წყალბურთი. ქართველთა გუნდები ევროპაში წინ მიიწევენ

გასულ უქმეებზე საქართველოს წყალბურთელ ვაჟთა ნაკრების წევრებმა, რომლებიც უცხოურ კლუბებში თამაშობენ, მორიგი ტურის მატჩებში იასპარეზეს.

იტალიის სერია A1-ში მარკო ელაჩას "ორტიჯია" (სირაკუზა) სტუმრად "ნაპოლის" დაუპირისპირდა. შეხვედრა წყალბურთისთვის უჩვეულო ანგარიშით დასრულდა: პირველ პერიოდში ველოტომ მასპინძლები დააწინაურა.

მერე ორი პერიოდის განმავლობაში ბურთი ვერც ერთმა მხარემ ვერ გაიტანა. ბოლო რვაწუთიან მონაკვეთში ელაჩამ და კასასოლამ გამარჯვება (2:1) მოუტანეს "ორტიჯიას", რომელმაც 13 ტურის შემდეგ 24 ქულით გათამაშების ცხრილის მე-5 საფეხურზე გადაინაცვლა. 39 ქულით "პრო რეკო" ლიდერობს.

სერია A2-ის ჩრდილოეთ ლიგაში რევაზ იმნაიშვილის "სორიმ" შინ "კომო ნუოტოს" აჯობა - 7:2 (1:1, 3:0, 2:1, 1:0). 2 გოლი მიითვალა იმნაიშვილმა, რომელიც ჟურნალისტებმა მატჩის საუკეთესო მოთამაშედ დაასახელეს.

"სორი" ექვსი ტურის შემდეგ 9 ქულით მეშვიდე-მერვე ადგილებს იყოფს. მეორე-მეხუთე ადგილებზე მყოფი გუნდები მას 3-3 ქულით უსწრებენ. მე-7 ტურის შეხვედრას იმნაიშვილის გუნდი 27 იანვარს "ჯენოასთან" სტუმრად გამართავს.

A2-ის სამხრეთ ლიგაში გამოდის ანდრია ბითაძის "ვის ნოვა" (რომი). მე-6 ტურში მან შინ დაამარცხა თანაქალაქელთა "რომა 2007" - 8:7 (2:2, 2:3, 2:1, 2:1).

მართალია, ქართველ ცენტრალურ თავდამსხმელს ამჯერად ბურთი არ გაუტანია, მაგრამ არბიტრებს მეტოქის ოთხი მოთამაშე გააძევებინა. "ვის ნოვა" მოკრძალებული 6 ქულით მეცხრე-მეთერთმეტე ადგილებს იყოფს. 27 იანვარს სტუმრად "სესპორტთან" გაარკვევს ურთიერთობას.

მეკარე ნიკოლოზ შუბლაძე და დამირ ცრეპულია "პრიმორაცის" სპორტულ ღირსებას იცავენ. ეს გუნდი რეგიონალნა ლიგაში (ადრიატიკის ჩემპიონატი) ასპარეზობს, სადაც სლოვენიის, ხორვატიის, მონტენეგროს და სერბეთის 19 კლუბი ეცილება ერთმანეთს პირველობას.

პრიმორაცელები პირველ 10-გუნდიან ჯგუფში არიან. მე-9 ტურში მათ სტუმრად "ბუდვას" მოუგეს - 11:7 (2:3, 2:2, 3:1, 4:1). ცრეპულიამ 4 გოლით გამოიჩინა თავი.

ახლა "პრიმორაცი" 9 ქულით მე-7 ადგილზეა. 27 ქულით დუბროვნიკის "იუგი" მეწინავეობს. ქართველთა გუნდი მე-10 ტურში ბელგრადში "პატიზანს" გაუწევს მეტოქეობას.

ამავე ლიგის მე-2 ჯგუფში გამოდის სერბეთის "შაბაცი", რომლის შემადგენლობაში არიან გიორგი მესხი და ნიკოლოზ შუშიაშვილი. 24 იანვარს შაბაცელები სტუმრად ითამაშებენ "ზადართან" - ეს გუნდი შვიდი წაგებით ბოლო ადგილზეა.

"შაბაცს" შვიდი მატჩიდან 15 ქულით გათამაშების ცხრილის მესამე საფეხური უკავია. მას "ცრვენა ზვეზდა" (8 მატჩი, 24 ქულა) და "ვოივოდინა" (7 შეხვედრა, 18 ქულა) უსწრებენ.

ყოველდღიური სპორტული გაზეთი "ლელო"
1841
მკითხველის კომენტარები / 0 /
მსგავსი ამბები
რუბრიკის სხვა სიახლეები
;