელაშვილი, კახეთელიძე (5), ჩიკვაიძე (3), კუჭუაშვილი, მწვრთნელები - დავითიანი და ივანიშვილი.

ლიდერისა და აუტსაიდერის მთელი მატჩის განმავლობაში უპირატესობა "ლოკომოტივის" მხარეს იყო და რკინიგზელებმა დიდი ანგარიშითაც გაიმარჯვეს - 18:8. ამ წარმატებით ეროვნული ჩემპიონატის პირველი წრის შემდეგ ისინი 6 ქულით გათამაშების ცხრილის სათავეში მოექცნენ.

თ მ ფ წ ბ ქ
ლოკომოტივი 3 3 0 0 42:25 6
დინამო 3 2 0 1 39:25 4
თბილისი 3 1 0 2 28:34 2
სპორტმენეჯმ. 3 0 0 3 20:45 0

ბომბარდირებში 15 გატანილი ბურთით დინამოელი ზურაბ რურუა ლიდერობს.

ზვიად დავითიანი, "ლოკომოტივის" მთავარი მწვრთნელი:

"საქართველოს ჩემპიონატში, მართალია, სულ ოთხი გუნდი მონაწილეობს, მაგრამ ქომაგებს საინტერესო პაექრობების ხილვა რომ არ მოენატრებათ, ეს შეჯიბრების პირველმა რაუნდმაც დაადასტურა.

დღევანდელი გადასახედიდან ფავორიტები "დინამო" და "ლოკომოტივი" არიან, რადგან უფრო გამოცდილი წყალბურთელები ჰყავთ. მაგალითად, ჩვენს გუნდში ეროვნული ნაკრების ხუთი და ახალგაზრდულის ორი წყალბურთელი თამაშობს.

"დინამოშიც", ფაქტობრივად, მსგავსი სიტუაციაა. ამიტომაც იყო ასე დაძაბული პირველი წრის მეორე ტურში ამ გუნდების შეხვედრა. საფინალო სასტვენამდე ოთხი წუთით ადრე უამრავი შეცდომა დავუშვით და მეტოქეს საშუალება მივეცით, სამბურთიანი სხვაობა აღმოეფხვრა.

კიდევ კარგი, რომ ბოლო წუთზე გადამწვეტი გოლი გავიტანეთ და გავიმარჯვეთ. ჩემპიონატის დანარჩენი ორი მონაწილე ("თბილისი" და "სპორტმენეჯმენტი") ახალგაზრდებითაა დაკომპლექტებული, მაგრამ პერსპექტიული ბიჭები ჰყავთ და საშეჯიბრო გამოცდილების შეძენის შემდეგ, არავინ იცის, ჩემპიონატში როგორ დაიძაბება სიტუაცია, მით უმეტეს, რომ რამდენიმე ტურის გავლა მოგვიწევს.

"ლოკომოტივს" რკინიგზა მფარველობს და ეხმარება. საგაისოდ, სათანადო თანხა თუ იქნება, გუნდის გაძლიერებასა და, არ არის გამორიცხული, ევროტურნირებზეც ვიფიქროთ."

ყოველდღიური სპორტული გაზეთი "ლელო"

1073
მკითხველის კომენტარები / 0 /
მსგავსი ამბები
რუბრიკის სხვა სიახლეები
;