წყალბურთი. ქართული გოლები ევროპულ წყლებში

ამას წინათ საქართველოს წყალბურთელ ვაჟთა ნაკრები, რომელიც ახალი მწვრთნელის - რევაზ ჩომახიძის ხელმძღვანელობით ევროპის ჩემპიონატის პლეი ოფისა და კონტინენტის თასის გათამაშებისთვის ემზადება, ხუთდღიან საწვრთნელ შეკრებაზე იყო დუბროვნიკში და ევროპულ გრანდ "იუგთან" ერთად ივარჯიშა, სატესტო ორთაბრძოლებიც გამართა.

შეკრების შემდეგ ეროვნული გუნდის ლეგიონერები საკუთარ კლუბებს დაუბრუნდნენ და მორიგი ტურის შეხვედრები ჩაატარეს. ოთხი ჩვენებური თამაშობს რეგიონალნა ლიგაში (ადრიატიკის ჩემპიონატი).

აქ ოთხი ქვეყნის (ხორვატია, მონტენეგრო, სერბეთი, სლოვენია) 19 გუნდი ეცილება ერთმანეთს პირველობას. ისინი ორ ჯგუფში არიან გადანაწილებული. კოტორის "პრიმორაცის" (A ჯგუფი) ღირსებას იცავენ მეკარე ნიკოლოზ შუბლაძე და დამირ ცრეპულია.

ამ გუნდმა მე-8 ტურში ხორვატიის "პოშკის" უმასპინძლა და 8:4 (3:2, 3:0, 0:2, 2:0) დაამარცხა. გამარჯვებულთაგან სამი გოლი ცრეპულიამ გაიტანა. ჯგუფში რვა მოგებით პირველ ადგილზეა დუბროვნიკის "იუგი". "პრიმორაცს", რომელიც მე-9 ტურში სტუმრად "ბუდვას" ეთამაშება, გათამაშების ცხრილში მე-9 ადგილი უკავაია.

B ჯგუფში სერბეთის "შაბაცმა" შინ მონტენეგროს "კატაროს" აჯობა 12:5 (4:2, 4:1, 3:1, 1:1). შაბაცელთაგან ერთი გოლი ნიკოლოზ შუშიაშვილის ანგარიშზეა, ხოლო გიორგი მესხმა მსაჯებს ოთხი მეტოქე გააძევებინა და ერთი პენალტიც დაიმსახურა.

"შაბაცი" შვიდი ტურის შემდეგ 15 ქულით მესამე ადგილზეა. მას "ცრვენა ზვეზდა" (21 ქულა) და "ვოივოდინა" (18) უსწრებენ. 18 იანვარს შაბაცელები სტუმრად ხორვატიის "ზადარს" დაუპირისპირდებიან.

იტალიის სერია A-ში თამაშობს მარკო ელაჩას გუნდი "ორტიჯია" (სირაკუზა), რომელიც შინ დაძაბული პაექრობის მერე "სელეკონუოტოს" დაუზავდა - 5:5, ოთხი გოლი ელაჩამ მიითვალა. "ორტიჯია" 18 ქულით მე-6 ადგილზეა.

36 ქულით იტალიური გრანდი "პრო რეკო" ლიდერობს. სერია B-ში ანდრია ბითაძის "ვის ნოვა" და რევაზ იმნაიშვილის "სორი" მეხუთე ტურის მატჩებს ხვალ გამართავენ.

ყოველდღიური სპორტული გაზეთი "ლელო"
866
მკითხველის კომენტარები / 0 /
მსგავსი ამბები
რუბრიკის სხვა სიახლეები
;