წყალბურთი. საქართველოს ჩემპიონატი: დინამომ და ლოკომოტივმა მოგებით დაიწყეს

16 ნოემბერს საწყლოსნო კომპლექს "ოლიმპიკის" აუზში დაიწყო საქართველოს წყალბურთელ ვაჟთა 2017-2018 წლების ეროვნული ჩემპიონატი. საპრიზო ადგილებისთვის ბრძოლაში ოთხი გუნდი ჩაება. შეჯიბრების პირველ მატჩში თბილისელები და რკინიგზელები დაუპირისპირდნენ ერთმანეთს.

თბილისი-ლოკომოტივი 7:13
0:2, 1:5, 3:2, 3:4
თბილისი: კაპანაძე, ცხაკაია, დიასამიძე (1), სამყურაშვილი (1), მემანიშვილი, ხოხაშვილი (2), დადვანი, კუჭუაშვილი (1), ხვინგია, ჭეიშვილი, იმნაიშვილი, ქათამაძე (2), ბარაბაძე, გიორგაძე, მწვრთნელები - კუტივაძე და ქოიავა.
ლოკომოტივი: ქარჩავა, ქავთარაძე (1), ქარჩილაძე, ფურცელაძე (2), ბაბუნაშვილი, ყავლაშვილი (1), რუსიშვილი (5), ივანიშვილი, ურუშაძე, გეგელაშვილი (2), კახეთელიძე, ჩიკვაიძე (2), კუჭუაშვილი, მწვრთნელი დავითიანი.

ეროვნული ჩემპიონატის პირველი გოლი ორთაბრძოლის მე-3 წუთზე რკინიგზელმა ჩიკვაიძემ გაიტანა. წუთ-ნახევრის შემდეგ მანვე ანგარიში ორამდე გაზარდა და პირველი მეოთხედიც ამით დამთავრდა. მეორე რვაწუთიან მონაკვეთში "ლოკომოტივის" წყალბურთელებმა ხუთჯერ იყოჩაღეს. პაექრობის პირველი ნახევრის მიწურულს თბილისელებმა შესვენებამდე მშრალ ანგარიშს თავი დააღწიეს - 7:1.

ასპარეზობის მესამე პერიოდი დაძაბული გამოდგა. "თბილისმა" წაგების საფრთხე რომ იგრძნო, ოდნავ უკეთ ითამაშა და მეტოქის კარში 3 ბურთი გაიტანა, თავად კი ორი მიიღო, თუმცა მათში გარდატეხის შეტანა მაინც ვერ შეძლო - ბოლო მეოთხედში "ლოკომოტივმა" ისევ იძალა,

საბოლოოდ შეხვედრა 13:7 მოიგო და გათამაშების ცხრილში პირველი ორი ქულა ჩაიწერა.

დინამო-სპორტმენეჯმენტი 14:6
5:1, 1:1, 5:2, 3:2
დინამო: რაზმაძე, შავშიშვილი (1), ღავთაძე (1), თეთრაძე (2), გაბადაძე (1), ადეიშვილი (1), ქართველიშვილი, ბაღათურია (1), რურუა (4), მოსაშვილი, ხამოევი (3), თევდორაშვილი, ერისთავი, დვალი, გვეტაძე, მწვრთნელი-ტუკვაძე.

სპორტმენეჯმენტი: ჩხიკვიშვილი, ალავიძე, პატარიძე (1), შუკაკიძე (1), შუბითიძე (1), წულაძე, სამყურაშვილი (1), ჭეიშვილი, მერაბიშვილი (2), გაგოშიძე, ბარბაქაძე, ახვლედიანი (1), გარსევანიშვილი, მწვრთნელი ლაითაძე.

