წყალბურთი: უქმეები ლეგიონერთა საქმიანობისთვის

საქართველოს წყალბურთელ ვაჟთა ნაკრების წევრები წარმატებით განაგრძობენ ასპარეზობას უცხოეთში. ზოგის გუნდი იგებს, ზოგისაც - აგებს, მთავარი კი ის არის, რომ ჩვენებს თავიანთ კლუბებში მოწინავე პოზიციები უჭირავთ და გოლებიც ხშირად გააქვთ.

სლოვაკეთის უმაღლეს ლიგაში შესვენებაა. აქ ერთპიროვნულად გიორგი მაგრაქველიძის "ნოვაკი" ლიდერობს. ჩვენებური ამ დღეებში ქვეყნის 23-წლამდელთა პირველობაში ჩაება. გასულ უქმეებზე ნოვაკელებმა ზედიზედ სამი მატჩი ითამაშა: ჯერ ბრატისლავის "სლავიას" სძლიეს დიდი ანგარიშით - 14:4 (მაგრაქველიძე ორი გოლით გამოირჩა), მერე კოშიცეს "ჰორნეტსა" (13:8, ერთი ბურთი მაგრაქველიძის ანგარიშზეა) და "მოდრი დრაცის" (20:2; მაგრაქველიძემ აქაც ორი გოლი გაიტანა) მოუგეს.

* * *
რეგიონალლიგა (ადრიატიკის ჩემპიონატი), რომელშიც ოთხი ქვეყნის 19 გუნდი მონაწილეობს, შეჯიბრებებს ნაახალწლევს განაახლებს, მანამდე კი სერბული კლუბები შინაურ საქმეებს აგვარებენ. ქვეყნის თასზე მეოთხედფინალური სამი მატჩი გაიმართა (აქაური გრანდი - ბელგრადის "პარტიზანი" პირდაპირ ნახევარფინალშია დაშვებული). დანარჩენი სამი საგზურისთვის ექვსი გუნდი იბრძოდა. გიორგი მესხისა და ნიკოლოზ შუშიაშვილის "შაბაცმა" შინ "რადნჩკის" 10:7 აჯობა და მომდევნო ეტაპზე გავიდა. შუშიაშვილს ამ შეხვედრაში მონაწილეობა არ მიუღია, მესხმა კი ორი საგოლე პასი მიითვალა, ერთხელ კი ბლოკით საკუთარი კარი იხსნა გოლისგან. "ცრვენა ზვეზდამ" "ვალიევოს" სძლია 19:4, "ნიშიმ" კი ნოვი სადის "ვოივოდინა" ჩამოიშორა გზიდან - 11:10. ნახევარფინალის წილისყრა დღეს გაიმართება ბელგრადში.

* * *
გერმანიის ბუნდესლიგაში ალექსანდრე ყაზახიშვილი ბერლინის "ნოიკიოლნის" სპორტულ ღირსებას იცავს. გუშინ მისი გუნდი "ესლინგენს" მასპინძლობდა. ორი პერიოდის შემდეგ ბერლინელები 2:6 აგებდნენ შეხვედრას. მე-3 რვაწუთიანი მონაკვეთის დასაწყიში ყაზახიშვილმა მესამე გოლი გაუტანა სტუმრებს, მერე მისმა თანაგუნდელებმაც იყოჩაღეს და პაექრობა ზავით (6:6) დასრულდა. "ნოიკიოლნი" გათამაშების ცხრილში მეოთხე საფეხურზეა.

* * *
ხვიჩა ჯახაია და ლევან ჩიქვინიძე საბერძნეთის ჩემპიონატში თამაშობენ კრეტის "ორხის" შემადგენლობაში. შაბათს მათი გუნდი ჩინეთის ნაკრებთან ამხანაგურ მატჩში 12:13 დამარცხდა. ჯახაიამ ორი, ჩიქვინიძემ კი ერთი ბურთი გაიტანა აზიელთა კარში.

* * *
იტალიის ჩემპიონატში წარუმატებლად იასპარეზეს ჩვენებურთა გუნდებმა: სერია A-ში მარკო ელაჩას "ორტიჯიამ" (სირაკუზა) შინ "სპორტმენეჯმენტთან" 9:12 წააგო. ელაჩას გოლი არ გაუტანია.

მეორე ლიგის სამხრეთის ჯგუფში ანდრია ბითაძის "ვის ნოვამ" (რომი) საკუთარ აუზში ვერაფერი გააწყო "ბარის" წინააღმდეგ და 6:10 დათმო ორთაბრძოლა.

ჩრდილოეთის ჯგუფში რევაზ იმნაიშვილმა ერთი გოლი შეაშველა "სორის", რომელიც შინ "კროსერასთან" 7:10 დამარცხდა.

ყოველდღიური სპორტული გაზეთი "ლელო"
994
მკითხველის კომენტარები / 0 /
მსგავსი ამბები
რუბრიკის სხვა სიახლეები
;