წყალბურთი. საბერძნეთმაც გვძლია, მაგრამ პროგრამა-მინიმუმი შესრულებულია...

თბილისის ოლიმპიურ აუზში დღეს ევროპის 17-წლამდელ წყალბურთელ ვაჟთა ჩემპიონატის ფინალური ეტაპის ჯგუფური რაუნდის მე-3 ტურის პაექრობები გაიმართა. მასპინძლები ჭაბუკთა შორის ევროპის შარშანდელ ჩემპიონ საბერძნეთის ნაკრებს დაუპირისპირდნენ. მას შემდეგ, რაც ელადელებმა მე-2 ტურში ათბურთიანი სხვაობით თანატოლებში მსოფლიოს 2018 წლის ჩემპიონ ჩერნოგორიას აჯობეს, არავის ეეჭვებოდა, რომ სტუმრებთან გამკლავება მასპინძლებსაც გაუჭირდებოდათ...

მატჩი ბერძნების იერიშებით დაიწყო და პირველ პერიოდში მათ საქართველოს ნაკრების კარში ზედიზედ ოთხი ბურთი შეაგდეს, რომლებსაც სოსო მასურაძის შეგირდებმა 8-წუთიანი მონაკვეთის დასრულებამდე 37 წამით ადრე ერთადერთი გოლით (დადვანი) უპასუხეს.

დიდი შესვენების წინ  ანგარიშში სხვაობა ექვს ბურთამდე გაიზარდა - 3:9. მომდევნო ორი პერიოდიც მსგავსი სცენარით წარიმართა. ევროპის ჩემპიონებს მატჩის სათავეები წამითაც არ გაუშვიათ ხელიდან. მართალია, მასპინძლებმა სტუმრების კარი შვიდჯერ დალაშქრეს, რაც სხვა გუნდებმა ვერ მოახერხეს, მაგრამ ჩვენებს მეტი შეეძლოთ - ბურთის გატანის არაერთი ხელსაყრელი მომენტი და რიცხობრივი უპირატესობა ვერ გამოიყენეს, დაცვაშიც ბევრს სცოდავდნენ, განსაკუთრებით - ელადელთა კონტრშეტევებისას, ამიტომაც პაექრობა თერთმეტბურთიანი სხვაობითაც დათმეს.

მარცხის მიუხედავად, ქართველმა წყალბურთელებმა ჩემპიონატის პროგრამა-მინიმუმი შეასრულეს - სტატზე რუმინელთა ნაკრებს აჯობეს და 12 საუკეთესო გუნდს შორის დაიბევეს ადგილი.

ხვალ ჩვენს ბიჭებს მეტად პასუხსაგები ორთაბრძოლა ელით. შეგახსენებთ, რომ ჯგუფების გამარჯვებულები პირდაპირ გავიდნენ მეოთხედფინალში. ამ ეტაპის კიდევ ოთხი საგზურისთვის პლეი ოფში 8 გუნდი იბრძოლებს - ჯგუფების მეორე და მესამეადგილოსნები. საქართველოს ნაკრებმა B ჯგუფში მესამე ადგილი დაიკავა და ჩემპიონატის რვა საუკეთესოში მოსახვედრად ოთხშაბათს D ჯგუფში მეორე ადგილზე გასულ გერმანიას დაუპირისპირდება.

საქართველო-საბერძნეთი 7:18 (1:4, 2:5, 2:4, 2:5)
საქართველო: თეთრაძე, ერისთავი, ქართველიშვილი, თევდორაშვილი (3), პატარიძე, დადვანი (3), ახვლედიანი, გიორგაძე (1), კირიაკიდი, ჩხეიძე, ჩიქოვანი, ტყეშელაშვილი, ჭუმბურიძე.
საბერძნეთი: ანდრეადისი, კაცაგუნოსი (2), ვლასისი (2), მატიოპულოსი (1), ჩალივოპულოსი (1), კეჩალარისი (1), გკილასი (2), მოკასი (1), ზურიდისი (1), ცატალიოსი (4), სგურიდისი (3), კუგიუნისი, კუტრულაკისი.

593
მკითხველის კომენტარები / 0 /
მსგავსი ამბები
რუბრიკის სხვა სიახლეები
;