წარმატებას მიაღწია "დინამომაც", რომელიც 22-წლიანი შესვენების შემდეგ წლეულს, იანვარში დაუბრუნდა ქართულ წყალბურთს და გამოცდილებთან ერთად პერსპექტიული ახალგაზრდა წყალბურთელებითაც დააკომპლექტეს. გაზაფხულზე საქართველოს პირველობის ფინალში მან "თბილისი" დაამარცხა და ქვეყნის ჩემპიონის ტიტული მოიპოვა.

თბილისის "დინამო" გასული საუკუნის 30-იან წლებში შეიქმნა. გუნდი მალე მთელ საბჭოეთში ანგარიშგასაწევი ძალა გახდა. განსაკუთრებულ წარმატებებს მეორე მსოფლიო ომის შემდეგ მიაღწია: საბჭოთა კავშირის ორგზის მეორე (1960, 1962), ოთხგზის (1958, 1959, 1964, 1966 წ.წ.) მესამეპრიზიორმა და რვა უძლიერესი გუნდის სრულიად საკავშირო ტურნირის (1963) გამარჯვებულმა ქართველმა წყალბურთელებმა სსრკ-ის ხალხთა სპარტაკიადებში სამჯერ მეორე (1956, 1963, 1979) და ორჯერ მესამე (1959, 1967) ადგილები დაიკავეს. "დინამოს" აღზრდილებმა სხვადასხვა დროს ოლიმპიურ თამაშებსა და მსოფლიოს ჩემპიონატებშიც იასპარეზეს და მედლებითაც დაიმშვენეს მკერდი.

და აი, როგორც ვთქვით, თბილისის "დინამო" კვლავ გამოჩნდა დიდ სპორტში. მისი ამჟამინდელი დამფუძნებლები არიან ახალგაზრდა წყალბურთელები, საქართველოს ნაკრების წევრები - ზურაბ რურუა, გიორგი ხვედელიანი და მიხეილ ბაღათურია.

გუშინ დინამოელებმა აღმავლობით ითამაშეს "სპორტმენეჯმენის" წინააღმდეგ. მატჩის პირველსავე წუთზე ანგარიში ზურაბ რურუამ გახსნა. მერე მისმა თანაგუნდელებმა კიდევ ოთხჯერ აიღეს მეტოქის კარი. "სპორტმენეჯმენტმა" პერიოდის მიწურულს გაიტანა პირველი გოლი. მეორე რვაწუთიან მონაკვეთში ორივე გუნდის წევრებმა მხოლოდ თითოჯერ გამოიჩინეს თავი. დიდი შესვენების შემდეგ "დინამოს" უპირატესობა ისევ აშკარა გახდა. სახელოვანმა კლუბმა ჩემპიონატის სტარტზე გამარჯვება მოიპოვა - 14:6.

"მიხარია, რომ "დინამო", რომლის კაპიტანიც ექვსი წელი ვიყავი, აღორძინდა და ქართული სპორტის სამსახურში ჩადგა. მისი გამოჩენით საქართველოს ჩემპიონატს ინტრიგა და სიმწვავე შეემატა. დარწმუნებული ვარ, დინამოელები 2017-2018 წლების ჩემპიონატშიც ოქროს მედლებისთვის იბრძოლებენ და გამორიცხული არ არის, გაისად ევროტურნირებშიც მოსინჯონ ძალები", - გვითხრა საწყლოსნო სახეობათა ეროვნული ფედერაციის პრეზიდენტმა დავით რურუამ.

დღეს საქართველოს ჩემპიონატის მეორე ტურის შეხვედრები გაიმართება: "სპორტმენეჯმენტი"-"თბილისი" (17.00), "დინამო"-"ლოკომოტივი" (18.30). ხვალ მე-3 ტურში კი "დინამო"-"თბილისი" (17.00) და "სპორტმენეჯმენტი"-"ლოკომოტივი" (18.30) ითამაშებენ.

ყოველდღიური სპორტული გაზეთი "ლელო"
3333
მკითხველის კომენტარები / 0 /
მსგავსი ამბები
რუბრიკის სხვა სიახლეები
;