წყალბურთი. მესხისა და შუშიაშვილის 'შაბაცი' ლიდერობს

საქართველოს წყალბურთელ ვაჟთა ნაკრები გუნდის წევრები, რომლებიც უცხოეთში თამაშობენ, თავიანთ კლუბებში წარმატებულ გამოსვლას განაგრძობენ. იშვიათად, რომ რომელიმე მათგანმა უგოლოდ დატოვოს მატჩი.

სამი ჩვენებურია იტალიის ჩემპიონატში. სერია A1-ში სირაკუზის "ორტიჯიას" სპორტულ ღირსებას იცავს მარკო ელაჩა. გასულ კვირას მისმა გუნდმა ორი შეხვედრა გამართა. ჯერ ერთპიროვნულ ლიდერ "პრო რეკოს" უმასპინძლა და 4:11 დამარცხდა. ე

ლაჩა ერთი გოლით გამოირჩა. სამაგიეროდ, მან ორი ბურთი გაუტანა სტუმრად "ლაციოს", რომელსაც სირაკუზელები დაუზავდნენ - 6:6. "ორტიჯიას" ახლა 38 ქულა აქვს და მე-5 ადგილზეა. 66 ქულით გათამაშების ცხრილის სათავეშია "პრო რეკო". 28 აპრილს "ორტიჯია" ბოლო ადგილზე მყოფ უქულო "აკუაჩიარას" უმასპინძლებს.

A2-ის ჩრდილოეთ ლიგაში თამაშობს რევაზ იმნაიშვილის "სორი", რომელიც ზედიზედ ორ მატჩში დამარცხდა: შინ "არენზანოსთან" წააგო 9:10, არადა, სამი პერიოდის შემდეგ წინ იყო 6:5. მე-17 ტურში "სორი" სტუმრად "კომო ნუოტოსთან" ვერაფერს გახდა - 9:11. ქართველმა წყალბურთელმა ორი ბურთი გაიტანა. ახლა მისი გუნდი 17 ქულით მე-9 ადგილზეა.

51 ქულით ლიდერობს "ჯენოა", რომლის ძლევასაც "სორი" 28 აპრილს საკუთარი კედლების დახმარებით შეეცდება.

სამხრეთის ლიგაში მონაწილეობს ანდრია ბითაძის "ვის ნოვა". რომაელებს ორივე მატჩი თანაქალაქელებთან ჰქონდათ. მე-16 ტურში ბითაძე და მისი თანაგუნდელები ლიგის ლიდერ "რომა ნუოტოსთან" დამარცხდნენ - 8:9, მომდევნო ტურში კი "რომა 2007-ს" მოუგეს - 10:5. ბითაძის ანგარიშზეა ერთი გოლი. "

ვის ნოვა" 22 ქულით მე-7 ადგილზეა. მას "პესკარა" და "მური არტინი" 2-2 ქულით უსწრებენ. 28 აპრილს შინ "სისპორტს" დაუპირისპირდება. ეს გუნდი რომაელებს სამი ქულით ჩამორჩება.

სერბეთის ჩემპიონატში შესანიშნავი სტარტი აიღო გიორგი მესხისა და ნიკოლოზ შუშიაშვილის "შაბაცმა". თუმცა შუშიაშვილი ახლა გუნდთან ერთად არ არის, რადგან საქართველოს 19-წლამდელთა ნაკრებშია და ევროპის ჩემპიონატის შესარჩევი ეტაპისთვის ემზადება.

"შაბაცი" მას შემდეგ, რაც რეგიონალლიგის პირველი ჯგუფის საგზური მოიპოვა, ეროვნულ ჩემპიონატში ჩაება. პირველ ტურში "ზემუნ ბოსალი" დაამარცხა - 8:7, მერე "ნაისსა" (11:5) და "რადნიჩკის" (6:3) აჯობა, მე-4 ტურში კი შინ "ვალიევოს" მოუგო - 17:13 (მესხს ბურთი არ გაუტანია) და 12 ქულით (ბურთები - 42:28) გათამაშების ცხრილის სათავეში მოექცა.

ლიდერს 2-2 ქულით ჩამორჩებიან ბელგრადის "პარტიზანი" (40:26) და ნოვი სადის "ვოივოდინა" (40:27). მომდევნო შეხვედრას "შაბაცი" 28 აპრილს სტუმრად სწორედ ნოვისადელებთან გამართავს.

სლოვაკეთის ეროვნულ ჩემპიონატში რეგულარული პირველობის დასრულების შემდეგ მედლებისთვის მებრძოლი ოთხეული გაირკვა. ნახევარფინალში ერთმანეთს ხვდებიან გიორგი მაგრაქველიძის "ნოვაკი" და ბრატისლავის "სლავია", ასევე, კოშიცეს "ჰორნეტსი" და "მოდრი დრაჩი". პაექრობა სამ მოგებამდეა.

პირველი ორთაბრძოლა "ნოვაკმა" შინ "სლავიასთან" 9:11 დათმო, მერე სტუმრად 7:8 წააგო, გუშინ კი პირველი გამარჯვება იზეიმა - 8:6 (ერთი გოლი მაგრაქველიძის ანგარიშზეა) და საერთო ანგარიში გახდა 2:1 "სლავიას" სასარგებლოდ.

25 აპრილს მე-4 მატჩია. "ნოვაკი" თუ მოიგებს, წონაწორობა აღდგება და გამარჯვებულის გამოსავლენად მე-5 შეხვედრა გახდება საჭირო, წაგების შემთხვევაში კი ის კოშიცეს დამარცხებულ გუნდს ბრინჯაოს მედლებისთვის დაუპირისპირდება.

ყოველდღიური სპორტული გაზეთი "ლელო"
801
მკითხველის კომენტარები / 0 /
მსგავსი ამბები
რუბრიკის სხვა სიახლეები
;